ಹದಗೆಟ್ಟ ರಸ್ತೆ, ತಪ್ಪದ ಅವಸ್ಥೆ

ವಿಜಯವಾಣಿ ವಿಶೇಷ ಹಿರೇಕೆರೂರ

ಪಟ್ಟಣ ಪಂಚಾಯಿತಿಯ ವಿವಿಧ ವಾರ್ಡ್​ಗಳ ರಸ್ತೆಗಳು ಹದಗೆಟ್ಟಿದ್ದರಿಂದ ಜನರ ಹಾಗೂ ವಾಹನ ಓಡಾಟಕ್ಕೆ ತೊಂದರೆಯಾಗಿದೆ.

20 ವಾರ್ಡ್​ಗಳ ವ್ಯಾಪ್ತಿಯಲ್ಲಿ 9 ಕಿಮೀ ಕಲ್ಲು ರಸ್ತೆ, 43.79 ಕಿಮೀ ಡಾಂಬರೀಕರಣ ಮತ್ತು ಕಾಂಕ್ರೀಟ್, 11.21 ಕಿಮೀ ಮಣ್ಣಿನ ರಸ್ತೆ ಇದೆ. 64 ಕಿಮೀ ಪೈಕಿ 44 ಕಿಮೀ ಮಾತ್ರ ಸುಧಾರಣೆಯಾಗಿದೆ. ಮಂಜುನಾಥ ನಗರ, ರಾಘವೇಂದ್ರ ಕಾಲನಿ, ಸ್ವಾಮಿ ವಿವೇಕಾನಂದ ನಗರ, ವಿದ್ಯಾನಗರ, ತಂಬಾಕದನಗರ, ಅಯ್ಯಪ್ಪಸ್ವಾಮಿನಗರ, ಬಸವೇಶ್ವರನಗರ, ಜಾವಿದಖಾನ್​ನಗರ, ಟಿಪ್ಪು ನಗರ, ಜನತಾ ಪ್ಲಾಟ್, ಆಜಾದ್​ನಗರ, ಮುಗಳಳ್ಳಿ ಪ್ಲಾಟ್, ಕಾಳಿದಾಸನಗರ, ಚೌಡೇಶ್ವರಿನಗರ, ಶಾಂತಿಧಾಮ ರಸ್ತೆ, ಜಾಲಿಕಟ್ಟಿ, ವಿಜಯನಗರ, ಸರ್ಕಾರಿ ಕನ್ನಡ ಪ್ರಾಥಮಿಕ ಶಾಲೆಯಿಂದ ಸಾಗುವ ದುರ್ಗಾದೇವಿ ದೇವಸ್ಥಾನ ರಸ್ತೆ, ಅಂಬೇಡ್ಕರ್ ನಗರ ಸೇರಿ 20 ಕಿಮೀ ಅಭಿವೃದ್ಧಿಪಡಿಸಬೇಕಿದೆ.

ಒಳಚರಂಡಿ ಕಾಮಗಾರಿಗಾಗಿ ಅಗೆದ ರಸ್ತೆಗಳಲ್ಲಿ ಮತ್ತೆ ಕಾಂಕ್ರೀಟ್ ಮಾಡಿಲ್ಲ. ಇದರಿಂದ ದೊಡ್ಡ ಗುಂಡಿಗಳು ನಿರ್ವಣವಾಗಿದ್ದು ಜನ ಬಿದ್ದು ಗಾಯಗೊಳ್ಳುತ್ತಿದ್ದಾರೆ. ಅಯ್ಯಪ್ಪಸ್ವಾಮಿನಗರ, ಅಂಬೇಡ್ಕರ್ ನಗರದಿಂದ ಸಂತೆ ಮೈದಾನಕ್ಕೆ ಸಾಗುವ ರಸ್ತೆ, ತಂಬಾಕದನಗರ, ಬಸವೇಶ್ವರನಗರದಲ್ಲಿ ಮಣ್ಣಿನ ರಸ್ತೆಗಳಿವೆ. ಇಲ್ಲಿ ಬೇಸಿಗೆಯಲ್ಲಿ ಧೂಳಿನ ಸಮಸ್ಯೆಯಾದರೆ, ಮಳೆಗಾಲದಲ್ಲಿ ರಾಡಿಯ ಸಮಸ್ಯೆ.

ಮೀಸಲಾತಿ ಗೊಂದಲದಿಂದ ಎರಡೂವರೆ ವರ್ಷದಿಂದ ಆಡಳಿತ ಸಿಗದಿದ್ದ ಪಪಂ ಸದಸ್ಯರಿಗೆ ಈಗ ಅಧಿಕಾರ ಸಿಕ್ಕಿದೆ. ನೂತನ ಅಧ್ಯಕ್ಷರು, ಉಪಾಧ್ಯಕ್ಷರು, ಎಲ್ಲ ಸದಸ್ಯರು ಅಧಿಕಾರ ವಹಿಸಿಕೊಂಡಿದ್ದಾರೆ. ಪಟ್ಟಣದಲ್ಲಿ 3 ವರ್ಷಕ್ಕೊಮ್ಮೆ ನಡೆಯುವ ದುರ್ಗಾದೇವಿ ಜಾತ್ರೆಯನ್ನು ಈ ಬಾರಿ ಫೆ. 23ರಂದು ಆಯೋಜಿಸಲಾಗಿದೆ. ಅಷ್ಟರೊಳಗೆ ರಸ್ತೆ ಸುಧಾರಣೆಗೆ ಗಮನಹರಿಸಬೇಕಿದೆ ಎಂಬ ಒತ್ತಾಯ ಸಾರ್ವಜನಿಕರದ್ದು.

ಪಟ್ಟಣ ಪಂಚಾಯಿತಿಗೆ ಅಂದಾಜು 54 ಲಕ್ಷ ರೂ. ಗಳಷ್ಟು ಮನೆಗಳ ಕರ ಸಂದಾಯವಾಗುತ್ತದೆ. ಇದರೊಟ್ಟಿಗೆ ಬಿ.ಸಿ. ಪಾಟೀಲ ಅವರು ಪ್ರಭಾವಿ ಸಚಿವ. ವಿಶೇಷ ಅನುದಾನ ತರುವ ಮುಖೇನ ರಸ್ತೆ ಅಭಿವೃದ್ಧಿಗೆ ಅವರು ಕಾಳಜಿ ತೋರಬೇಕು ಎನ್ನುವುದು ಸಾರ್ವಜನಿಕರ ಒತ್ತಾಯ.