boi walk 5 ಕಿ.ಮೀ. ವಾಕ್​ಥಾನ್​ನಲ್ಲಿ ಸಾವಿರಾರು ಜನ ಭಾಗಿ

ನಗರದ ತೋಳನಕೆರೆ ಸರ್ಕಲ್​ನಲ್ಲಿ ಭಾನುವಾರ ಬೆಳಗ್ಗೆ ನಡೆದ 5ಕೆ ಹುಬ್ಬಳ್ಳಿ ವಾಕ್​ಥಾನ್​ನಲ್ಲಿ 1,200ಕ್ಕೂ ಅಧಿಕ ಜನರು ಉತ್ಸಾಹದಿಂದ ಭಾಗವಹಿಸಿದ್ದರು.

"ಬಲಿಷ್ಠ ರಾಷ್ಟ್ರ ಮತ್ತು ಆರೋಗ್ಯಕರ ಸಮಾಜಕ್ಕಾಗಿ ಒಟ್ಟಾಗಿ ನಡೆಯೋಣ' ಎಂಬ ಸಂದೇಶದೊಂದಿಗೆ ನಡೆದ ವಾಕ್​ಥಾನ್​ ಆರೋಗ್ಯ, ಒಗ್ಗಟ್ಟು ಹಾಗೂ ಸಾಮಾಜಿಕ ಜವಾಬ್ದಾರಿಯ ಅರಿವು ಮೂಡಿಸುವಲ್ಲಿ ಯಶಸ್ವಿಯಾಯಿತು.

ನಶಾ ಮುಕ್ತ ಭಾರತ ಹಾಗೂ ಪ್ರಾಮಾಣಿಕತೆಯಿಂದ ಸಮೃದ್ಧಿಯತ್ತ ಎಂಬ ಮಹತ್ವದ ಸಾಮಾಜಿಕ ಸಂದೇಶವನ್ನೂ ಸಾರಲಾಯಿತು.

ಜಿಲ್ಲಾಧಿಕಾರಿ ಸ್ನೇಹಲ್​ ಆರ್​. ವಾಕ್​ಥಾನ್​ಗೆ ಚಾಲನೆ ನೀಡಿದರು.

ರಾಷ್ಟ್ರ ನಿರ್ಮಾಣದಲ್ಲಿ ಬ್ಯಾಂಕ್​ ಆಫ್​ ಇಂಡಿಯಾ ನೀಡುತ್ತಿರುವ ಕೊಡುಗೆ ಗಣನೀಯ. ಯುವಜನತೆ ಮಾದಕ ವ್ಯಸನಗಳಿಂದ ದೂರವಿದ್ದು, ಆರೋಗ್ಯಕರ ಜೀವನಶೈಲಿ ಅಳವಡಿಸಿಕೊಳ್ಳುವಂತೆ ಸಲಹೆ ನೀಡಿದರು.

ಶಾಸಕ ಎಂ.ಆರ್​. ಪಾಟೀಲ್​, ಸಹಾಯಕ ಕಾರ್ಮಿಕ ಆಯುಕ್ತ ಮಂಜುನಾಥನ್​ ಉಪಸ್ಥಿತರಿದ್ದರು. ಬ್ಯಾಂಕ್​ ಆಫ್​ ಇಂಡಿಯಾ ವಲಯ ಮುಖ್ಯಸ್ಥ ತಾರಿಣಿ ಚರಣ್​ ಸಾಹು, ಬ್ಯಾಂಕ್​ ಆಫ್​ ಇಂಡಿಯಾದ ಸಮೃದ್ಧ ಇತಿಹಾಸ ಮತ್ತು ಪರಂಪರೆ ಕುರಿತು ಮಾತನಾಡಿದರು.

ಉಪ ವಲಯ ಮುಖ್ಯಸ್ಥ ಅಭಿನವ್​ ಪಾಂಡೆ, ಅಧಿಕಾರಿಗಳ ಸಂಘ, ನೌಕರರ ಸಂಘ, ಸಿಬ್ಬಂದಿ, ಗ್ರಾಹಕರು, ಸಾರ್ವಜನಿಕರು ಭಾಗವಹಿಸಿದ್ದರು.