ದಾವಣಗೆರೆ: ರಾಜ್ಯ ಸರ್ಕಾರದ ಆದೇಶದಂತೆ ಅಂತಾರಾಷ್ಟ್ರೀಯ ಪ್ರಜಾಪ್ರಭುತ್ವ ದಿನಾಚರಣೆ ಭಾಗವಾಗಿ ಸೆ. 15ರಂದು ದಾವಣಗೆರೆ ಜಿಲ್ಲಾಡಳಿತದಿಂದ ಜಿಲ್ಲೆಯ 80 ಕಿ.ಮೀ. ವ್ಯಾಪ್ತಿವರೆಗೆ ಬೃಹತ್ ಮಾನವ ಸರಪಳಿ ಆಯೋಜಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಜಿ.ಎಂ. ಗಂಗಾಧರಸ್ವಾಮಿ, ಜಿಪಂ ಸಿಇಒ ಸುರೇಶ್ ಬಿ. ಇಟ್ನಾಳ್ ತಿಳಿಸಿದರು.
ಪ್ರಜಾಪ್ರಭುತ್ವದ ಮೂಲತತ್ವ, ಆಶಯಗಳ ಕುರಿತು ಅರಿವು ಮೂಡಿಸುವುದು ಇದರ ಉದ್ದೇಶವಾಗಿದೆ. ನ್ಯಾಮತಿ ತಾಲೂಕಿನ ಟಿ. ಗೋಪಗೊಂಡನಹಳ್ಳಿಯಿಂದ ಕೋಡಿಯಾಲ ಹೊಸಪೇಟೆವರೆಗೆ ರಸ್ತೆಯ ಎಡಬದಿಯಲ್ಲಿ ಬೃಹತ್ ಮಾನವ ಸರಪಳಿ ನಡೆಯಲಿದೆ. 70 ಸಾವಿರ ಜನರು ಭಾಗಿಯಾಗುವ ಅಂದಾಜಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಬೆಳಗ್ಗೆ 9ರಿಂದ ಅರ್ಧ ತಾಸು ಕಾಲ ನಡೆಯುವ ಕಾರ್ಯಕ್ರಮಕ್ಕೆ, ಟಿ. ಗೋಪಗೊಂಡನಹಳ್ಳಿಯಲ್ಲಿ ಶಾಸಕ ಡಿ.ಜಿ.ಶಾಂತನಗೌಡ ಗಿಡ ನೆಡುವ ಮೂಲಕ ಸಾಂಕೇತಿಕ ಚಾಲನೆ ನೀಡುವರು. ಮಾನವ ಸರಪಳಿ ನಂತರ ಸಂವಿಧಾನ ಪೀಠಿಕೆ ವಾಚನ ನಡೆಯಲಿದೆ. ಸರ್ಕಾರಿ ನೌಕರರು, ಆಶಾ ಕಾರ್ಯಕರ್ತರಿಗೆ ಸೀಮಿತವಾಗದೆ ಶಾಲಾ ಮಕ್ಕಳು, ವಿವಿಧ ಸಂಘಟನೆಗಳು, ರೈತ- ದಲಿತ ಸಂಘಗಳು, ವಕೀಲರು, ಬ್ಯಾಂಕ್ ನೌಕರರು ಪಾಲ್ಗೊಳ್ಳುವರು.
ಜಿಲ್ಲೆಯ ವಿವಿಧ ಧರ್ಮಗುರು, ಸ್ವಾಮೀಜಿಗಳನ್ನೂ ಸಹ ಆಹ್ವಾನಿಸಲಾಗುತ್ತಿದೆ. ಸಂಸದರು, ಜಿಲ್ಲೆಯ ಶಾಸಕರನ್ನು ಆಹ್ವಾನಿಸಲಾಗಿದ್ದು, ಜಿಲ್ಲಾ ಉಸ್ತುವಾರಿ ಸಚಿವರು ಹರಿಹರದ ಗಾಂಧಿ ಮೈದಾನದಲ್ಲಿ ನಡೆಯುವ ಸಮಾರೋಪದಲ್ಲಿ ಭಾಗವಹಿಸುವರು. ಸಿದ್ಧಗಂಗಾ ಶಾಲೆಯ ಮ್ಕಕಳಿಗೆ ಸಂವಿಧಾನ ಕುರಿತಂತೆ ಪದಪುಂಜಗಳನ್ನು ಪ್ರದರ್ಶಿಸುವರು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯಿಂದ ಕಲಾ ಪ್ರದರ್ಶನ, ಅಂಬೇಡ್ಕರ್ ಮತ್ತು ಸಂವಿಧಾನದ ಕುರಿತು ಗೀತ ನಮನ ನಡೆಯಲಿದೆ ಎಂದು ವಿವರಿಸಿದರು.
ನೋಡಲ್ ಅಧಿಕಾರಿ,ಸಬ್ ನೋಡಲ್ ಅಧಿಕಾರಿಗಳನ್ನು ನೇಮಿಸಲಾಗುತ್ತಿದೆ. ಕಾರ್ಯಕ್ರಮದ ಮೇಲ್ವಿಚಾರಣೆ ಸಂಬಂಧ ಜಿಲ್ಲಾಡಳಿತ ಭವನದ ಕೊಠಡಿ ಸಂಖ್ಯೆ 40ರಲ್ಲಿ ಸಹಾಯವಾಣಿ ತೆರೆಯಲಾಗಿದೆ ಎಂದು ಹೇಳಿದರು.
ಚೀಲೂರು, ಚೀಲೂರು ಕಡದಕಟ್ಟೆ, ಗೋವಿನಕೋವಿ, ಹರಲಹಳ್ಳಿ, ಮಾಸಡಿ, ಅರಕೆರೆ, ಕುಂಬಳೂರು, ಬೆಳ್ಳೂಡಿ, ಹನಗವಾಡಿ ಒಟ್ಟು 10 ಗ್ರಾಪಂ. 25 ಗ್ರಾಮಗಳು ಮತ್ತು ಮಲೇಬೆನ್ನೂರು ಪಪಂ, ಹರಿಹರ ನಗರಸಭೆ ವ್ಯಾಪ್ತಿಯಲ್ಲಿ ಈ ಕಾರ್ಯಕ್ರಮ ನಡೆಯಲಿದೆ ಎಂದು ತಿಳಿಸಿದರು.
* ಸ್ವಚ್ಛತೆ, ಸಸಿ ನೆಡುವ ಅಭಿಯಾನ
ಮಾನವ ಸರಪಳಿ ಜತೆಯಲ್ಲೇ ಸ್ವಚ್ಛತೆಯೇ ಸೇವೆ ಎಂಬ ಕಾರ್ಯಕ್ರಮದಡಿ ಸಾರ್ವಜನಿಕರು ಸುತ್ತಮುತ್ತಲಲ್ಲಿ ಪ್ಲಾಸ್ಟಿಕ್, ಮೆಟಲ್ ಇತರೆ ತ್ಯಾಜ್ಯವನ್ನು ಹಾಕದೇ ಪರಿಸರ ಸ್ವಚ್ಛ ಮಾಡಿಕೊಳ್ಳುವುದು ಮತ್ತು 10 ಸಾವಿರ ಸಸಿಗಳನ್ನು ನೆಡುವುದನ್ನೂ ಸಂಯೋಜಿಸಿಕೊಳ್ಳಲಾಗಿದೆ. ಹೊಸದಾಗಿ ನಿರ್ಮಿಸಲಾದ ಸಾರ್ವಜನಿಕ ಶೌಚಗೃಹಗಳನ್ನು ಇದೇ ವೇಳೆ ಉದ್ಘಾಟಿಸಲಾಗುವುದು ಎಂದು ಸಿಇಒ ಹೇಳಿದರು.
