ಯೂರಿಯಾಗಾಗಿ ರೈತರು ಪರದಾಟ ; ದಾಸ್ತಾನು ಕೊರತೆಯಿಂದ ಸಮಸ್ಯೆ

ಮುಳಬಾಗಿಲು: ಉತ್ತಮ ಮಳೆ, ಸಮೃದ್ಧಿ ಬೆಳೆಯಿಂದ ಸಂತಸದಲ್ಲಿದ್ದ ರೈತರಿಗೆ ಈಗ ಸೂಕ್ತ ಸಮಯದಲ್ಲಿ ಯೂರಿಯಾ ಗೊಬ್ಬರ ಸಿಗದೆ ಪರದಾಡುವಂತಾಗಿದೆ.

ಯೂರಿಯಾ ಗೊಬ್ಬರದ ದಾಸ್ತಾನು ಕಡಿಮೆಯಾಗಿದ್ದು, ಬೇಡಿಕೆ ಹೆಚ್ಚಾಗಿರುವ ಕಾರಣ ಸಮಸ್ಯೆ ತಲೆದೋರಿದೆ. ಅಲ್ಲದೇ ಭೂಮಿಯ ತೇವಾಂಶ ಹೆಚ್ಚಾಗಿರುವ ಕಾರಣ ಉತ್ತಮ ಬೆಳೆ ಮತ್ತು ತ್ವರಿತ ಸಲು ನಿರೀಕ್ಷೆಗೆ ಒಳಗಾಗಿರುವ ರೈತ ಅವಶ್ಯಕತೆಗಿಂತ ಹೆಚ್ಚು ಯೂರಿಯಾ ಬಳಸುತ್ತಿರುವುದು ಅಗತ್ಯಕಿಂತ ಹೆಚ್ಚು ಬೇಡಿಕೆ ಕಂಡುಬರುತ್ತಿದೆ.

ತಾಲೂಕಿನಲ್ಲಿ ಒಟ್ಟು 25,295 ಹೆಕ್ಟರ್ ಪ್ರದೇಶ ಕೃಷಿ ಚಟುವಟಿಕೆಗಳಿಂದ ಕೂಡಿದ್ದು, ಈ ಸಾಲಿನಲ್ಲಿ 21,633 ಹೆಕ್ಟರ್ ಪ್ರದೇಶದಲ್ಲಿ ವಿವಿಧ ಕೃಷಿ ಬೆಳೆಗಳು ಬಿತ್ತನೆಯಾಗಿದೆ. ನೆಲಗಡಲೆ ಈಗಾಗಲೇ ಫಸಲು ಬರುತ್ತಿದ್ದು ಇದನ್ನು ಹೊರತುಪಡಿಸಿ ಉಳಿದ ಬೆಳೆಗಳಾದ ಭತ್ತ, ರಾಗಿ, ಮುಸುಕಿನ ಜೋಳ, ಮೇವಿನ ಜೋಳ, ತೃಣ ಧಾನ್ಯ, ತೊಗರಿ, ಅವರೆ, ಅಲಸಂಧಿಯನ್ನು ಈಗಾಗಲೆ ಬಿತ್ತನೆ ಮಾಡಿದ್ದು, ಉತ್ತಮ ಮಳೆಯಾಗುತ್ತಿರುವುದರಿಂದ ಯೂರಿಯಾ ಬಳಕೆ ಮಾಡಲು ರೈತ ಕಾಯುತ್ತಿದ್ದಾನೆ. ಇನ್ನೊಂದೆಡೆ ಕೆರೆ ಕುಂಟೆಗಳು, ಕೃಷಿ ಹೊಂಡಗಳು ತುಂಬಿದ್ದು ನೀರಾವರಿ ಭತ್ತ ಬಿತ್ತನೆ (ಪೈರುನಾಟಿ) ಕಾರ್ಯದಲ್ಲಿ ತೊಡಗಿದ್ದರಿಂದ ಯೂರಿಯಾ ಗೊಬ್ಬರಕ್ಕೆ ಬೇಡಿಕೆ ಹೆಚ್ಚಾಗಿದೆ.