ಮಹಾಶಿವರಾತ್ರಿ ಹಬ್ಬದ ಅಂಗವಾಗಿ ತಾಲೂಕಿನ ನಂದಿಯ ಶ್ರೀ ಭೋಗನಂದೀಶ್ವರ ಸ್ವಾಮಿ ದೇವಾಲಯದ ಬ್ರಹ್ಮ ರಥೋತ್ಸವಕ್ಕೆ ಆಗಮಿಸಿದ್ದ ಭಕ್ತ ಸಮೂಹವು, ಹದಗೆಟ್ಟ ರಸ್ತೆ ಮತ್ತು ಬೀದಿದೀಪ ಸೇರಿದಂತೆ ನಾನಾ ವ್ಯವಸ್ಥೆಗೆ ಆಕ್ರೋಶ ವ್ಯಕ್ತಪಡಿಸಿತು.
ನಂದಿ ಮಾರ್ಗದ ರಸ್ತೆಗಳಲ್ಲಿನ ದೊಡ್ಡ ಗುಂಡಿಗಳು, ಜಲ್ಲಿ ಕಲ್ಲುಗಳು, ಧೂಳು ಕಾಡಿದರೆ, ಬೆಳಗದ ಬೀದಿದೀಪಗಳಿಂದ ಕಗ್ಗತ್ತಲಿನಲ್ಲಿ ಸಾಗಬೇಕಾಯಿತು. ದೇವಾಲಯದ ಆವರಣ ಹೊರತುಪಡಿಸಿದರೆ ರಸ್ತೆ, ಚರಂಡಿ, ಬೀದಿದೀಪಗಳ ನಿರ್ವಹಣೆಯಲ್ಲಿ ಆಡಳಿತ ಯಂತ್ರಾಂಗ ಸಂಪೂರ್ಣ ವಿಲವಾಗಿದ್ದು ಭಕ್ತಾದಿಗಳು ಜಾತ್ರೆಗೆ ಬಂದು ಹೋಗುವ ಸಂದರ್ಭದಲ್ಲಿ ಸ್ಥಳಿಯ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳ ಅಸಡ್ಡೆ ಧೋರಣೆಗೆ ಆಕ್ರೋಶ ವ್ಯಕ್ತಪಡಿಸಿದರು. ಅಭಿವೃದ್ಧಿಯ ಜಪ ಬಿಟ್ಟರೆ ಕೆಲಸದಲ್ಲಿ ದೊಡ್ಡ ಸಾಧನೆ ಏನಿಲ್ಲ ಎಂದು ಟೀಕಿಸಿದರು.
