ಅಡಕೆ ನಾಡಿಗೆ ನೀರಿನ ಬರ!

ಕಂಚಿಗನಾಳು ಗ್ರಾಮದಲ್ಲಿ ಟ್ಯಾಂಕರ್ ಮೂಲಕ ನೀರು ಖರೀದಿಸಿ ಅಡಕೆ ತೋಟದ ತೊಟ್ಟಿಗಳಿಗೆ ತುಂಬಿಸುತ್ತಿರುವುದು.Adake

Published on:

14 Mar 2026, 9:33 am

ಪ್ರಮುಖ ಮುಖ್ಯಾಂಶಗಳು

1500 ಅಡಿಗೂ ಸಿಗದ ನೀರು
ಬತ್ತಿದ ಕೆರೆ, ಕುಸಿದ ಅಂತರ್ಜಲ
ತೋಟ ಉಳಿಸಿಕೊಳ್ಳಲು ಟ್ಯಾಂಕರ್ ನೀರಿಗಾಗಿ ಲಕ್ಷಾಂತರ ರೂ. ವ್ಯಯ

ಟಿ.ಎನ್. ಜಗದೀಶ್ ಚನ್ನಗಿರಿ

ಬೇಸಿಗೆಯ ಆರಂಭದಲ್ಲೇ ಬಿಸಿಲಿನ ತಾಪ ಏರುತ್ತಿದ್ದು, ತಾಲೂಕಿನ ಅಡಕೆ ಬೆಳೆಗಾರರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಅಂತರ್ಜಲ ಮಟ್ಟ ಪಾತಾಳಕ್ಕೆ ಕುಸಿದಿದ್ದು, ಕೊಳವೆಬಾವಿಗಳು ಬತ್ತಿ ಹೋಗುತ್ತಿರುವುದರಿಂದ ಕೋಟಿಗಟ್ಟಲೆ ಮೌಲ್ಯದ ಅಡಕೆ ತೋಟಗಳನ್ನು ಉಳಿಸಿಕೊಳ್ಳಲು ರೈತರು ಟ್ಯಾಂಕರ್ ಮೂಲಕ ನೀರು ಖರೀದಿಸುವ ಅನಿವಾರ್ಯತೆಗೆ ಸಿಲುಕಿದ್ದಾರೆ.

ಒಂದು ಕಾಲದಲ್ಲಿ ರಾಗಿ, ಹತ್ತಿ, ಜೋಳಕ್ಕೆ ಹೆಸರಾಗಿದ್ದ ಚನ್ನಗಿರಿ ತಾಲೂಕು ಈಗ ಅಡಕೆ ನಾಡಾಗಿ ಪರಿವರ್ತನೆಯಾಗಿದೆ. 2026ರ ಅಂಕಿಅಂಶಗಳ ಪ್ರಕಾರ ಸುಮಾರು 37,864 ಹೆಕ್ಟೇರ್ ಪ್ರದೇಶದಲ್ಲಿ ಅಡಕೆ ಬೆಳೆಯಲಾಗುತ್ತಿದೆ. 2025ರಲ್ಲಿ ವಾಡಿಕೆಗಿಂತ 13% ಹೆಚ್ಚು ಮಳೆಯಾಗಿದ್ದರೂ (948 ಮಿ.ಮೀ), ಬೇಸಿಗೆಯ ಆರಂಭದಲ್ಲೇ ತಾಲೂಕಿನ 165 ಕೆರೆಗಳ ಪೈಕಿ ಅರ್ಧಕ್ಕಿಂತ ಹೆಚ್ಚು ಕೆರೆಗಳು ಬತ್ತಿ ಹೋಗಿರುವುದು ಆತಂಕ ಮೂಡಿಸಿದೆ.

ಟ್ಯಾಂಕರ್ ಮೊರೆ ಹೋದ ರೈತ: ತಿಪ್ಪಗೊಂಡನಹಳ್ಳಿ, ವಡ್ನಾಳ್, ಕಂಚಿಗನಾಳ್, ಹರಳಘಟ್ಟ, ಶೆಟ್ಟಿಹಳ್ಳಿ, ಮಾದಾಪು, ಬೆಟ್ಟಕಡೂರು, ಉಬ್ರಾಣಿ ಸೇರಿ ತಾಲೂಕಿನಾದ್ಯಂತ ಸುಮಾರು 2,500 ಎಕರೆ ಅಡಕೆ ತೋಟಗಳಿಗೆ ಲಾರಿಗಳ ಮೂಲಕ ನೀರು ಪೂರೈಸಲಾಗುತ್ತಿದೆ.

ಪ್ರತಿ ಲಾರಿ ನೀರಿಗೆ 6,000 ರೂ. ಹಾಗೂ ಟ್ರ್ಯಾಕ್ಟರ್ ಟ್ಯಾಂಕರ್ ನೀರಿಗೆ 1,000 ರೂ. ಬಾಡಿಗೆ ನೀಡಲಾಗುತ್ತಿದೆ. ನಲ್ಲೂರು ಹಾಗೂ ಸಿದ್ದಾಪುರ ಭದ್ರಾನಾಲೆಯಿಂದ ನೀರು ತರಲಾಗುತ್ತಿದೆ. ಆರ್ಥಿಕ ಚೈತನ್ಯವಿರುವ ರೈತರು ಸ್ವಂತ ಟ್ಯಾಂಕರ್‌ಗಳನ್ನು ಖರೀದಿಸುತ್ತಿದ್ದರೆ, ಸಣ್ಣ ರೈತರು ಸಾಲ ಮಾಡಿ ನೀರು ಖರೀದಿಸುತ್ತಿದ್ದಾರೆ. ಜತೆಗೆ ದಾವಣಗೆರೆ, ಚಿತ್ರದುರ್ಗ ಕಡೆಗಳಿಂದ ಲಾರಿ ಮತ್ತು ಟ್ರಾಕ್ಟರ್ ಟ್ಯಾಂಕುಗಳು ತಾಲೂಕಿನ ಗ್ರಾಮಗಳಿಗೆ ಬರಲು ಆರಂಭಿಸಿದೆ. ಅಂತರ್ಜಲ ಕುಸಿತದಿಂದಾಗಿ 1,500 ಅಡಿ ಆಳದವರೆಗೆ ಕೊರೆದರೂ ನೀರು ಸಿಗುತ್ತಿಲ್ಲ. ತಾಲೂಕಿನಲ್ಲಿ ಪ್ರತಿದಿನ ಸರಾಸರಿ 50 ರಿಂದ 75 ಹೊಸ ಕೊಳವೆಬಾವಿಗಳನ್ನು ಕೊರೆಯ ಲಾಗುತ್ತಿದೆ. ಪ್ರತಿ ಎಕರೆಗೆ 4-5 ಕೊಳವೆಬಾವಿಗಳಿ ರುವುದು ಕೂಡ ಅಂತರ್ಜಲ ಮರು ಪೂರಣಕ್ಕೆ ಅಡ್ಡಿಯಾಗಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ವಿದ್ಯುತ್ ಕಣ್ಣಾಮುಚ್ಚಾಲೆ

ನೀರಿನ ಸಮಸ್ಯೆಯ ನಡುವೆ ವಿದ್ಯುತ್ ಸಮಸ್ಯೆ ರೈತರನ್ನು ಮತ್ತಷ್ಟು ಕಾಡುತ್ತಿದೆ. ದಿನಕ್ಕೆ ಕೇವಲ 5 ಗಂಟೆ (ಹಗಲು 2, ರಾತ್ರಿ 3) ವಿದ್ಯುತ್ ನೀಡಲಾಗುತ್ತಿದ್ದು, ಕಡಿಮೆ ವೋಲ್ಟೇಜ್‌ನಿಂದಾಗಿ ಪಂಪ್‌ಸೆಟ್‌ಗಳು ಸರಿಯಾಗಿ ಕಾರ್ಯನಿರ್ವಹಿಸುತ್ತಿಲ್ಲ. ಈ ಬಗ್ಗೆ ಅಧಿಕಾರಿಗಳಿಗೆ ದೂರು ನೀಡಿದರೂ ಸ್ಪಂದನೆ ಸಿಗುತ್ತಿಲ್ಲ ಎಂಬುದು ರೈತರ ಅಳಲು.

ಪ್ರತಿವರ್ಷ ತಾಲೂಕಿನಲ್ಲಿ ಶೇ.15ರಷ್ಟು ಕೊಳವೆಬಾವಿಗಳನ್ನು ಕೊರೆಸುತ್ತಿರುವುದರಿಂದ ನೀರಿನ ಅಂತರ್ಜಲ ಮಟ್ಟ ಕುಸಿದಿದೆ. ಜತೆಗೆ ಕೆರೆಗಳಲ್ಲಿ ನೀರು ಬತ್ತುತ್ತಿರುವುದು ಪರಿಸ್ಥಿತಿಯನ್ನು ಗಂಭೀರಗೊಳಿಸಿದೆ.

ಇರುವ ಜಮೀನಿನಲ್ಲಿ ಅಡಕೆ ತೋಟವನ್ನೇ ನಂಬಿಕೊಂಡಿದ್ದೇವೆ. ಈಗ ಮರಗಳನ್ನು ಉಳಿಸಿಕೊಂಡರೆ ಸಾಕು ಎನ್ನುವ ಸ್ಥಿತಿ ಇದೆ. ಪ್ರತಿದಿನ 3-4 ಟ್ರ್ಯಾಕ್ಟರ್ ನೀರು ಖರೀದಿಸುತ್ತಿದ್ದೇವೆ. ಸಾಲ ಮಾಡಿ ತೋಟಕ್ಕೆ ನೀರುಣಿಸುತ್ತಿದ್ದೇವೆ.

ರೈತರು ತೋಟ ಉಳಿಸಿಕೊಳ್ಳಲು ಟ್ಯಾಂಕರ್ ಮೊರೆ ಹೋಗಿದ್ದಾರೆ. ಮಳೆ ಬಾರದೆ ಇದ್ದರೆ ಮಾರ್ಚ್ ಮತ್ತು ಏಪ್ರಿಲ್ ತಿಂಗಳಲ್ಲಿ ಸಮಸ್ಯೆ ಇನ್ನಷ್ಟು ಉಲ್ಬಣಿಸಲಿದೆ.

ನೀರು