ಲೋಕ ಅದಾಲತ್​ನಲ್ಲಿ 366 ಪ್ರಕರಣ ಇತ್ಯರ್ಥ

ಅದಾಲತ್​ನಲ್ಲಿ ನ್ಯಾಯಮೂರ್ತಿಗಳಾದ ಸಚಿನ ಶಂಕರ ಮಗದುಮ್​, ಸಿ.ಎಂ. ಪೂನಚ್ಚ ಮತ್ತು ಗೀತಾ ಕೆ.ಬಿ. ಹಾಗೂ ಅವರೊಂದಿಗೆ ಲೋಕ ಅದಾಲತ್​ನ ಸದಸ್ಯರಾದ ಕೆ.ಎಲ್​. ಪಾಟೀಲ, ಸಾಜಿದ ಗೂಡವಾಲಾ, ಎಂ.ಎಸ್​. ಹಳ್ಳಿಕೇರಿ ಮತ್ತು ವಿದ್ಯಾವತಿ ಕೊಟ್ಟೂರಶೆಟ್ಟರ ವಕೀಲರನ್ನೊಳಗೊಂಡ 4 ಪೀಠಗಳನ್ನು ಆಯೋಜಿಸಲಾಗಿತ್ತು. ಒಟ್ಟು 1,037 ಪ್ರಕರಣಗಳನ್ನು ವಿಚಾರಣೆಗೆ ಪರಿಗಣಿಸಿ ಈ ಪೈಕಿ 366 ಪ್ರಕರಣಗಳನ್ನು 16,62,34,920 ರೂಪಾಯಿ ಮೊತ್ತಕ್ಕೆ ಇತ್ಯರ್ಥಪಡಿಸಲಾಯಿತು.

ಲೋಕ ಅದಾಲತ್​ನಲ್ಲಿ ಅಪಘಾತ ಪರಿಹಾರ ಪ್ರಕರಣಗಳ ಜತೆಗೆ ಭೂಸ್ವಾಧಿನ ಪರಿಹಾರ ಪ್ರಕರಣಗಳನ್ನು ಇತ್ಯರ್ಥಪಡಿಸಲಾಯಿತು. ಕೃಷ್ಣಾ ಮೇಲ್ದಂಡೆ ಯೋಜನೆ ಹಂತ 3ರ ಭೂಸ್ವಾಧಿನ ಪ್ರಕರಣಗಳಿಗೆ ಸಂಬಂಧಿಸಿ ಭೂಮಾಲಿಕರು ಹಾಗೂ ಸರ್ಕಾರ ಸಲ್ಲಿಸಿದ್ದ ಒಟ್ಟು 46 ಮೇಲ್ಮನವಿಗಳನ್ನು ರೈತರು ಮತ್ತು ಭೂಸ್ವಾಧಿನ ಅಧಿಕಾರಿಗಳ ನಡುವೆ ಸಮಾಲೋಚನೆ ನಡೆಸಿ ಇತ್ಯರ್ಥಗೊಳಿಸಲಾಯಿತು.