ಕಾಲ ಬದಲಾದಂತೆ ಎತ್ತಿನಗಾಡಿ, ಸೈಕಲ್, ಲಾರಿ ಹಾಗೂ ಇತ್ತೀಚೆಗೆ ಬೈಕ್, ಕಾರು, ಬಸ್ಸು ಹಾಗೂ ಇತರ ವಾಹನಗಳ ಮೂಲಕ ಭಕ್ತರು ಮ.ಬೆಟ್ಟಕ್ಕೆ ತೆರಳುತ್ತಿದ್ದಾರೆ. ಆದರೂ ಕೈಗೊಳ್ಳುತ್ತಿದ್ದ ಪಾದಯಾತ್ರೆಯ ಹಿಂದಿನ ಸಂಪ್ರದಾಯವನ್ನು ಮಾದಪ್ಪನ ಭಕ್ತರು ಬಿಟ್ಟಿಲ್ಲ. ಇದನ್ನು ಮುಂದುವರಿಸಿಕೊಂಡು ಹೋಗುತ್ತಿದ್ದು, ವಿವಿಧ ಜಾತ್ರಾ ವೇಳೆ ಚಾ.ನಗರ ಸೇರಿದಂತೆ ಬೆಂಗಳೂರು, ಕನಕಪುರ, ರಾಮನಗರ, ಮಂಡ್ಯ, ಮೈಸೂರು ಸೇರಿದಂತೆ ಇನ್ನಿತರೆ ಜಿಲ್ಲೆಗಳಿಂದ ಲಕ್ಷಾಂತರ ಭಕ್ತರು ಕಾಲ್ನಡಿಗೆಯ ಮೂಲಕವೇ ತೆರಳುವುದನ್ನು ರೂಢಿಸಿಕೊಂಡು ಬಂದಿದ್ದಾರೆ. ಈ ದಿಸೆಯಲ್ಲಿ ಇದೀಗ ಮ.ಬೆಟ್ಟದಲ್ಲಿ ನಡೆಯುವ ದೀಪಾವಳಿ ಜಾತ್ರಾ ಮಹೋತ್ಸವಕ್ಕೆ ಕಳೆದ ವಾರದಿಂದಲೂ ರಾಜ್ಯದ ವಿವಿಧೆಡೆಯಿಂದ ಸಾವಿರಾರು ಭಕ್ತರು ಕಾಲ್ನಡಿಗೆಯ ಮೂಲಕ ಸಮಾರೋಪಾದಿಯಲ್ಲಿ ಹನೂರು ಮಾರ್ಗವಾಗಿ ಸಂಚರಿಸುತ್ತಿದ್ದಾರೆ. ಮಾದಪ್ಪನ ಹಾಡಿನ ಜತೆಗೆ ವಾದ್ಯಮೇಳ, ಸತ್ತಿಗೆ ಸೂರಿಪಾನಿ ಹಾಗೂ ತಮಟೆಯ ಸದ್ದಿಗೆ ಭಕ್ತರು ಕುಣಿದು ಕುಪ್ಪಳಿಸುತ್ತಾ ಉತ್ಸಾಹದಿಂದ ತೆರಳುತ್ತಿದ್ದಾರೆ. ಹಾಗಾಗಿ ಹನೂರು ಭಾಗದಲ್ಲಿ ದೀಪಾವಳಿ ಜಾತ್ರೆಯ ಸಂಭ್ರಮ ಮನೆ ಮಾಡಿದೆ.
