ತಂಬಾಕು ನಿಯಂತ್ರಣ ಕಟ್ಟುನಿಟ್ಟಾಗಿರಲಿ

ಕೊಪ್ಪಳ: ತಂಬಾಕು ಸೇವನೆ ಜೀವಕ್ಕೆ ಹಾನಿಕಾರ. ಜಿಲ್ಲಾದ್ಯಂತ ತಂಬಾಕು ನಿಯಂತ್ರಣ ಕಾರ್ಯಕ್ರಮ ಅಚ್ಚುಕಟ್ಟಾಗಿ ಹಮ್ಮಿಕೊಳ್ಳಿ ಎಂದು ಜಿಲ್ಲಾಧಿಕಾರಿ ನಲಿನ್​ ಅತುಲ್​ ಅಧಿಕಾರಿಗಳಿಗೆ ಸೂಚಿಸಿದರು.

ನಗರದ ಡಿಸಿ ಕಚೇರಿ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ಜಿಲ್ಲಾಮಟ್ಟದ ಸಮನ್ವಯ ಸಮಿತಿ ಸಭೆ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

ಪ್ರಪಂಚದಲ್ಲಿ ಪ್ರತಿ ವರ್ಫಿ ಸರಾಸರಿ 70ಲಕ್ಷ ಜನರು ತಂಬಾಕಿನಿಂದ ಉಂಟಾದ ಕಾಯಿಲೆಗೆ ತುತ್ತಾಗುತ್ತಿದ್ದಾರೆ. ತಂಬಾಕು ಸೇವಮೆಯಿಂದ ಕ್ಯಾನ್ಸರ್​, ಹೃದಯ, ಶ್ವಾಸಕೋಶ ಸಂಬಂಧಿ ಕಾಯಿಲೆ ಬರುತ್ತವೆ. ಇದರಿಂದ ಪ್ರತಿ ಆರು ಸೆಕೆಂಡ್​ ಗೆ ಒಬ್ಬರು ಮೃತಪಡುತ್ತಿದ್ದಾರೆ. ಜನರಿಗೆ ತಂಬಾಕಿನಿಂದಾಗುವ ದುಫ್ಪಿರಿಣಾಮ ಕುರಿತು ಅರಿವು ಮೂಡಿಸಿ. ತಂಬಾಕು ನಿಯಂತ್ರಣ ಕಾನೂನು ಕಟ್ಟುನಿಟ್ಟಾಗಿ ಜಾರಿ ಮಾಡಿ. ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ನಿಷಿದ್ಧ. ತಂಬಾಕು ಉತ್ಪನ್ನಗಳಿಗೆ ನೇರ, ಪರೋಕ್ಷ ಜಾಹೀರಾತು ನೀಡುವಂತಿಲ್ಲ. ಅಪ್ರಾಪ್ತರಿಗೆ ತಂಬಾಕು ಉತ್ಪನ್ನ ನೀಡುವಂತಿಲ್ಲ. ಈ ಬಗ್ಗೆ ಜಾಗೃತಿ ಕೈಗೊಳ್ಳಿ ಎಂದು ನಿರ್ದೇಶಿಸಿದರು.

ತಂಬಾಕು ನಿಯಂತ್ರಣ ಜಾಗೃತಿ ಪೋಸ್ಟರ್​ ಬಿಡುಗಡೆ ಮಾಡಲಾಯಿತು.

ಹಿರಿಯ ಸಿವಿಲ್​ ನ್ಯಾಯಾಧೀಶ ಮಹಾಂತೇಶ್​ ಎಸ್​ ದರಗದ, ಜಿಪಂ ಸಿಇಒ ರಾಹುಲ್​ ರತ್ನಂ ಪಾಂಡೆಯ, ಎಎಸ್ಪಿ ಹೇಮಂತ್​ ಕುಮಾರ್​, ಡಿಎಚ್​ಡಾ.ಟಿ.ಲಿಂಗರಾಜು, ಆರ್​ ಸಿಎಚ್​ ಅಧಿಕಾರಿ ಡಾ.ವಿ.ಪ್ರಕಾಶ, ಕುಟುಂಬ ಕಲ್ಯಾಣಾಧಿಕಾರಿ ಡಾ.ರವೀಂದ್ರನಾಥ ಎಂ.ಎಚ್​., ಸರ್ವೇಕ್ಷಣಾಧಿಕಾರಿ ಡಾ.ನಂದಕುಮಾರ್​, ಡಾ.ಶಶಿಧರ, ಡಾ.ವೆಂಕಟೇಶ ಇತರರಿದ್ದರು.