ಬೆಂಗಳೂರು: ವಿವಿಧ ವಿಧೇಯಕಗಳ ಪರ್ಯಾಲೋಚನೆ ವೇಳೆ ಶಾಸಕರ ಕೊರತೆ ವಿಧಾನಸಭೆಯಲ್ಲಿ ಎದ್ದುಕಾಣಿಸಿತು. ಮಂಗಳವಾರ ಬೆಳಗ್ಗೆ ಒಂಬತ್ತು ವಿಧೇಯಕಗಳು ಮಂಡನೆಯಾಗಿದ್ದವು, ಸಂಜೆ ಅವುಗಳನ್ನು ಪರ್ಯಾಲೋಚನೆಗೆ ಕೈಗೆತ್ತಿಕೊಳ್ಳಲಾಯಿತು. ಆದರೆ, ವಿಧೇಯಕದ ಬಗ್ಗೆ ಚರ್ಚೆ ನಡೆಸಲು ಶಾಸಕರ ಕೊರತೆ ಕಾಣಿಸಿತು. ಕರ್ನಾಟಕ ವಿಧಾನ ಮಂಡಲದ ಸಂಬಳಗಳು, ನಿವೃತ್ತಿ ವೇತನಗಳು ಮತ್ತು ಭತ್ಯೆಗಳು ಕೆಲ ಇತರ ಕಾನೂನು (ತಿದ್ದುಪಡಿ) ವಿಧೇಯಕ -2020, ಕರ್ನಾಟಕ ಭಿಕ್ಷಾಟನೆ ನಿಷೇಧ (ತಿದ್ದುಪಡಿ) ವಿಧೇಯಕ-2020, ಖಾಸಗಿ ವೈದ್ಯಕೀಯ ಸಂಸ್ಥೆಗಳ (ತಿದ್ದುಪಡಿ) ವಿಧೇಯಕ- 2020, ಕನ್ನಡ ವಿಶ್ವವಿದ್ಯಾಲಯ ಮತ್ತು ಇತರ ಕಾನೂನುಗಳ ತಿದ್ದುಪಡಿ ವಿಧೇಯಕಕ್ಕೆ ಚರ್ಚೆ ರಹಿತವಾಗಿ ಅನುಮೋದನೆಯಾಯಿತು. ಕರ್ನಾಟಕ ಸಾಂಕ್ರಾಮಿಕ ರೋಗಗಳ ವಿಧೇಯಕ- 2020 ಮತ್ತು ಕರ್ನಾಟಕ ಸಾಂಕ್ರಾಮಿಕ ರೋಗಗಳ ವಿಧೇಯಕ ಪರ್ಯಾಲೋಚನೆಗೆ ತೆಗೆದುಕೊಂಡಾಗ ಪ್ರತಿಪಕ್ಷದವರು ಆಕ್ಷೇಪಿಸಿ ಹೆಚ್ಚಿನ ಚರ್ಚೆ ಅಗತ್ಯ ಇರುವುದರಿಂದ ಬುಧವಾರ ಪರಿಗಣಿಸಿ ಎಂದು ಪಟ್ಟುಹಿಡಿದರು. ಸರ್ಕಾರ ಅನಿವಾರ್ಯವಾಗಿ ಒಪ್ಪಬೇಕಾಯಿತು. ಪರ್ಯಾಲೋಚನೆ ವೇಳೆ ವಿಧೇಯಕದ ಪರವಾಗಿರುವ ಶಾಸಕರು ಹೌದು ಎಂದೂ, ವಿರುದ್ಧವಾಗಿರುವವರು ಇಲ್ಲ ಎಂದು ಹೇಳುವುದು ಸಂಪ್ರದಾಯ. ಆದರೆ, ಎರಡು ಕಡೆಗಳಲ್ಲಿ ಶಾಸಕರ ಕೊರತೆ ಎದ್ದು ಕಾಣಿಸಿತು. ಇದನ್ನು ಕಂಡ ಶಾಸಕರು ಹೌದು ಎನ್ನಲೂ ಯಾರೂ ಇಲ್ಲ, ಇಲ್ಲ ಎನ್ನವವರೂ ಇಲ್ಲ ಎಂದರು.
