ಕೊಣಾಜೆಯಿಂದ ಗ್ರಾಮಚಾವಡಿಗೆ ಮುಖ್ಯ ರಸ್ತೆಯಲ್ಲಿ ಸಿಗುವ ಕೊಣಾಜೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಪುಳಿಂಚಾಡಿಯಲ್ಲಿ ಭರಣಿಕೆರೆ ಇದೆ. ಗುಡ್ಡಕಾಡಿನಿಂದ ಆವೃತವಾಗಿರುವ ಈ ಪ್ರದೇಶದಲ್ಲಿ ಹಿಂದಿನಿಂದಲೂ ಕೆರೆಯಿತ್ತಾದರೂ ಹೂಳು ತುಂಬಿಕೊಂಡಿತ್ತು. ಅಲ್ಲದೆ ಈ ಕೆರೆಯ ನೀರು ನಾಲೆಯ ಮೂಲಕ ಮುಲಾರ, ಪರಂಡೆ, ದೋಟ, ರೆಂಜಾಡಿ, ಅಂಬ್ಲಮೊಗರು ಮೂಲಕ ನದಿ ಸೇರುತ್ತಿತ್ತು. ಗ್ರಾಮದಲ್ಲಿ ಬೇಸಿಗೆ ಕಾಲದಲ್ಲಿ ಕುಡಿಯುವ ನೀರಿನ ಸಮಸ್ಯೆ ಗಂಭೀರವಾಗಿತ್ತು. ಈ ಹಿನ್ನೆಲೆಯಲ್ಲಿ ಶೌಕತ್ ಅಲಿ ಗ್ರಾಮ ಪಂಚಾಯಿತಿಯ ಅಧ್ಯಕ್ಷರಾಗಿದ್ದ ಸಂದರ್ಭ ಗ್ರಾಮದ ದಡಸ್ ಮತ್ತು ಭರಣಿಕೆರೆಗೆ ಪುನರ್ಜೀವ ನೀಡಿ ಅಂತರ್ಜಲ ವೃದ್ಧಿಗೆ ಮುಂದಾಗಿದ್ದರು. ಅದರಂತೆ ಭರಣಿಕೆರೆಯನ್ನು ಉದ್ಯೋಗ ಖಾತರಿ ಹಾಗೂ ಪಂಚಾಯಿತಿಯ ಹಣದಲ್ಲೇ ಅಭಿವೃದ್ಧಿಪಡಿಸಿ ಹರಿಯುವ ನೀರನ್ನು ತಡೆಯುವ ಪ್ರಯತ್ನ ಮಾಡಿದ್ದರು.
