ದಾವಣಗೆರೆ: ನರೇಗಾ ಯೋಜನೆಯಡಿ ಸಾಮಾಜಿಕ ಅರಣ್ಯ ಇಲಾಖೆಯಿಂದ ಕೋಟ್ಯಂತರ ರೂ. ಅವ್ಯವಹಾರ ನಡೆದಿದೆ. ಅರಣ್ಯಪ್ರದೇಶದಲ್ಲಿ ಇಂಗುಗುಂಡಿ ನಿರ್ಮಾಣ, ರಸ್ತೆ ಬದಿ ಅರಣ್ಯೀಕರಣ ಕಾಮಗಾರಿ ದಾಖಲಾತಿಗಳಲ್ಲಿ ಉಳಿದಿವೆ ಎಂದು ಮಾಯಕೊಂಡ ಶಾಸಕ ಕೆ.ಎಸ್.ಬಸವಂತಪ್ಪ ಕಿಡಿ ಕಾರಿದರು.
ಜಿಲ್ಲಾ ಪಂಚಾಯಿತಿ ಸಭಾಂಗಣದಲ್ಲಿ ಮಂಗಳವಾರ ಆಯೋಜಿಸಿದ್ದ ದಾವಣಗೆರೆ ತಾಪಂ ತ್ರೈಮಾಸಿಕ ಪ್ರಗತಿ ಪರಿಶೀಲನೆ ಸಭೆಯಲ್ಲಿ ಮಾತನಾಡಿ, ಗುಡ್ಡ ಪ್ರದೇಶಗಳಲ್ಲಿ ಇಂಗುಗುಂಡಿ ನಿರ್ಮಿಸಿದರೆ ಯಾರ ಕಣ್ಣಿಗೂ ಕಾಣುವುದಿಲ್ಲ ಎಂಬ ಮನಸ್ಥಿತಿ ಅಧಿಕಾರಿಗಳಲ್ಲಿ ಇದ್ದಂತಿದೆ. ತಲಾ ಇಂಗುಗುಂಡಿಗೆ 10 ಲಕ್ಷ ರೂ. ಬಳಸಲಾಗಿದೆ. ಮೂರು ವರ್ಷದಲ್ಲಿ ಎಷ್ಟು ಕಾಮಗಾರಿ ನಡೆದಿವೆ ಎಂಬುದು ನಿಗೂಢವಾಗಿದೆ ಎಂದು ತರಾಟೆಗೆ ತೆಗೆದುಕೊಂಡರು.
ಹೆಬ್ಬಾಳು, ಗುಡಾಳು, ಹುಲಿಕಟ್ಟೆ, ಬಾಡಾ, ನರಗನಹಳ್ಳಿ, ದೊಡ್ಡಬಾತಿ ಮೊದಲಾದ ಪಂಚಾಯಿತಿಗಳಲ್ಲಿ ಈ ಅವ್ಯವಹಾರ ನಡೆದಿದೆ. ರಸ್ತೆಬದಿ ನೆಡುತೋಪು ಹೆಸರಲ್ಲಿ 10 ಸಾವಿರ ಗುಂಡಿ ತೋಡಿರುವ ದಾಖಲಾತಿ ಇದ್ದರೂ ಅಷ್ಟು ಸಸಿಗಳು ಎಲ್ಲಿವೆ? ಕೆಲ ಅಧಿಕಾರಿಗಳು ೀ ಹಗರಣದಲ್ಲಿ ಶಾಮೀಲಾಗಿರುವ ಶಂಕೆ ಇದೆ. ಸ್ಥಳ ಪರಿಶೀಲಿಸಿ, ತಪ್ಪಿತಸ್ಥರ ವಿರುದ್ಧ ಶಿಸ್ತುಕ್ರಮಕ್ಕೆ ನಿರ್ಧರಿಸಲಾಗುವುದು ಎಂದು ಶಾಸಕರು ತಿಳಿಸಿದರು.
