ಮುಳಬಾಗಿಲಿನಲ್ಲಿ ಡಿಸಿ ಸೈಕಲ್​ ರೌಂಡ್ಸ್​

ನಗರದ ಸ್ವಚ್ಛತೆ ಪರಿಶೀಲನೆ - ದೇವಾಲಯ ಸುತ್ತ ಹೋಟೆಲ್​ಗಳ ತೆರವಿಗೆ ಸೂಚನೆ

ಮುಳಬಾಗಿಲು : ಜಿಲ್ಲಾಧಿಕಾರಿ ಡಾ.ಎಂ.ಆರ್​.ರವಿ ಅವರು ಭಾನುವಾರ ಬೆಳ್ಳಂಬೆಳಗ್ಗೆ ಮುಳಬಾಗಿಲಿಗೆ ಆಗಮಿಸಿ ನಗರಸಭೆ ಕಾರ್ಯಾಲಯದ ಪರಿಸರದ ಸ್ವಚ್ಛತೆ ಪರಿಶೀಲಿಸಿ, ನಂತರ ಸೈಕಲ್​ನಲ್ಲೇ ನಗರ ಸಂಚಾರ ಮಾಡಿ ಸಮಸ್ಯೆಗಳನ್ನು ಅವಲೋಕಿಸಿದರು.

ಮುಳಬಾಗಿಲಿಗೆ ಜಿಲ್ಲಾಧಿಕಾರಿ ಭೇಟಿ ಕಾರ್ಯಕ್ರಮ ನಿಗದಿಯಾಗುತ್ತಿದ್ದಂತೆ ನಗರಸಭೆಯಿಂದ ಬೆಳಗ್ಗೆ, ಸಂಜೆ ಎರಡು ಪಾಳೆಯಲ್ಲೂ ಸ್ವಚ್ಛತೆ ಕಾರ್ಯಗಳು ಆರಂಭಗೊಂಡಿದ್ದು, ನಗರದ ಬಸ್​ ನಿಲ್ದಾಣ ರಸ್ತೆ, ತಾಲೂಕು ಕಚೇರಿ ರಸ್ತೆ, ಎಂ.ಸಿ.ರಸ್ತೆಗಳಲ್ಲಿ ಬಿದ್ದಿದ್ದ ಗುಂಡಿಗಳಿಗೆ ಶನಿವಾರ ಬೆಳಗ್ಗೆ ಪಿಡಬ್ಲ್ಯುಡಿ ಇಲಾಖೆಯಿಂದ ಜೆಲ್ಲಿ ಮಿಶ್ರಿತ ಧೂಳು ಹಾಕಿ ಸಮತಟ್ಟು ಮಾಡಿ ಡಿಸಿ ಅವರ ಸೈಕಲ್​ ಯಾತ್ರೆ ಸುಗಮವಾಗಿ ಸಾಗುವಂತೆ ನೋಡಿಕೊಂಡಿದ್ದು ಕಂಡು ಬಂತು. ಈ ಮೂಲಕ ಒಂದು ವಾರದ ಮಟ್ಟಿಗೆ ಹಳ್ಳಗಳ ಸಮಸ್ಯೆಗಳಿಗೆ ಮುಕ್ತಿ ಸಿಕ್ಕಂತಾಗಿದೆ.

ಭಾನುವಾರ ಬೆಳಗ್ಗೆ ಅಂಬೇಡ್ಕರ್​ ವೃತ್ತದಿಂದ ಸೈಕಲ್​ನಲ್ಲಿ ನಗರದ ಪ್ರಮುಖ ರಸ್ತೆಗಳಲ್ಲಿ ಹಾಗೂ ಚಾಚಾ ನೆಹರು ಉದ್ಯಾನವನಕ್ಕೆ ಭೇಟಿ ನೀಡಿ ಬೆಳಗ್ಗೆ ವಾಯುವಿಹಾರಿಗಳ ಜತೆಗೆ ಕೆಲಕಾಲ ಉದ್ಯಾನವನ ಸ್ವಚ್ಛತೆ ಹಾಗೂ ಇತರ ವಿಷಯಗಳ ಕುರಿತು ಚರ್ಚಿಸಿದರು.

ಸೈಕಲ್​ ಜಾಥಾ ಮೂಲಕ ಸ್ವಚ್ಛತಾ ಅಭಿಯಾನದ ಬಗ್ಗೆ ಸಾರ್ವಜನಿಕರಿಗೆ ಅರಿವು ಮೂಡಿಸಲಾಯಿತು.

ಜಿಲ್ಲಾಧಿಕಾರಿ ಡಾ.ರವಿ ಮಾತನಾಡಿ, ಮುಳಬಾಗಿಲು ನಗರ ಬಹುತೇಕ ಸ್ವಚ್ಛವಾಗಿದೆ. ಈ ಬಗ್ಗೆ ನಗರಸಭೆಯ ಪಾತ್ರ ಶ್ಲಾಘನೀಯ ಹಾಗೂ ಸಮಾಧಾನ ತಂದಿದೆ. ಕೆಲ ಸ್ಥಳಗಳಲ್ಲಿ ಸ್ವಚ್ಛತೆಯ ಅಗತ್ಯವಿದೆ. ಇದರಲ್ಲಿ ಸಾರ್ವಜನಿಕರು ಸಹ ನಗರಸಭೆಯ ಜತೆ ಕೈ ಜೋಡಿಸಬೇಕು ಎಂದು ತಿಳಿಸಿದರು.

ಜಿಲ್ಲಾ ನಗರಾಭಿವೃದ್ಧಿ ಕೋಶ ಕಾರ್ಯಪಾಲಕ ಇಂಜಿನಿಯರ್​ ಶ್ರೀನಿವಾಸ್​, ಸಹಾಯಕ ಕಾರ್ಯಪಾಲಕ ಇಂಜಿನಿಯರ್​ ವೆಂಕಟಾಚಲಪತಿ, ಕಂದಾಯ ಅಧಿಕಾರಿ ನಾರಾಯಣ, ಪರಿಸರ ಇಂಜಿನಿಯರ್​ ಮಹೇಶ್​, ಹಿರಿಯ ಆರೋಗ್ಯ ನಿರೀಕ್ಷಕಿ ವಿ.ಪ್ರತಿಭಾ ಇದ್ದರು.