ದಾವಣಗೆರೆ: ಆದಿಪೂಜಿತ ವಿನಾಯಕನ ಉತ್ಸವಕ್ಕೆ ದಾವಣಗೆರೆ ಜಿಲ್ಲೆ ಕಳೆಗಟ್ಟಿದೆ. ನಾನಾ ಕಡೆಗಳಲ್ಲಿ ಸಾರ್ವಜನಿಕ ಗಣೇಶ ಮೂರ್ತಿಗಳನ್ನು ನಾನಾ ಕಡೆಗಳಲ್ಲಿ ಪ್ರತಿಷ್ಠಾಪಿಸಲಾಗಿದೆ. ಪ್ರಮುಖ ವೃತ್ತ, ರಸ್ತೆ, ಗಲ್ಲಿ-ಗಲ್ಲಿಗಳಲ್ಲೂ ಶಾಮಿಯಾನಗಳು, ಭಗವಾಧ್ವಜ, ಕೇಸರಿ ಬಂಟಿಂಗ್ಸ್ಗಳು ರಾರಾಜಿಸುತ್ತಿವೆ.
ಜಿಲ್ಲೆಯ 2098 ಕಡೆಗಳಲ್ಲಿ ಸಾರ್ವಜನಿಕ ಮೂರ್ತಿಗಳನ್ನು ಕೂರಿಸಲಾಗಿದೆ. ದಾವಣಗೆರೆ ನಗರ ಒಂದರಲ್ಲೇ 568 ಸಂಘಟನೆಗಳು ಗಜಾನನನನ್ನು ಪ್ರತಿಷ್ಠಾಪಿಸಿವೆ. ಆಗಾಗ್ಗೆ ಸುರಿವ ಮಳೆಯ ನಡುವೆಯೂ ಸ್ಪರ್ಧೆಗೆ ಒಡ್ಡಿದವರಂತೆ ಯುವಕ ಮಂಡಳಿಗಳು ರೂಪಕ ಇತರೆ ರಸಮಂಜರಿ ಕಾರ್ಯಕ್ರಮಗಳ ಪ್ರದರ್ಶನ ನೀಡುತ್ತಿದ್ದು, ಯುವಕರಲ್ಲಿ ಹಬ್ಬದ ಜೋಷ್ ಇಮ್ಮಡಿಯಾಗಿದೆ.
ಮನೆ-ಮನೆಗಳಲ್ಲೂ ಬೆನಕನನ್ನು ಕೂರಿಸಿದ ಭಕ್ತರು ಉಪಾಸನೆ ಮಾಡುತ್ತಿದ್ದಾರೆ. ವಿದ್ಯುದಲಂಕಾರದೊಂದಿಗೆ ಕಂಗೊಳಿಸುತ್ತಿರುವ ಗಣೇಶನ ದೇಗುಲಗಳಲ್ಲೂ ವಿಶೇಷಾರಾಧನೆ ಜರುಗುತ್ತಿವೆ. ಶಾಂತಿ ಸುವ್ಯವಸ್ಥೆ ಕಾಪಾಡಲು ಎಲ್ಲೆಡೆ ಪೊಲೀಸ್ ಬಂದೋಬಸ್ತ್ ಮಾಡಲಾಗಿದೆ.
ಗಣೇಶ ಮೂರ್ತಿ ವಿಸರ್ಜನೆ ಹಿನ್ನೆಲೆಯಲ್ಲಿ ನಗರಪಾಲಿಕೆಯಿಂದ ಆಯ್ದ ಸ್ಥಳಗಳಲ್ಲಿ ಟ್ರಾೃಕ್ಟರ್ ನಿಲುಗಡೆಗೆ ತಾತ್ಕಾಲಿಕ ವ್ಯವಸ್ಥೆ ಮಾಡಲಾಗಿದೆ. ಮೆರವಣಿಗೆ ಮಾರ್ಗದಲ್ಲಿ ವಿದ್ಯುತ್ ಸಂಪರ್ಕ ತಪ್ಪಿಸುವತ್ತ ಬೆಸ್ಕಾಂ ಸಿಬ್ಬಂದಿ ಎಚ್ಚರ ವಹಿಸುತ್ತಿದ್ದಾರೆ. ಜಿಲ್ಲೆಯ 12 ಸೂಕ್ಷ್ಮ, 146 ಅತಿ ಸೂಕ್ಷ್ಮ ಪ್ರದೇಶದ ಗಣೇಶ ಮೂರ್ತಿಗಳತ್ತ ಪೊಲೀಸ್ ಇಲಾಖೆ ಕಟ್ಟೆಚ್ಚರ ವಹಿಸಿದೆ.
ಕಾಶಿ ವಿಶ್ವನಾಥ ದೇಗುಲ ಕಾರಿಡಾರ್ ಆಕರ್ಷಣೆ
ದಾವಣಗೆರೆಯ ಹೈಸ್ಕೂಲ್ ಮೈದಾನ ಈ ಬಾರಿಯೂ ಗಮನ ಸೆಳೆಯುತ್ತಿದೆ. ಕಾಶಿ ವಿಶ್ವನಾಥನ ದೇಗುಲ ಮಾದರಿಯ ಮಹಾಮಂಟಪದ ಕಾರಣಕ್ಕಾಗಿ. ಸಾರ್ವಜನಿಕ ಹಿಂದು ಮಹಾಗಣಪತಿ ಟ್ರಸ್ಟ್ನಿಂದ ಏಳನೇ ವರ್ಷದ ಅಂಗವಾಗಿ 100 ಅಡಿ ಉದ್ದ, 200 ಅಡಿ ಅಗಲ ಹಾಗೂ 20 ಅಡಿ ಎತ್ತರ ವಿಸ್ತೀರ್ಣದ ಈ ಭವ್ಯ ಮಂಟಪಕ್ಕೆ ಅಂತಿಮ ಹಂತದ ಟಚಪ್ ನಡೆಯುತ್ತಿದೆ.
ಕೊಲ್ಕತ್ತಾದ 25 ಮಂದಿ ಕಾರ್ಮಿಕರು ಈ ಮಂಟಪ ನಿರ್ಮಿಸಿದ್ದು ಶನಿವಾರ ಜಿಲ್ಲಾ ಉಸ್ತುವಾರಿ ಸಚಿವ ಎಸ್ಎಸ್.ಮಲ್ಲಿಕಾರ್ಜುನ್, ಸಂಸದೆ ಡಾ.ಪ್ರಭಾ ಮಲ್ಲಿಕಾರ್ಜುನ್ ಚಾಲನೆ ನೀಡಿದರು. ಮಂಟಪದ ಒಳಗೆ 16 ಅಡಿ ಎತ್ತರದ ಶಿವನ ಅವತಾರದ ಗಣೇಶನ ಮೂರ್ತಿ ವಿರಾಜಮಾನವಾಗಿದೆ. ನಿತ್ಯ ಸಂಜೆ ಭಗೀರಥ ಮಹರ್ಷಿಯ ರೂಪಕ ಪ್ರದರ್ಶನ ನಡೆಯಲಿದೆ. ಅ.5ರಂದು ಗಣೇಶ ವಿಸರ್ಜನೆ ನಡೆಯಲಿದೆ ಎಂದು ಆಯೋಜಕ ಗುರು ಜೊಳ್ಳಿ ತಿಳಿಸಿದರು.
* ಒಣದ್ರಾಕ್ಷಿಯಿಂದ ತಯಾರಾದ ವಿನಾಯಕ
ಹಿಂದು ಯುವಶಕ್ತಿ ಸಂಘ 33ನೇ ವರ್ಷದ ಆಚರಣೆ ಭಾಗವಾಗಿ ತೊಗಟವೀರ ಸಮುದಾಯ ಭವನದಲ್ಲಿ 51 ಕೆಜಿ ಒಣದ್ರಾಕ್ಷಿಗಳಿಂದ ನಿರ್ಮಿಸಿದ ಗಣೇಶ, ಜನರಿಗೆ ದರ್ಶನ ನೀಡುತ್ತಿದ್ದಾನೆ. ಕೊಲ್ಕತಾ ಕಲಾವಿದ ಸಂಜಿತ್ ಪಾಲ್ ನೇತೃತ್ವದಲ್ಲಿ ಸ್ಥಳೀಯ 12 ಮಂದಿ ಕಲಾವಿದರು ಮೂರ್ತಿಗೆ ರೂಪ ನೀಡಿದ್ದಾರೆ.
16 ಅಡಿ ಎತ್ತರ, 8 ಅಡಿ ಅಗಲ ವಿಸ್ತೀರ್ಣದ ಮೂರ್ತಿ ಇದಾಗಿದೆ. ಒಣದ್ರಾಕ್ಷಿ, ಮೂರ್ತಿ ಸಿದ್ಧತೆಗೆ ಸುಮಾರು 50 ಸಾವಿರ ರೂ.ಗೂ ಹೆಚ್ಚು ವೆಚ್ಚವಾಗಿದೆ. ಸೆ. 17ರಂದು ಜಾನಪದ ಕಲಾತಂಡಗಳ ಮೆರುಗಿನೊಂದಿಗೆ ಗಣೇಶನ ವಿಸರ್ಜನೆ ನಡೆಯಲಿದೆ ಎಂದು ಸಂಚಾಲಕ ಪಿ.ಸಿ. ಶ್ರೀನಿವಾಸ್ ತಿಳಿಸಿದರು.
ಮೂಷಿಕ ವಾಹನ ರೂಪಕ
ವಿನೋಬನಗರದ ಎರಡನೇ ಮುಖ್ಯರಸ್ತೆಯ ಶ್ರೀ ವೀರವರಸಿದ್ಧಿ ವಿನಾಯಕ ಸೇವಾ ಸಮಿತಿ ವತಿಯಿಂದ ಈ ಬಾರಿ ರೇಣುಕ ಯಲ್ಲಮ್ಮ ದೇವಿಯ ಕೆಳಗೆ ಗಣೇಶ ಪ್ರತಿಷ್ಠಾಪನೆಯಾಗಿದ್ದಾನೆ. ಮೂಷಿಕ ವಾಹನದ ವಿಶೇಷ ರೂಪಕ ನಿತ್ಯ ಸಂಜೆ ಪ್ರದರ್ಶನ ಕಾಣಲಿದೆ. ಸೆ. 15ರಂದು ವಿಶೇಷ ಮೆರವಣಿಗೆ ಮೂಲಕ ಬಾತಿ ಕೆರೆಯಲ್ಲಿ ಮೂರ್ತಿ ವಿಸರ್ಜನೆ ನಡೆಯಲಿದೆ.
* ರಾಂ ಆ್ಯಂಡ್ ಕೋ ಸಿದ್ಧಿವಿನಾಯಕ
ನಗರದ ಹರಳೆಣ್ಣೆ ಕೊಟ್ರಬಸಪ್ಪ ವೃತ್ತದಲ್ಲಿ ವರಸಿದ್ಧಿ ವಿನಾಯಕ ಸೇವಾ ಸಮಿತಿ, ರಾಮ್ ಆ್ಯಂಡ್ ಕೋ ಗೆಳೆಯರ ಬಳಗದ ಸಹಯೋಗದಲ್ಲಿ 32ನೇ ವರ್ಷದ ಗಣೇಶೋತ್ಸವ ಆಚರಿಸಲಾಗುತ್ತಿದೆ. ಬೆಳಗಾವಿಯಿಂದ ತರಿಸಲಾದ ಏಳು ಅಡಿ ಎತ್ತರದ ಗಣೇಶನ ಜತೆಗೆ ನಿತ್ಯ ಸಂಜೆ 7ರಿಂದ ಪಾಂಡುರಂಗ ವಿಠ್ಠಲನ ರೂಪಕ ಪ್ರದರ್ಶಿತವಾಗಲಿದೆ. ಸೆ. 17ರಂದು ಗಣೇಶ ವಿಸರ್ಜನೆಯಾಗಲಿದೆ ಎಂದು ಅಧ್ಯಕ್ಷ ನಾಗೇಂದ್ರ ರೆಡ್ಡಿ ತಿಳಿಸಿದರು.
