ದೇವದುರ್ಗ ಜನರಿಗೆ ಆಸರೆಯಾದ ಬಾವಿಗಳು

ದೇವದುರ್ಗ: ಪರಿಸರ ಅಸಮತೋಲನ, ಕ್ರಿಮಿನಾಶ ಬಳಕೆ ಹಾಗೂ ಪ್ರಕೃತಿ ಹಾನಿಯಿಂದ ಜೀವಜಲ ಎಲ್ಲೆಡೆ ವಿಷವಾಗಿದೆ. ಆದರೆ, ಪಟ್ಟಣದ ಎರಡು ಐತಿಹಾಸಿಕ ಬಾವಿಗಳು ಇಂದಿಗೂ ಪರಿಶುದ್ಧತೆ ಉಳಿಸಿಕೊಂಡಿದ್ದು ಜನರ ದಾಹ ನೀಗಿಸುತ್ತಿವೆೆ. ಇಲ್ಲಿನ ಜಲ, ಶುದ್ಧ ಕುಡಿವ ನೀರಿನ ಘಟಕ ಮೀರಿಸುವಂತಿವೆ.

ಪಟ್ಟಣದ ಪೂರ್ವ ಮತ್ತು ಪಶ್ಚಿಮ ದಿಕ್ಕಿಗೆ ಇರುವ ಐತಿಹಾಸಿಕ ಖಾಸಬಾವಿ ಹಾಗೂ ಮಾವಿನಕೇರಿ ಬಾವಿಗಳು ಬೇಸಿಗೆಯಲ್ಲಿ ಬಡವರ ದಾಹ ನೀಗಿಸುತ್ತಿವೆ. ಆಳದ ಬಾವಿ, ಬೋರ್‌ವೆಲ್‌ಗಳು ಅಂತರ್ಜಲ ಕೊರತೆಯಿಂದ ಬತ್ತುತ್ತಿದ್ದರೆ ಈ ಬಾವಿಗಳಿಗೆ ತಂತಹದ್ದೇ ಬೇಸಿಗೆ ಬಂದರೂ ಜೀವಜಲ ಒರತೆಯಿಂತೆ ಸಂಗ್ರಹವಾಗಿರುತ್ತದೆ.

ಎರಡೂ ಬಾವಿಗಳು ಪಟ್ಟಣವನ್ನು ಎರಡು ಸಮಬಲ ಭಾಗವಾಗಿ ವಿಂಗಡಣೆ ಮಾಡಿದಂತಾಗಿದೆ. ಬಾಪೂಜಿ ಓಣಿಯಿಂದ ತಿಲಕ ಓಣಿ ವ್ಯಾಪ್ತಿಯ 11ವಾರ್ಡ್ (ಗೌರಂಪೇಟ್ ಹೊರೆತುಪಡಿಸಿ) ನಿವಾಸಿಗಳು ಖಾಸಬಾವಿ ನೀರು ಅವಲಂಬಿಸಿದ್ದಾರೆ. ಮೋಹಿನುದ್ದೀನ್ ಕಾಲನಿಯಿಂದ ಅಬುಮೊಹಲ್ಲಾ ಓಣಿವರೆಗೆ ಉಳಿದ 11ವಾರ್ಡಿನ ನಿವಾಸಿಗಳು ಮಾವಿನಕೇರಿ ಬಾವಿ ನೀರು ಕುಡಿಯುತ್ತಾರೆ.

ದರ್ಬಾರ ಓಣಿಯ ಗೋಪಾಲಸ್ವಾಮಿ ದೇವಸ್ಥಾನ ಮುಂಭಾಗದ ಖಾಸಬಾವಿ ನೀರು ಸಕ್ಕರೆಯ ಪಾಕ ಎಂದು ಹೆಸರುವಾಸಿಯಾಗಿದೆ. ಈ ನೀರನ್ನು ಸಾರಿಗೆ ಸಂಸ್ಥೆ ಸಿಬ್ಬಂದಿ ಹೆಚ್ಚಾಗಿ ಬಳಸುತ್ತಿದ್ದು ಕರ್ತವ್ಯದ ವೇಳೆ ಬೆಂಗಳೂರು, ಪುನಾದವರೆಗೆ ನೀರು ಕೊಂಡೊಯ್ಯುತ್ತಾರೆ. ಬೆಟ್ಟಪ್ಪ ದೊರೆ ಆಡಳಿತದಲ್ಲಿ ಬಾವಿ ತೆಗೆಯಲಾಗಿದೆ ಎಂದು ಇತಿಹಾಸದಲ್ಲಿ ಉಲ್ಲೇಖವಿದೆ.

ಇನ್ನು ಬೆಟ್ಟದಮಧ್ಯ ಭಾಗದಲ್ಲಿರುವ ಮಾವಿನಕೆರೆ ಬಾವಿ ಬಡವರ ಪಾಲಿನ ಶುದ್ಧ ಕುಡಿವ ನೀರಿನ ಘಟಕವಾಗಿದೆ. ಪಟ್ಟಣದ ಪಶ್ಚಿಮ ದಿಕ್ಕಿಗೆ ಬರುವ ಬಾವಿಯು ಗುಡ್ಡಗಳ ನಡುವೆ ನಿರ್ಮಾಣವಾಗಿದೆ. ಗುಡ್ಡಗಾಡು ಪ್ರದೇಶದಲ್ಲಿದ್ದರೂ ಅಂತರ್ಜಲ ಕಡಿಮೆಯಾಗಿಲ್ಲ. ಇದು ಇತಿಹಾದಲ್ಲಿ ಎಂದೂ ಬತ್ತದ ಬಾವಿಯಾಗಿದ್ದು, ಇಲ್ಲಿನ ನೀರು ಎಳೆನೀರಿನಷ್ಟೇ ಸಿಹಿಯಾಗಿದೆ.

ಇದನ್ನೂ ಓದಿ: ಮರದಿಂದ ಹಣ್ಣು ಕಿತ್ತ ಬಾಲಕ: ಹಿಗ್ಗಾಮುಗ್ಗಾ ಥಳಿಸಿ ನೀರಿನ ಹೊಂಡಕ್ಕೆ ಎಸೆದ ಮನೆ ಮಾಲೀಕ

ಎಲ್ಲ ಕಡೆ ಮಿನಿರಲ್ ವಾಟರ್ ಹೆಚ್ಚಾಗಿ ಬಳಸಲಾಗುತ್ತಿದ್ದು ನಾಯಿಕೊಡೆಯಂತೆ ಶುದ್ಧ ನೀರಿನ ಘಟಕ ಆರಂಭವಾಗಿವೆ. ಕೆಮಿಕಲ್ ಮಿಶ್ರಿತ ನೀರು ಮಾರಾಟ ಮಾಡಲಾಗುತ್ತಿದೆ. ಆದರೆ ಎರಡು ಬಾವಿಯ ನೀರು ಪರಿಶುದ್ಧವಾಗಿದ್ದು ಬಡವರಿಗೆ ಅನುಕೂಲವಾಗಿವೆ. ಬೆಳಗ್ಗೆ 5ರಿಂದ ಸಂಜೆ 7ಗಂಟೆವರೆಗೆ ಜನರು ನೀರು ತರುತ್ತಾರೆ. ಇನ್ನು ಕೆಲವರು ಅಲ್ಲಿಂದ ನೀರು ತಂದು ಮಾರಾಟ ಮಾಡುತ್ತಿದ್ದು 10 ರೂ.ಗೆ ಒಂದು ಕೊಡದಂಡೆ ಸೇಲ್ ಆಗುತ್ತಿವೆ.

ದೈವದ ಸೆಲೆ

ಪರಿಸರ ನಾಶದಿಂದ ಅಂತರ್ಜಲ ಕೂಡ ವಿಷವಾಗಿದ್ದು ಎಲ್ಲೆಡೆ ಅಶುದ್ಧ ನೀರು ದೊರೆಯುತ್ತಿದೆ. ಹಲವು ಕಡೆ ಅರ್ಸೇನಿಕ್ ಹಾಗೂ ಪ್ಲೋರೈಡ್‌ಯುಕ್ತ ನೀರು ಸಿಗುತ್ತಿದೆ. ಈ ನೀರಿನಿಂದ ಕಂದುಹಲ್ಲು, ಮೂಳೆ ಸೆಳೆತ, ಕೈಕಾಲು ಬೇನೆ ಕಾಣಿಸಿಕೊಳ್ಳುತ್ತದೆ. ಆದರೆ, ಕಾಸಬಾವಿ ಹಾಗೂ ಮಾವಿನಕೆರೆ ಬಾವಿ ನೀರು ಪರಿಶುದ್ಧವಾಗಿದ್ದು ತಂಪಿನಿಂದ ಕೂಡಿವೆ. ಕಾಸಬಾವಿ ಬಳಿ ಗೋಪಾಲಸ್ವಾಮಿ ದೇವಸ್ಥಾನ, ಮಾವಿನಕೆರೆ ಬಾವಿ ಸಮೀಪ ಚಂದಕೆರೆಯಂತಹ ಐತಿಹಾಸಿಕ ಸ್ಥಳಗಳಿವೆ. ಹೀಗಾಗಿ ಈ ಬಾವಿ ನೀರಿಗೆ ದೈವದ ಸೆಲೆಯಿದೆ ಎಂಬುದು ಜನರ ನಂಬಿಕೆಯಾಗಿದೆ.