ಬಯೋಗ್ಯಾಸ್​ ಪ್ಲಾಂಟ್​ ಸ್ಥಳಾಂತರ

ಹುಬ್ಬಳ್ಳಿ- ಧಾರವಾಡ ಮಹಾನಗರದ ಹಸಿ ಕಸವನ್ನು ಮಡ್ಡಿಗುಡ್ಡಕ್ಕೆ ತಂದು ಬೃಹತ್​ ಬಯೋಗ್ಯಾಸ್​ ಪ್ಲಾಂಟ್​ ನಿಮಿರ್ಸಲು ಮಹಾನಗರ ಪಾಲಿಕೆ ಖಾಸಗಿ ಕಂಪನಿಗೆ ಅವಕಾಶ ನೀಡಿತ್ತು. ಆದರೆ ಇದರಿಂದ ಪರಿಸರಕ್ಕೆ ಮಾರಕವಾಗಬಹುದು ಎಂದು ಅರಿತ ಶಿವಳ್ಳಿ, ಹೆಬ್ಬಳ್ಳಿ, ಸುಳ್ಳ, ಮಾರಡಗಿ ಹಾಗೂ ಸೋಮಾಪುರ ಗ್ರಾಮಗಳ ಜನರು ಪಕ್ಷ-ಭೇದ ಮರೆತು ವಿರೋಧಿಸಿದ್ದರು. ಗ್ರಾಮದಿಂದ ಧಾರವಾಡದವರೆಗೆ ಪಾದಯಾತ್ರೆ ನಡೆಸಿ ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಿದ್ದರು. ಅಲ್ಲದೆ, ಮಡ್ಡಿಗುಡ್ಡದಲ್ಲಿ ವನಮಹೋತ್ಸವ ನಡೆಸುವ ಮೂಲಕ "ಕಸದ ನೆಲವಲ್ಲ, ಹಸಿರಿನ ನೆಲ' ಎಂಬ ಸಂದೇಶ ರವಾನಿಸಿದ್ದರು.

ಗ್ರಾಮಸ್ಥರ ನಿರಂತರ ಹೋರಾಟಕ್ಕೆ ಮಣಿದ ಪಾಲಿಕೆ ಬಯೋಗ್ಯಾಸ್​ ಘಟಕ ಸ್ಥಳಾಂತರಕ್ಕೆ ಕ್ರಮ ಕೈಗೊಂಡಿದೆ. ಈ ಜಯದ ಸಂತಸದಲ್ಲಿ ಶಿವಳ್ಳಿ ಗ್ರಾಮಸ್ಥರು ಶ್ರೀ ದುರ್ಗಾದೇವಿ ದೇವಸ್ಥಾನದಲ್ಲಿ ವಿಶೇಷ ಪೂಜೆ ಸಲ್ಲಿಸಿ, ಸಿಹಿ ಹಂಚಿ ಸಂಭ್ರಮಿಸಿದರು.