ಗೆಲುವಲ್ಲ, ಗುರಿ ತಲುಪುವುದು ಮುಖ್ಯ...

ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ಅಭಿಮತ

ಕೆನರಾ ಫ್ರೀಡಂ ರನ್​ ಮೆರಾಥಾನ್​ಗೆ ಚಾಲನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಬೆಳಗ್ಗೆಯ ಓಟ ದೈಹಿಕ, ಮಾನಸಿಕವಾಗಿ ಸಬಲರಾಗಲು ಉತ್ತೇಜನ ನೀಡುತ್ತದೆ. ಮುಖ್ಯವಾಗಿ ವಾಕಿಂಗ್​ ಅಥವಾ ರನ್ನಿಂಗ್​ ಪ್ರಕ್ರಿಯೆಯಿಂದ ಮನೋನಿಗ್ರಹ, ತಾಳ್ಮೆ ಲಭಿಸುತ್ತದೆ. ಹೀಗಾಗಿ ಮೆರಾಥಾನ್​ನಲ್ಲಿ ಗೆಲುವೇ ಮುಖ್ಯ ಗುರಿ ಆಗಬಾರದು. ಸಂಪೂರ್ಣವಾಗಿ ಓಟ ಮುಗಿಸಿ ಗುರಿ ತಲುಪಬೇಕು ಎಂದು ಉಡುಪಿ ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ. ತಿಳಿಸಿದರು.

ಉಡುಪಿಯ ಕೆನರಾ ಬ್ಯಾಂಕ್​ ಮಣಿಪಾಲ ವೃತ್ತ ಕಚೇರಿ ಪ್ರಾಯೋಜಕತ್ವದಲ್ಲಿ ಸ್ವಾತಂತ್ರ್ಯ ದಿನಾಚರಣೆಯ ನಿಮಿತ್ತ ಆಗಸ್ಟ್​ 10ರಂದು ಬೆಳಗ್ಗೆ ಆಯೋಜಿಸಿದ್ದ ಕೆನರಾ ಫ್ರೀಡಂ ರನ್​ನ 4ನೇ ಆವೃತ್ತಿಯ ಮೆರಾಥಾನ್​ಗೆ ಬ್ಯಾಂಕ್​ನ ಮುಂಭಾಗದಲ್ಲಿ ಚಾಲನೆ ನೀಡಿ ಮಾತನಾಡಿದರು.

ಕೆನರಾ ಬ್ಯಾಂಕ್​ ಮಣಿಪಾಲ ವೃತ್ತ ಕಚೇರಿಯ ಮಹಾಪ್ರಬಂಧಕ ಎಚ್​.ಕೆ. ಗಂಗಾಧರ ಮಾತನಾಡಿ, ದೇಶದ ಯೋಧರಿಗೆ ಗೌರವ ಸಲ್ಲಿಸುವ ಸಲುವಾಗಿ ಕೆನರಾ ಫ್ರೀಡಂ ರನ್​ ಆಯೋಜಿಸಲಾಗಿದೆ ಎಂದರು.

ಸಾರ್ವಜನಿಕರಿಗೆ ಫನ್​​ ರನ್​

ಕೆನರಾ ಬ್ಯಾಂಕ್​ ವೃತ್ತ ಕಚೇರಿಯಿಂದ ಆರಂಭಗೊಂಡ ಓಟವು ಮಣಿಪಾಲದಿಂದ ಟ್ಯಾಪ್ಮಿ, ಪರ್ಕಳ, ಆತ್ರಾಡಿ ಮಾರ್ಗವಾಗಿ ಸಾಗಿ ಮತ್ತೆ ಮಣಿಪಾಲ ಕೆನರಾ ಬ್ಯಾಂಕ್​ ಕಚೇರಿ ಬಳಿ ಸಮಾಪ್ತಿಯಾಯಿತು. 5 ಸಾವಿರಕ್ಕೂ ಅಧಿಕ ಜನರು ಭಾಗವಹಿಸಿದ್ದರು. ವಿಜೇತರಿಗೆ ಒಟ್ಟು 5 ಲಕ್ಷ ರೂ.ಗೂ ಅಧಿಕ ಮೊತ್ತದ ಬಹುಮಾನ ನೀಡಲಾಯಿತು.

ಸೌಜನ್ಯಾ ಹೆಗ್ಡೆ ಮತ್ತು ಮೇಜರ್​ ರಾಧಾಕೃಷ್ಣ ಕಾರ್ಯಕ್ರಮ ನಿರೂಪಿಸಿದರು.