ನ್ಯೂಟೌನ್ ಸರ್ ಎಂ.ವಿ. ಸರ್ಕಾರಿ ಕಲಾ ಮತ್ತು ವಾಣಿಜ್ಯ ಕಾಲೇಜು ಸಭಾಂಗಣದಲ್ಲಿ ಪ್ರಗತಿಪರ ಸಂಘಟನೆ ಹಾಗೂ ಕರ್ನಾಟಕ ವಿದ್ಯಾರ್ಥಿ ಸಂಘಟನೆ ಆಯೋಜಿಸಿದ್ದ ‘ರಂಗಭೂಮಿ, ಸಿನಿಮಾ ಹಾಗೂ ಸಮಾಜ’ ಸಂವಾದ ಕಾರ್ಯಕ್ರಮದಲ್ಲಿ ಮಾತನಾಡಿ, ಕಲೆ, ನಾಟಕ, ರಂಗಭೂಮಿ ಇಡೀ ಸಮಾಜಕ್ಕೆ ಸ್ಪಂದಿಸುವ ಕೆಲಸ ಮಾಡುತ್ತಿದ್ದಾಗ ಕಲಾವಿದ ಕೂಡ ಸ್ಪಂದಿಸಬೇಕು ಎಂದರು.
ಎಲ್ಲ ಕಾಲಘಟ್ಟಗಳಲ್ಲಿಯೂ ಕೋಮು ಗಲಭೆಗಳು ನಡೆಯುತ್ತಲೇ ಬರುತ್ತಿವೆ. ಆದರೆ ಮಾಡಿದವರು ಒಬ್ಬರಾದರೆ ಪರಿಣಾಮ ನಮ್ಮ ಸಮಾಜ, ನಮ್ಮ ತಾಯಂದಿರು ಹಾಗೂ ನಮ್ಮ ನಿಮ್ಮ ಮಕ್ಕಳ ಮೇಲಾಗುತ್ತಿದೆ. ಇಲ್ಲಿ ನಾವೆಲ್ಲರೂ ಒಂದಾಗಬೇಕಿದೆ. ಸಾರ್ವಜನಿಕವಾಗಿ ಹಾಕಿರುವ ಫ್ಲೆಕ್ಸ್ ಹರಿಯುವ ಮೂಲಕ ಭಯದ ವಾತಾವರಣ ಸೃಷ್ಟಿಸುವ ಬದಲಾಗಿ, ಎಲ್ಲರೊಂದಿಗೆ ಬಾಂಧವ್ಯ ಬೆಸೆಯುವ ಕೆಲಸ ಆಗಬೇಕಿದೆ ಎಂದು ಅಭಿಪ್ರಾಯಪಟ್ಟರು.
ಅಂದಿನ ಅರಸರು ತಮ್ಮ ರಕ್ಷಣೆಗಾಗಿ ಮಾಡುತ್ತಿದ್ದ ಯುದ್ಧಗಳಿಗೆ ಅವರ ಸೈನ್ಯದಲ್ಲಿ ಕಳ್ಳರು, ದರೋಡೆಕೋರರನ್ನು ಸೇರಿಸಿಕೊಳ್ಳುತ್ತಿದ್ದರು. ಯುದ್ಧದ ನಂತರ ಅವರಿಗೆ ಹಣ ನೀಡಲಾಗದೆ ಮತ್ತೆ ದರೋಡೆ, ಅತ್ಯಾಚಾರದಂತ ಹೇಯ ಕೃತ್ಯಗಳಿಗೆ ಕಳುಹಿಸುತ್ತಿದ್ದರು. ಇಂದಿನ ರಾಜಕಾರಣಿಗಳೂ ಅದೇ ಕೆಲಸ ಮಾಡುತ್ತಿದ್ದಾರೆ ಎಂದು ದೂರಿದರು.
ಸಂವಾದದಲ್ಲಿ ರಾಜಕೀಯ, ಸಿನಿಮಾ, ದೇಶ, ಮಣಿಪುರದ ಘಟನೆಗಳು ಕುರಿತಂತೆ ವಿದ್ಯಾರ್ಥಿಗಳು, ಪ್ರಾಧ್ಯಾಪಕರು, ಸಾರ್ವಜನಿಕರು, ಕಾಂಗ್ರೆಸ್ ಮುಖಂಡರು ಪ್ರಶ್ನಿಸಿದರು. ವಿದ್ಯಾರ್ಥಿಗಳೊಂದಿಗೆ ಸಂವಾದ ಎಂದಿದ್ದರೂ ಹೆಚ್ಚು ಚರ್ಚೆ ನಡೆದದ್ದು ಮಾತ್ರ ಸಾರ್ವಜನಿಕರೊಂದಿಗೆ ಎಂಬುದು ವಿಶೇಷ.
ನಗರಸಭೆ ಸದಸ್ಯ ಬಿ.ಕೆ.ಮೋಹನ್, ನಿವೃತ್ತ ಪ್ರೊ. ಚಂದ್ರಶೇಖರಯ್ಯ, ಬಾಲಕೃಷ್ಣ, ಚಿನ್ನಯ್ಯ, ಭದ್ರಾವತಿ ಸತ್ಯ, ಜಿ.ರಾಜು, ಸುರೇಶ್ ಚನ್ನಪ್ಪ ಇತರರಿದ್ದರು.
