ಜೆ.ಕೆ. ಮೈದಾನ, ಹೆಬ್ಬಾಳು ಕೈಗಾರಿಕಾ ಪ್ರದೇಶ, ಇಟ್ಟಿಗೆಗೂಡು, ಸರಸ್ವತಿಪುರಂ, ಪಡುವಾರಹಳ್ಳಿ, ಚಾಮುಂಡಿಪುರಂ ವೃತ್ತ, ರಾಮಕೃಷ್ಣನಗರ, ಕುಂಬಾರಕೊಪ್ಪಲು ಸೇರಿದಂತೆ ನಗರದಲ್ಲಿ 16 ಕಡೆ ಪಟಾಕಿ ಮಾರಾಟ ಮಳಿಗೆಗಳನ್ನು ತೆರೆಯಲಾಗಿದೆ. 115 ವ್ಯಾಪಾರಸ್ಥರು ಅನುಮತಿ ಪಡೆದಿದ್ದು, ಪಟಾಕಿ ಮಾರಾಟಕ್ಕೆ ಸಿದ್ಧತೆ ಮಾಡಿಕೊಂಡಿದ್ದಾರೆ. ಗುರುವಾರ ಸಂಜೆ ವೇಳೆಗೆ ರಸ್ತೆ ಬದಿಗಳಲ್ಲಿ ತಾತ್ಕಾಲಿಕ ತಗಡಿನ ಅಂಗಡಿಗಳು ತಲೆ ಎತ್ತಿದ್ದು, ವ್ಯಾಪಾರಿಗಳು ಪಟಾಕಿಗಳ ಜೋಡಣೆ ಕಾರ್ಯದಲ್ಲಿ ನಿರತರಾಗಿದ್ದರು. ‘ಶುಕ್ರವಾರ ಬೆಳಗ್ಗೆ ಪಟಾಕಿ ಮಾರಾಟ ಶುರುವಾಗಲಿದೆ’ ಎಂದು ಮೈಸೂರು ಹಸಿರು ಪಟಾಕಿ ಮಾರಾಟಗಾರರ ಸಂಘದ ಖಜಾಂಚಿ ಸುರೇಶ್ಗೌಡ ತಿಳಿಸಿದರು.
