ಮೈದಾನ ಮಧ್ಯೆಯೇ ರಸ್ತೆ ಬೇಡಿಕೆ

ಶ್ರೀಪತಿ ಹೆಗಡೆ ಹಕ್ಲಾಡಿ ಕುಂದಾಪುರ

ಬೈಂದೂರು ತಾಲೂಕಿನ ನಾಡಾ ಗ್ರಾಮ ಪಂಚಾಯಿತಿ ಎದುರು ಆಟದ ಮೈದಾನವಿದೆ. ಆಟೋಟ ಚಟುವಟಿಕೆಗಳಿಗೆ ಈ ಮೈದಾನವೇ ಆಶ್ರಯ. ಈಗ ಈ ಮೈದಾನ ಮಧ್ಯೆ ಹಾಡಿಗರಡಿ ದೇವಸ್ಥಾನ ಸಂಪರ್ಕಕ್ಕೆ ರಸ್ತೆ ನಿರ್ಮಿಸಬೇಕು ಎಂಬ ಒತ್ತಾಯ ಕೇಳಿಬಂದಿದ್ದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಆಟದ ಮೈದಾನ ಮೂರು ಎಕರೆಯಷ್ಟು ವಿಶಾಲವಾಗಿದ್ದು, ಅದರಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರ, ವಸತಿಗೃಹ, ಪಶು ಚಿಕಿತ್ಸಾಲಯಕ್ಕೆ ಒಂದಿಷ್ಟು ಜಾಗ ಹೋಗಿದೆ. ಮಳೆ ಸಂದರ್ಭ ಬಿಟ್ಟು ಬಹುತೇಕ ಸಮಯ ಇಲ್ಲಿ ಕ್ರೀಡಾ ಚಟುವಟಿಕೆ ನಡೆಯುತ್ತಿರುತ್ತದೆ. ಭಾನುವಾರ, ರಜಾದಿನಗಳಲ್ಲಿ ಮೈದಾನ ತುಂಬಿರುತ್ತದೆ. ಮೈದಾನದ ಒಂದು ಬದಿ ಹಳೇ ಗ್ರಾಪಂ ಕಟ್ಟಡ, ಗ್ರಾಮಕರಣಿಕರ ಕಚೇರಿ ಇದೆ. ಹಳೇ ಗ್ರಾಪಂ ಕಟ್ಟಡ ಬದಿಯಲ್ಲಿ ರಸ್ತೆ ಹಾಗೂ ದೇವಸ್ಥಾನ ಸ್ವಾಗತ ಗೋಪುರ ಕಟ್ಟಡಕ್ಕೆ ಬೇಡಿಕೆ ಸಲ್ಲಿಸಿದ್ದು, ತಹಸೀಲ್ದಾರ್ ಶೋಭಾಲಕ್ಷ್ಮೀ ಭೇಟಿ ನೀಡಿ ಪರಿಶೀಲಿಸಿದ್ದಾರೆ.

ಹಾಡಿಗರಡಿ ದೇವಸ್ಥಾನಕ್ಕೆ ಹೋಗಲು ಆಟದ ಮೈದಾನದ ಪಕ್ಕ ಡಾಂಬರು ರಸ್ತೆ (ನಾಡಾ - ಮೊವಾಡಿ ಸಂಪರ್ಕ) ಇದೆ. ನಾಡಾ ದೇವಸ್ಥಾನದಿಂದ ಮೈದಾನದ ತನಕ ಸರ್ವಋತು ರಸ್ತೆಯಾಗಿದ್ದು, ಅದನ್ನೇ ಮುಂದುವರಿಸಿ ನಾಡಾ -ಮೊವಾಡಿ ರಸ್ತೆಗೆ ಸೇರಿಸಿದರೆ ಪೂರ್ಣಗೊಳ್ಳುತ್ತದೆ. ದೇವಸ್ಥಾನವನ್ನು ಸಭಾಭವನ ಸಹಿತ ಇತ್ತೀಚೆಗೆ ಅಭಿವೃದ್ಧಿ ಪಡಿಸಿದ್ದು, ಸಂಪರ್ಕ ರಸ್ತೆ ಅವಶ್ಯಕ ಎಂದು ಎಲ್ಲರೂ ಒಪ್ಪಿಕೊಳ್ಳುತ್ತಾರೆ. ಆದರೆ ಇರುವ ರಸ್ತೆ ಅಭಿವೃದ್ಧಿ ಮಾಡುವ ಬದಲು ಮೈದಾನದಲ್ಲಿ ರಸ್ತೆ ಬೇಕು ಎಂಬ ಹಠಕ್ಕೆ ಬೀಳುವುದು ಸರಿಯಲ್ಲ. ಮೈದಾನ ಉಳಿಸಿಕೊಳ್ಳಲು ಸಾರ್ವಜನಿಕರು ಹೋರಾಟದ ಬಗ್ಗೆ ಎಚ್ಚರಿಸಿದ್ದಾರೆ.

ಬೇಡಿಕೆ ತಿರಸ್ಕರಿಸಿತ್ತು ಗ್ರಾಪಂ: ಆಟದ ಮೈದಾನದ ಒಂದು ಪಾರ್ಶ್ವದಲ್ಲಿ ಹಾಡಿಗರಡಿಯಿದ್ದು, ರಸ್ತೆ ಹಾಗೂ ಸ್ವಾಗತ ಗೋಪುರಕ್ಕೆ ಒಪ್ಪಿಗೆ ಕೊಡುವಂತೆ ನಾಡಾ ಗ್ರಾಪಂಗೆ ದೇವಸ್ಥಾನ ಆಡಳಿತ ಮಂಡಳಿ ಮನವಿ ಸಲ್ಲಿಸಿತ್ತು. ಆದರೆ ಆಟದ ಮೈದಾನದಲ್ಲಿ ರಸ್ತೆ ಹಾಗೂ ಸ್ವಾಗತ ಗೋಪುರ ನಿರ್ಮಿಸಲು ನಿರಾಕರಿಸಿತ್ತು. ಕಳೆದ ವಿಧಾನಸಭಾ ಚುನಾವಣೆ ಸಂದರ್ಭ ಹಾಡಿಗರಡಿ ದೈವಸ್ಥಾನ ರಸ್ತೆ ನಿರ್ಮಾಣ ಮುನ್ನೆಲೆಗೆ ಬಂದಿತ್ತು. ಮತ ಸೆಳೆಯುವ ನಿಟ್ಟಿನಲ್ಲಿ ಈ ಭರವಸೆ ಸಿಕ್ಕಿದ್ದು, ಆಮೇಲೆ ಗ್ರಾಪಂ ಆಡಳಿತ ಬದಲಾಗಿ ರಸ್ತೆ ಪ್ರಸ್ತಾಪ ಮತ್ತೆ ಮುನ್ನೆಲೆಗೆ ಬಂದಿದೆ.