bank of India ಬ್ಯಾಂಕ್​ ಆಫ್ ಇಂಡಿಯಾ ಸಂಸ್ಥಾಪನ ದಿನಾಚರಣೆ

ಗೋಕುಲ ರಸ್ತೆಯಲ್ಲಿರುವ ವಲಯ ಕಚೇರಿಯಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಬ್ಯಾಂಕಿನ ಗ್ರಾಹಕರು, ಸಾರ್ವಜನಿಕರು, ವಿದ್ಯಾರ್ಥಿಗಳು ಸೇರಿ 1100ಕ್ಕೂ ಹೆಚ್ಚು ಜನ ವಾಕಥಾನ್​ನಲ್ಲಿ ಭಾಗಿಯಾಗಲು ನೋಂದಣಿ ಮಾಡಿಕೊಂಡಿದ್ದಾರೆ. ಇನ್ನಷ್ಟು ಜನರು ಪಾಲ್ಗೊಳ್ಳುವ ನಿರೀಕ್ಷೆ ಇದೆ. ಹುಬ್ಬಳ್ಳಿಯಲ್ಲಿ ಇದು ಎರಡನೇ ವಾಕಥಾನ್​ ಆಗಿದೆ ಎಂದರು.

ಉತ್ತರ ಕರ್ನಾಟಕದ 17 ಜಿಲ್ಲೆಗಳಲ್ಲಿರುವ 62 ಶಾಖೆಗಳನ್ನು ಒಳಗೊಂಡ ವಲಯ ಕಚೇರಿ ವ್ಯಾಪ್ತಿಯಲ್ಲಿ 10 ಸಾವಿರ ಕೋಟಿ ವಹಿವಾಟು ನಡೆಸಲಾಗುತ್ತಿದೆ. ದೇಶಾದ್ಯಂತ 5500 ಶಾಖೆಗಳಿವೆ. ವಿದೇಶದಲ್ಲಿ ಸುಮಾರು 37 ಶಾಖೆಗಳಿದ್ದು, ದೇಶದ ಹೊರಗೆ ಹೆಚ್ಚಿನ ಶಾಖೆ ಹೊಂದಿದ ಮೂರನೇ ಅತಿದೊಡ್ಡ ಬ್ಯಾಂಕ್​ ಎನಿಸಿಕೊಂಡಿದೆ. ಬಿಒಐ ಒಟ್ಟು ಜಾಗತಿಕ ವಹಿವಾಟು 18 ಲಕ್ಷ ಕೋಟಿ ರೂ.ಗೂ ಅಧಿಕವಾಗಿದೆ ಎಂದರು.

ಯುವ ಜನತೆ ಮಾದಕ ವಸ್ತುಗಳಿಂದ ದೂರವಿರಬೇಕು. ಆರೋಗ್ಯಕರ, ಸಕಾರಾತ್ಮಕ ಮತ್ತು ಜವಾಬ್ದಾರಿಯುತ ಜೀವನಶೈಲಿ ರೂಢಿಸಿಕೊಳ್ಳಬೇಕು ಎಂಬ ಸಂದೇಶ ಸಾರುವುದು ಇದರ ಉದ್ದೇಶ. ಇದರೊಂದಿಗೆ ಜನರಲ್ಲಿ ಜಾಗೃತಿ ಮೂಡಿಸುವುದು, ಸಾರ್ವಜನಿಕ ಹಿತಕ್ಕಾಗಿ ಆರೋಗ್ಯ ತಪಾಸಣೆ ಹಾಗೂ ನೇತ್ರ ತಪಾಸಣೆಯನ್ನು ಅಂದು ಹಮ್ಮಿಕೊಳ್ಳಲಾಗಿದೆ. ಸಮುದಾಯದೊಂದಿಗೆ ಬ್ಯಾಂಕ್​ ಇದ್ದು, ಇದಕ್ಕಾಗಿ ಸಿಎಸ್​ಆರ್​ ನಿಧಿ ಅಡಿ ಹಲವು ಸಾಮಾಜಿಕ ಚಟುವಟಿಕೆಗಳನ್ನು ಕೈಗೊಳ್ಳಲಾಗಿದೆ ಎಂದರು.

ಬಿಒಐ 5ಕೆ ಹುಬ್ಬಳ್ಳಿ ವಾಕಥಾನ್​ಗೆ (ಐದು ಕಿ.ಮೀ.) ತೋಳನಕೆರೆ ಸರ್ಕಲ್​ನಲ್ಲಿ ಬೆಳಗ್ಗೆ 7.15ಕ್ಕೆ ಚಾಲನೆ ನೀಡಲಾಗುವುದು. ಟೆಂಡರ್​ ಶ್ಯೂರ್​ ರಸ್ತೆ ಮೂಲಕ ಕಾಡಸಿದ್ದೇಶ್ವರ ಕಾಲೇಜ್​ ಬಳಿಯ ಸರ್ಕಲ್​ ಮೂಲಕ ವಾಪಸ್​ ಮತ್ತೆ ತೋಳನಕೆರೆ ಸರ್ಕಲ್​ಗೆ ಆಗಮಿಸಲಿದೆ ಎಂದು ಡಿಜಿಎಂ ಅಭಿನವ ಪಾಂಡೆ ತಿಳಿಸಿದರು.

ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ, ಸಂಸದ ಹಾಗೂ ಮಾಜಿ ಮುಖ್ಯಮಂತ್ರಿ ಜಗದೀಶ ಶೆಟ್ಟರ, ಸಚಿವ ಸಂತೋಷ ಲಾಡ್​, ಶಾಸಕ ಮಹೇಶ ಟೆಂಗಿನಕಾಯಿ ಇತರರು ಪಾಲ್ಗೊಳ್ಳುವರು.

ವಾಕಥಾನ್​ನಲ್ಲಿ ಮಹಿಳೆ ಹಾಗೂ ಪುರುಷರ ವಿಭಾಗದಲ್ಲಿ ಪ್ರಥಮ ಹಾಗೂ ದ್ವೀತಿಯ ಬಹುಮಾನವಾಗಿ ನಾಲ್ಕು ಟ್ರೋಫಿ ನೀಡಲಾಗುವುದು. ಪಾಲ್ಗೊಂಡ ಎಲ್ಲರಿಗೂ ಮೆಡಲ್​ ವಿತರಣೆ ಮಾಡಲಾಗುವುದು ಎಂದರು.

ಪ್ರೇಮ್​ಜಿ ಫೌಂಡೇಷನ್​, ರೋಟರಿ ಕ್ಲಬ್​, ಕೆಜಿಪಿ ಫೌಂಡೇಷನ್​, ಹೊಟೇಲ್​ ಫಾರ್ಚುನ್​, ಬಿಗ್​ ಮಿಶ್ರಾ ಸೇರಿದಂತೆ ವಿವಿಧ ಸಂಘಟನೆಗಳು ವಾಕಥಾನ್​ಗೆ ಸಾಥ್​ ನೀಡಿವೆ. ಬಿಒಐ ಮುಖ್ಯ ವ್ಯವಸ್ಥಾಪಕ ಬಸವರಾಜ ಕುಂಬಾರ, ವ್ಯವಸ್ಥಾಪಕ ಮಹೇಶ ಹುಬ್ಬಳ್ಳಿ ಇತರರು ಗೋಷ್ಠಿಯಲ್ಲಿದ್ದರು.