ಕೇಳೋರು ಯಾರು? ಸರ್ಕಾರಿ ಶಾಲೆ ಗೋಳು school

ಜಗಳೂರು ಗೊಲ್ಲರಹಟ್ಟಿ ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠ ಶಾಲೆ ಶಿಥಿಲಗೊಂಡಿರುವುದು. school

Published on:

14 Jun 2026, 11:28 am

ಪ್ರಮುಖ ಮುಖ್ಯಾಂಶಗಳು

ಜಗಳೂರು ಗೊಲ್ಲರಹಟ್ಟಿ ಸ್ಕೂಲ್‌ನ ಎರಡೇ ಕೊಠಡಿಗಳಲ್ಲಿ 115 ಮಕ್ಕಳಿಗೆ ಪಾಠ
ಮೂಲಸೌಲಭ್ಯ ಕೊರತೆಗೆ ಪಾಲಕರ ಬೇಸರ

ಲೋಕೇಶ್ ಎಂ. ಐಹೊಳೆ, ಜಗಳೂರು

ಹೊಸ ಶೈಕ್ಷಣಿಕ ವರ್ಷ ಪ್ರಾರಂಭವಾಗಿದೆ. ಮಕ್ಕಳು ರಜೆ ಮುಗಿಸಿ ಶಾಲೆಗಳತ್ತ ಮುಖ ಮಾಡಿದ್ದಾರೆ. ಹೊಸ ದಾಖಲಾತಿಗಳು ನಡೆಯುತ್ತಿವೆ. ಮೂಲ ಸೌಲಭ್ಯದ ಕೊರತೆಯಿಂದ ಬಳಲುತ್ತಿರುವ ಜಗಳೂರು ಗೊಲ್ಲರಹಟ್ಟಿ ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠ ಶಾಲೆ ಮಾತ್ರ ಸುಧಾರಣೆಯ ಹಳಿಗೆ ಹೊರಳಿಲ್ಲ. school

ಸೋರುತ್ತಿರುವ ಕೊಠಡಿ, ಶೌಚಗೃಹಕ್ಕೆ ಪರದಾಟ, ಬಿಸಿಯೂಟ ತಯಾರಿಕೆಗೆ ಕೊಠಡಿಗಳ ಕೊರತೆ ಶುದ್ಧ ಕುಡಿಯುವ ನೀರಿನ ಅಭಾವ, ಭಯದಲ್ಲಿ ಕುಳಿತು ಪಾಠ ಕೇಳುವ ಮಕ್ಕಳ ಸ್ಥಿತಿ. ಇವು ಜಗಳೂರಿನಿಂದ ಕೂಗಳತೆ ದೂರದಲ್ಲಿರುವ ಗೊಲ್ಲರಹಟ್ಟಿ ಶಾಲೆಯ ದುಸ್ಥಿತಿಗೆ ಹಿಡಿದ ಕೈ ಗನ್ನಡಿ.

ಹನುಮಂತಾಪುರ ಗ್ರಾಪಂ ವ್ಯಾಪ್ತಿಗೆ ಒಳ ಪಟ್ಟಿರುವ ಈ ಊರು ತಾಲೂಕು ಕೇಂದ್ರಕ್ಕೂ ಸಮೀಪದಲ್ಲಿದೆ. ಆದರೆ ಸೌಕರ್ಯದ ದೃಷ್ಟಿಯಿಂದ ಹಿಂದುಳಿದಿದೆ. ಪರಿಶಿಷ್ಟರು ಹಾಗೂ ಹಿಂದುಳಿದವರೇ ಹೆಚ್ಚಿದ್ದು ನಾಲ್ಕು ಸಾವಿರಕ್ಕೂ ಹೆಚ್ಚು ಜನಸಂಖ್ಯೆ ಹೊಂದಿದೆ.

ಇಲ್ಲಿರುವ ಬಹುಪಾಲು ಜನರು ಶ್ರಮಿಕ ವರ್ಗಕ್ಕೆ ಸೇರಿದವರು. ಆಟೋಚಾಲಕರು, ತರಗಾರರು, ಕಾರು ಚಾಲಕರು, ಕಲ್ಲು ಒಡೆಯುವವರು, ಮನೆ ಕಟ್ಟುವವರು, ಕೂಲಿ ಕಾರ್ಮಿಕರಿದ್ದು ಇವರ ಮಕ್ಕಳ ಶೈಕ್ಷಣಿಕ ಪ್ರಗತಿಗೆ ಸರ್ಕಾರಿ ಶಾಲೆಯೇ ಆಧಾರವಾಗಿದೆ.

ಈ ಹಿಂದೆ 1-7ನೇ ತರಗತಿಗೆ 200ಮಕ್ಕಳ ದಾಖಲಾತಿ ಹೊಂದಿದ್ದ ಈ ಶಾಲೆಗೆ ಮೂಲ ಸೌಕರ್ಯಗಳ ಕೊರತೆ ಎದುರಾಗುತ್ತಿದ್ದಂತೆ ಹಾಗೂ ಪಾಲಕರ ಖಾಸಗಿ ಶಾಲಾ ವ್ಯಾಮೋಹ ಹೆಚ್ಚುತ್ತಿದ್ದಂತೆ ದಾಖಲಾತಿ ಪ್ರಮಾಣ ಕುಸಿಯ ತೊಡಗಿತು. ಪ್ರಸಕ್ತ ಸಾಲಿನಲ್ಲಿ 115 ವಿದ್ಯಾರ್ಥಿಗಳು ಇಲ್ಲಿ ಅಭ್ಯಾಸ ಮಾಡುತ್ತಿದ್ದು. ಒಂದೆಡೆ ಕೂರಿಸಿ ಪಾಠ ಹೇಳಲು ಸುಸಜ್ಜಿತ ಕೊಠಡಿಗಳಿಲ್ಲ.

ಹೇಳಿಕೊಳ್ಳೋಕೆ 9 ಕೊಠಡಿಗಳಿವೆ. ಆದರೆ, 4 ಮಾತ್ರ ಯೋಗ್ಯವಾಗಿವೆ. ಉಳಿದ 5 ದುರಸ್ತಿ ಯಲ್ಲಿವೆ. ಹೆಂಚು ಒಡೆದಿವೆ, ಗೋಡೆಗಳು ಬಿರುಕು ಬಿಟ್ಟಿವೆ, ಕಿಟಕಿ, ಬಾಗಿಲು ಹಾಳಾಗಿವೆ. ನೆಲ ಕಿತ್ತು ಮಣ್ಣು ಎದ್ದಿದೆ. ಯಾವ ಕ್ಷಣದಲ್ಲಾದರೂ ಬೀಳಬಹುದಾದ ಸ್ಥಿತಿ ಇದೆ.

ಪಾಲಕರು ಮಕ್ಕಳನ್ನು ಕಳುಹಿಸಲು ಹೆದರಿ ಬೇರೆ ಶಾಲೆಗಳಿಗೆ ದಾಖಲಿಸುತ್ತಿದ್ದಾರೆ. ಇಲ್ಲಿರುವ 4 ಕೊಠಡಿಗಳ ಪೈಕಿ ಎರಡು ಕೊಠಡಿಗಳಲ್ಲಿ 115 ಮಕ್ಕಳನ್ನು ಸೇರಿಸಿ ಪಾಠ ಮಾಡಲಾಗುತ್ತಿದೆ. ಹೀಗಾದಲ್ಲಿ ಗುಣಮಟ್ಟದ ಶಿಕ್ಷಣ ಹೇಗೆ ದೊರೆಯುತ್ತದೆ ಎಂಬುದು ಗ್ರಾಮಸ್ಥರ ಪ್ರಶ್ನೆ.

ವಿದ್ಯಾರ್ಥಿನಿಯರಿಗಿಲ್ಲ ಶೌಚಗೃಹ: ಈ ಶಾಲೆಯಲ್ಲಿ 55 ವಿದ್ಯಾರ್ಥಿನಿಯರು, 60 ವಿದ್ಯಾರ್ಥಿಗಳಿದ್ದು ಸುಸಜ್ಜಿತ ಶೌಚಗೃಹವಿಲ್ಲ. ಮುರಿದುಬಿದ್ದಿರುವ ಕೊಠಡಿಯಲ್ಲೇ ಶೌಚಗೃಹವನ್ನಾಗಿ ಬಳಸಲಾಗುತ್ತಿದೆ. ಈ ಸ್ಥಿತಿಯಿಂದ ವಿದ್ಯಾರ್ಥಿನಿಯರಿಗೆ ತೊಂದರೆಯಾಗುತ್ತಿದ್ದು ಶಿಕ್ಷಣ ಇಲಾಖೆ ಕಣ್ಣು ಮುಚ್ಚಿ ಕುಳಿತಿರುವುದಕ್ಕೆ ಪಾಲಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಶಿಕ್ಷಕರ ನೇಮಕಕ್ಕೆ ಆಗ್ರಹ: 115 ವಿದ್ಯಾರ್ಥಿಗಳಿಗೆ 6 ಶಿಕ್ಷಕರು ಅಗತ್ಯವಿದೆ. 4 ಜನ ಶಿಕ್ಷಕರಿದ್ದು, ಮಕ್ಕಳನ್ನು ನಿಯಂತ್ರಿಸುವುದು ಕಷ್ಟವಾಗಿದೆ. ಇತ್ತೀಚೆಗೆ 2 ಶಿಕ್ಷಕರು ವಯೋ ನಿವೃತ್ತರಾಗಿದ್ದು 2 ಶಿಕ್ಷಕರ ಹುದ್ದೆ ಖಾಲಿಯಾಗಿವೆ. ತಕ್ಷಣ ಶಿಕ್ಷಕರ ನೇಮಕಾತಿಗೆ ಕ್ರಮ ಕೈಗೊಳ್ಳಬೇಕು. ತಾತ್ಕಾಲಿಕ ಅತಿಥಿ ಶಿಕ್ಷಕರನ್ನಾದರೂ ನೇಮಕ ಮಾಡಿಕೊಂಡು ಮಕ್ಕಳ ಕಲಿಕೆಗೆ ಸಹಕರಿಸಬೇಕು ಎಂದು ಗ್ರಾಮಸ್ಥರಾದ ಬಿ. ಬೋರಪ್ಪ, ರಘು ಮನವಿ ಮಾಡಿದ್ದಾರೆ.

ಪೂರೈಕೆಯಾದ ಕುಡಿಯುವ ನೀರು: ನೂರಕ್ಕೂ ಹೆಚ್ಚಿನ ವಿದ್ಯಾರ್ಥಿಗಳಿರುವ ಶಾಲೆಯಲ್ಲಿ ಕುಡಿಯುವ ನೀರಿಲ್ಲ. ಬಿಸಿಯೂಟ ತಯಾರಿಸಲು ಸಹ ಬೇರೆಡೆಯಿಂದ ನೀರು ತರುವ ಪರಿಸ್ಥಿತಿ ಇದೆ. ಶಾಸಕರ ಅನುದಾನದಡಿ ಹೊಸ ಆರ್‌ಒ ಘಟಕ ನೀಡಲಾಗಿದೆ. ಆದರೆ, ನೀರಿನ ಪೂರೈಕೆ ಇಲ್ಲದೆ ಮೂಲೆ ಸೇರಿ ತುಕ್ಕು ಹಿಡಿಯುತ್ತಿದೆ. ಪ್ರತಿ ದಿನ ಖಾಸಗಿ ವಾಹನದಲ್ಲಿ ಬರುವ ಶುದ್ಧ ನೀರನ್ನೇ ಖರೀದಿ ಮಾಡುವಂತಾಗಿದೆ.

ಈಗಾಗಲೇ ಹೊಸ ಕೊಠಡಿಗಳಿಗೆ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಶೌಚಗೃಹ, ಕಾಂಪೌಂಡ್, ಕುಡಿಯುವ ನೀರು ಸೇರಿ ಮೂಲಸೌಕರ್ಯ ಒದಗಿಸಲು ಗ್ರಾಪಂಗೆ ಅಧಿಕಾರ ನೀಡಲಾಗಿದೆ. ಈ ಕುರಿತು ಇಒ ಗಮನಕ್ಕೆ ತರಲಾಗುವುದು.

ಸರ್ಕಾರಿ ಶಾಲೆಗಳನ್ನು ಉಳಿಸಿ, ಬೆಳೆಸಿ ಎಂದು ಬಾಯಿ ಮಾತಲ್ಲಿ ಹೇಳುವ ಬದಲು ಅಧಿಕಾರಿಗಳು, ಜನಪ್ರತಿನಿಧಿಗಳು ಕ್ರಿಯೆಗಳ ಮೂಲಕ ತೋರಿಸಬೇಕು. ಸಂಕಷ್ಟದಲ್ಲಿರುವ ಶಾಲೆಗಳಿಗೆ ಮೂಲ ಸೌಕರ್ಯ ಕಲ್ಪಿಸಲು ಸಾಧ್ಯವಾದರೆ ಖಾಸಗಿ ಶಾಲೆಗಳಿಗಿಂತ ಗುಣಮಟ್ಟದ ಶಿಕ್ಷಣ ಕೊಡುತ್ತವೆ.

ಸಮಸ್ಯೆ