200 ಮೀ. ಬೃಹತ್ ತಿರಂಗ ಯಾತ್ರೆ

ಧಾರವಾಡ: ವಂದೇ ಮಾತರಂ ಗೀತೆಯ 150ನೇ ವರ್ಷಾಚರಣೆ ಹಾಗೂ ಸ್ವಾತಂತ್ರ‍್ಯೋತ್ಸವದ ಅಂಗವಾಗಿ ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ (ಎಬಿವಿಪಿ) ಧಾರವಾಡ ನಗರ ಘಟಕದಿಂದ ನಗರದಲ್ಲಿ ಶುಕ್ರವಾರ 200 ಮೀಟರ್ ಉದ್ದದ ಬೃಹತ್ ತಿರಂಗ ಯಾತ್ರೆ ಜರುಗಿತು.

ನಗರದ ಲಿಂಗಾಯತ ಭವನದಿಂದ ಆರಂಭವಾದ ತಿರಂಗ ಯಾತ್ರೆಯು ಸಪ್ತಾಪುರ ಬಾವಿ ಕೆಸಿಡಿ ವೃತ್ತ ಮಾರ್ಗವಾಗಿ ಜುಬಿಲಿ ವೃತ್ತ ತಲುಪಿ, ಅಲ್ಲಿ ಡಾ. ಅಂಬೇಡ್ಕರ್ ಪುತ್ಥಳಿಗೆ ಪೌರ ಕಾರ್ಮಿಕರಿಂದ ಪುಷ್ಪಾರ್ಚನೆ ಸಲ್ಲಿಸಲಾಯಿತು. ತಿರಂಗ ಯಾತ್ರೆ ನೂರಾರು ವಿದ್ಯಾರ್ಥಿಗಳು ಹಾಗೂ ಯುವಕರು ರಾಷ್ಟ್ರ ಧ್ವಜ ಹಿಡಿದು ಜಯ ಘೋಷಗಳನ್ನು ಮೊಳಗಿಸಿದರು. ಬೃಹತ್ ತಿರಂಗ ಯಾತ್ರೆ ಸಾರ್ವಜನಿಕರ ಗಮನ ಸೆಳೆಯಿತು.

ವಂದೇ ಮಾತರಂ ಗೀತೆಯ 150 ವರ್ಷಗಳ ಸ್ಮರಣೆಯ ಸಂದರ್ಭದಲ್ಲಿ ದೇಶದ ಸ್ವಾತಂತ್ರ‍್ಯ ಹೋರಾಟದಲ್ಲಿ ರಾಷ್ಟ್ರ ಭಕ್ತಿ ಹಾಗೂ ದೇಶಪ್ರೇಮ ಮೂಡಿಸುವಲ್ಲಿ ಈ ಗೀತೆಯು ವಹಿಸಿದ ಮಹತ್ವವನ್ನು ಸ್ಮರಿಸಲಾಯಿತು. ಸ್ವಾತಂತ್ರ‍್ಯ ಹೋರಾಟಗಾರರ ತ್ಯಾಗ, ಬಲಿದಾನ ಮತ್ತು ದೇಶಕ್ಕಾಗಿ ತಮ್ಮ ಜೀವನ ಸಮರ್ಪಿಸಿದ ಮಹನೀಯರನ್ನು ಯಾತ್ರೆ ವೇಳೆ ಸ್ಮರಿಸಲಾಯಿತು.

ಎಬಿವಿಪಿ ಕರ್ನಾಟಕ ಉತ್ತರ ಪ್ರಾಂತದ ಉಪಾಧ್ಯಕ್ಷ ಡಾ. ಆನಂದ ಹೊಸೂರು, ಎಬಿವಿಪಿ ಜಿಲ್ಲಾ ಪ್ರಮುಖ ಈರಪ್ಪ ಪತ್ತಾರ, ನಗರ ಅಧ್ಯಕ್ಷ ರಾಮನಗೌಡ ಪಾಟೀಲ, ನಗರ ಉಪಾಧ್ಯಕ್ಷ ಆದರ್ಶ, ಹಿರಿಯ ಕಾರ್ಯಕರ್ತ ಪವನ್ ಕರಿಕಟ್ಟಿ, ಧಾರವಾಡ ಜಿಲ್ಲಾ ಸಂಚಾಲಕ ಅಭಿಷೇಕ ದೊಡ್ಡಮನಿ, ನಗರ ಕಾರ್ಯದರ್ಶಿ ಸಚಿನ್ ಕೋಟ್ಯಾಳ, ಪ್ರಾಂತ ಕಾನೂನು ವಿದ್ಯಾರ್ಥಿ ಪ್ರಮುಖ ನಾಗದತ್ತ ಒಡೆಯರ್, ವಿಜಯಲಕ್ಷ್ಮ ಮಾನೆ, ಪ್ರಾಂತ ಸಾಮಾಜಿಕ ಜಾಲತಾಣ ಸಹ ಸಂಚಾಲಕ ಸೋಹನ್ ಮಲ್ಲಾಡ, ಪ್ರಾಂತ ಸ್ಪರ್ಧಾತ್ಮಕ ವಿದ್ಯಾರ್ಥಿಗಳ ಪ್ರಮುಖ ವಿದ್ಯಾನಂದ ಪ್ರಜ್ವಲ್, ಸುಮಿತ್ ಗೋರ್ಪಡೆ, ಪ್ರಸನ್ನ ದ್ಯಾಮನಗೌಡ ಇತರರಿದ್ದರು.