Banajig ಬಣಜಿಗ ಬಂಧುಗಳ ಸಂಕ್ರಾಂತಿ ಸಂಭ್ರಮ

ಹುಬ್ಬಳ್ಳಿ: Banajig ತಾಲೂಕು ಬಣಜಿಗ ಬಂಧುಗಳ ವತಿಯಿಂದ ಇಲ್ಲಿಯ ಎಪಿಎಂಸಿ ಆವರಣದ ಬೃಹತ್​ ವಸ್ತು ಪ್ರದರ್ಶನ ಸಭಾಂಗಣದಲ್ಲಿ ಭಾನುವಾರ ಏರ್ಪಡಿಸಿದ್ದ ಸಂಕ್ರಾಂತಿ ಸಂಭ್ರಮವು ವೀರಶೈವ ಲಿಂಗಾಯತ ಪರಂಪರೆ, ಸಂಸ್ಕೃತಿ ಬಿಂಬಿಸುವಲ್ಲಿ ಯಶಸ್ವಿಯಾಯಿತು.

ಸಮಾಜ ಬಾಂಧವರು ಸಾಂಪ್ರದಾಯಿಕ ಉಡುಗೆಗಳೊಂದಿಗೆ ಭಾಗಿಯಾಗುವ ಮೂಲಕ ಮೆರಗು ಹೆಚ್ಚಿಸಿದರು.

ಸಾಂಸ್ಕೃತಿಕ, ಮನೋರಂಜನೆ ಕಾರ್ಯಕ್ರಮಗಳನ್ನು ಏರ್ಪಡಿಸಿ ಮಹಿಳೆಯರು, ಮಕ್ಕಳು ಎಲ್ಲರೂ ಒಟ್ಟಾಗಿ ಸಂಕ್ರಾಂತಿ ಆಚರಿಸಿದರು. ಪರಸ್ಪರ ಎಳ್ಳು ಬೆಲ್ಲ ವಿನಿಮಯ ಮಾಡಿಕೊಂಡು ಶುಭಾಶಯ ಕೋರಿದರು.

ಮುಖ್ಯ ಅತಿಥಿಯಾಗಿದ್ದ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಮಾತನಾಡಿ, ವೀರಶೈವ ಲಿಂಗಾಯತ ಸಮಾಜದಲ್ಲಿ ಒಗ್ಗಟ್ಟು ಮೂಡಿಸಲು ಇಂತಹ ಕಾರ್ಯಕ್ರಮಗಳು ಅಗತ್ಯವಾಗಿವೆ. ಹಿರಿಯರು ಯುವಕರಿಗೆ ಮಾರ್ಗದರ್ಶನ ನೀಡುವ ವೇದಿಕೆಯಾಗಿದೆ. ಹೃದಯ ಶ್ರೀಮಂತಿಕೆ, ಸ್ವಾಭಿಮಾನಕ್ಕೆ ಮತ್ತೊಂದು ಹೆಸರೇ ಬಣಜಿಗ ಎಂದು ಪ್ರತಿಪಾದಿಸಿದರು.

ಸಮಾಜದಲ್ಲಿ ಕೆಲವರ ಸ್ವಾರ್ಥದಿಂದಾಗಿ ಒಗ್ಗಟ್ಟು ಕಡಿಮೆಯಾಗುತ್ತಿದೆ. ಯಾರಾದರೂ ಮೇಲೆ ಹತ್ತುತ್ತಾರೆ ಎಂದರೆ, ಹತ್ತು ಜನ ಕೆಡವಲು ಹವಣಿಸುತ್ತಾರೆ ಎಂದು ವಿಷಾದಿಸಿದರು.

ಮಾಜಿ ಸಿಎಂ ಜಗದೀಶ ಶೆಟ್ಟರ್​ ಹಾಗೂ ಬಿ.ಎಸ್​. ಯಡಿಯೂರಪ್ಪ ಅವರು ಸಮಾಜಕ್ಕೆ ಅನೇಕ ಅನುಕೂಲಗಳನ್ನು ಮಾಡಿದ್ದಾರೆ. ಇದೀಗ ನಮ್ಮೆಲ್ಲರ ಕರ್ತವ್ಯ ದೊಡ್ಡದಿದೆ. ಸಮಾಜಕ್ಕೆ ಶಕ್ತಿ ತುಂಬಬೇಕು ಎಂದರು.

ಕೆಎಲ್​ಇ ನಿರ್ದೇಶಕ ಶಂಕರಣ್ಣ ಮುನವಳ್ಳಿ, ಸಮಾಜವನ್ನು ಇನ್ನೂ ಬಹಳ ಎತ್ತರಕ್ಕೆ ಕೊಂಡೊಯ್ಯಲು ಸಾಧ್ಯವಿದೆ. ವೀರಶೈವ ಲಿಂಗಾಯತ ಸಮಾಜದ ಶಾಸಕರು ಒಟ್ಟಾಗಬೇಕು. ಬಲಯುತವಾಗಿರಬೇಕು. ಜತೆಗೆ ಸಮಾಜದ ಬಡ ಮಕ್ಕಳಿಗೆ ಸಹಾಯ ನೀಡುವ ಕಾರ್ಯ ಹೆಚ್ಚಿನ ಪ್ರಮಾಣದಲ್ಲಿ ಆಗಬೇಕು ಎಂದರು.

ಉದ್ಯೋಗ ಮೀಸಲಾತಿಯೂ ಸಿಗಲಿ: ಮಾಜಿ ಸಿಎಂ ಜಗದೀಶ ಶೆಟ್ಟರ್​ ಮಾತನಾಡಿ, ಸಂಕ್ರಾಂತಿ ಸಂಭ್ರಮ ಅತ್ಯಂತ ವಿಶೇಷ ಕಾರ್ಯಕ್ರಮವಾಗಿದೆ. ಸಮಾಜದ ಬಂಧುಗಳನ್ನು ಒಟ್ಟಾಗಿಸುವುದು ಇದರ ಉದ್ದೇಶ. ಅಧಿಕಾರ ಇದ್ದಾಗ ಶಿಕ್ಷಣಕ್ಕಾಗಿ 2ಎ ಮೀಸಲಾತಿ ಕೊಡುವ ಕೆಲಸ ಮಾಡಿದೆ. ಉದ್ಯೋಗದಲ್ಲಿಯೂ ಮೀಸಲಾತಿ ಸಿಗಬೇಕಾಗಿದೆ. ಇದರ ಬಗ್ಗೆ ಪ್ರಯತ್ನಗಳು ನಡೆಯಬೇಕು ಎಂದರು.

ಬಣಜಿಗ ಸಮಾಜ ಎಲ್ಲ ಧರ್ಮ ಜಾತಿ ಜನರನ್ನು ಸೌಹಾರ್ದದಿಂದ ಕಾಣುತ್ತದೆ. ಜಗಜ್ಯೋತಿ ಬಸವಣ್ಣನವರೇ ನಮಗೆ ಆದರ್ಶ. ವೀರಶೈವ ಲಿಂಗಾಯತ ಒಂದು ಎನ್ನುವುದನ್ನು ಸಹ ಸಾರಬೇಕಾಗಿದೆ. ಹಿಂದೆ ಬಹಳಷ್ಟು ಲಿಂಗಾಯತ ಸಮಾಜದ ಎಂಎಲ್​ಎಗಳು ಇರುತ್ತಿದ್ದರು. ಆ ಸಂಖ್ಯೆ ಕಡಿಮೆಯಾಗಿದೆ. ಇದರ ಹಿಂದೆ ಷ್ಯಡ್ಯಂತ್ರ ಅಡಗಿದೆ. ಒಡೆದು ಆಳುವ ಕೆಲಸ ಆಗುತ್ತಿದೆ. ಇದರ ಬಗ್ಗೆ ಎಚ್ಚರಿಕೆ ಬಹಿಸಬೇಕು. ಸಂಖ್ಯೆ ಕಡಿಮೆಯಾಗಲು ಕಾರಣ ಅವಲೋಕನ ಮಾಡಬೇಕು. ಸಮಾಜದ ಸ್ವಾಮೀಜಿಗಳು ಮೊದಲು ಒಂದಾಗಬೇಕು ಎಂದು ಸಲಹೆ ನೀಡಿದರು.

ಶಾಸಕ ಮಹೇಶ ಟೆಂಗಿನಕಾಯಿ ಮಾತನಾಡಿ, ಸಮಾಜ ಒಟ್ಟಿಗೆ ಹೋಗಬೇಕು, ಎಲ್ಲರನ್ನೂ ಒಪ್ಪಿಕೊಳ್ಳುವ ಸಮಾಜ ಇದಾಗಿದೆ. ಸಮಾಜ ಎಂದ ಮೇಲೆ ಕೆಲವು ವ್ಯತ್ಯಾಸ ಸಹಜ. ಅದನ್ನೆಲ್ಲ ಬದಿಗಿಟ್ಟು ಜೊತೆಗೂಡಿ ಹೋಗಬೇಕು ಎಂದರು. ಸಮೀಕ್ಷೆ ಸಂದರ್ಭದಲ್ಲಿ ರಾಜ್ಯ ಸರ್ಕಾರ ಹೊಸ ಹೊಸ ಸಮಾಜಗಳನ್ನು ಸೃಷ್ಟಿ ಮಾಡಿರುವುದು ದುರ್ದೈವದ ಸಂಗತಿ ಎಂದರು.

ಸಂಕ್ರಾಂತಿ ಸಂಭ್ರಮದ ಅಧ್ಯಕ್ಷ ಚನ್ನವಿರ ಮುಂಗರವಾಡಿ ಪ್ರಾಸ್ತಾವಿಕ ಮಾತನಾಡಿದರು. ಶೋಭಾ ಪ್ರಾರ್ಥನೆ ಹಾಡಿದರು. ಸಮಾಜದ ತಾಲೂಕು ಅಧ್ಯಕ್ಷ ಗುರುಪಾದಪ್ಪ ಶಿರೂರ ಸ್ವಾಗತಿಸಿದರು.

ಮಾಜಿ ಸಭಾಪತಿ ವೀರಣ್ಣ ಮತ್ತಿಕಟ್ಟಿ, ಎಂಎಲ್​ಸಿಗಳಾದ ಎಸ್​.ವಿ. ಸಂಕನೂರ, ಪ್ರದಿಪ ಶೆಟ್ಟರ್​, ಮಾಜಿ ಶಾಸಕರಾದ ಪರಣ್ಣ ಮುನವಳ್ಳಿ, ಸೀಮಾ ಮಸೂತಿ, ಗಣ್ಯ ವ್ಯಾಪಾರಸ್ಥ ಮಂಜುನಾಥ ಮುನವಳ್ಳಿ, ತಾರಾದೇವಿ ವಾಲಿ, ಆನಂದ ಉಪ್ಪಿನ, ಸವಿತಾ ಅಮರಶೆಟ್ಟಿ, ಚನ್ನಬಸಪ್ಪ ಧಾರವಾಡಶೆಟ್ರ, ಚೈತ್ರಾ ಶಿರೂರ, ವಿಜಯಕುಮಾರ ಶೆಟ್ಟರ, ವೀರಣ್ಣ ಮಳಗಿ, ವೀರೇಂದ್ರ ಕೌಜಲಗಿ, ಜಗದೀಶ ಬಳಗಾನೂರ, ಮಹಾಂತೇಶ ಮಮದಾಪುರ, ಮಲ್ಲಿಕಾರ್ಜುನ ಶಿರಗುಪ್ಪಿ, ಇತರರು ಇದ್ದರು.