ಚುನಾವಣಾ ಉಸ್ತುವಾರಿ ಸಮಿತಿ ಸಭೆಯಲ್ಲಿ ಗದ್ದಲ

ಕೆಪಿಸಿಸಿ ಕಾರ್ಯಾಧ್ಯಕ್ಷ, ಸಮಿತಿ ಸಂಚಾಲಕ ಮಂಜುನಾಥ್ ಭಂಡಾರಿ ಹಾಗೂ ಸದಸ್ಯರಾದ ಎಚ್.ಎಂ. ರೇವಣ್ಣ ಮತ್ತು ಎಚ್. ಆಂಜನೇಯ ಅವರು ಅಭ್ಯರ್ಥಿಯ ಆಯ್ಕೆ ಕುರಿತು ಕಾರ್ಯಕರ್ತರ ಅಭಿಪ್ರಾಯ ಕೇಳಲು ಬಂದಿದ್ದರು.

ಸಮಿತಿಯವರು ಕಚೇರಿಯ ಒಳಗೆ ಮೌಖಿಕವಾಗಿ ಮತ್ತು ಲಿಖಿತವಾಗಿ ಅಭಿಪ್ರಾಯಗಳನ್ನು ಪಡೆಯುತ್ತಿದ್ದ ವೇಳೆ ಅಲ್ಪಸಂಖ್ಯಾತರ ಗುಂಪು ಅಹಿಂದ ವರ್ಗಕ್ಕೆ ಟಿಕೆಟ್ ನೀಡುವಂತೆ ಘೋಷಣೆ ಕೂಗಿತು. ಮತ್ತೊಂದು ಗುಂಪಿನವರು ಶಾಮನೂರು ಕುಟುಂಬದವರಿಗೇ ನೀಡಬೇಕು, ಸಮರ್ಥ್ ಶಾಮನೂರು ಅಭ್ಯರ್ಥಿಯಾಗಬೇಕು ಎಂದು ಒತ್ತಾಯಿಸಿದರು.

ನಂತರ ಕಚೇರಿಯ ಒಳಗೆ ಎರಡೂ ಗುಂಪಿನವರು ಸೇರಿದಾಗ ಗದ್ದಲಕ್ಕೆ ಕಾರಣವಾಯಿತು. ತಳ್ಳಾಟ, ನೂಕಾಟ ನಡೆಯಿತು. ಸಮಿತಿಯವರು ಅಭಿಪ್ರಾಯ ಕೇಳಲು ಆಗದಷ್ಟು ಗದ್ದಲ ಉಂಟಾಯಿತು. ಈ ನಡುವೆ ಕೆಲವರು ಟೇಬಲ್ ಗುದ್ದಿ ಆಕ್ರೋಶ ಹೊರ ಹಾಕಿದರು.

ಈ ಎಲ್ಲ ಬೆಳವಣಿಗೆಗಳನ್ನು ನೋಡಿದ ಸಮಿತಿ ಸದಸ್ಯರು ಅಭಿಪ್ರಾಯ ಪಡೆಯುವ ಪ್ರಕ್ರಿಯೆ ಮುಂದುವರಿಸುವುದು ಕಷ್ಟವಾಗಿ ಕಚೇರಿಯಿಂದ ಹೊರ ಬಂದರು. ಹೊರ ಆವರಣದಲ್ಲಿ ವ್ಯವಸ್ಥೆ ಮಾಡಲಾಗಿದ್ದ ವೇದಿಕೆಗೆ ಬಂದ ಸಮಿತಿಯ ಮುಖಂಡರು ಗದ್ದಲದ ಬಗ್ಗೆ ಅಸಮಾಧಾನ ಹೊರ ಹಾಕಿದರು.

ಮಂಜುನಾಥ ಭಂಡಾರಿ ಮಾತನಾಡಿ, ‘ನಿಮ್ಮ ವರ್ತನೆಯಿಂದ ವಿಪಕ್ಷದವರ ಮಾತುಗಳಿಗೆ ಆಹಾರವಾಗಬೇಡಿ. ಶಿಸ್ತು ಪಾಲಿಸಿ. ನಿಮ್ಮ ಅಭಿಪ್ರಾಯ ಏನೇ ಇದ್ದರೂ ಅದನ್ನು ನಾವು ವರಿಷ್ಠರಿಗೆ ತಲುಪಿಸುತ್ತೇವೆ’ ಎಂದರು.

ಕಚೇರಿಯೊಳಗೆ ನಡೆದ ಗದ್ದಲ, ಕೂಗಾಟದಿಂದ ಬೇಸರಗೊಂಡಿದ್ದ ಎಚ್.ಎಂ. ರೇವಣ್ಣ ಒಂದು ಹಂತದಲ್ಲಿ ಕಾರ್ಯಕರ್ತರ ಮೇಲೆ ರೇಗಿದರು. ಒಳಗೆ ಬಂದು ನಿಮ್ಮ ಅಭಿಪ್ರಾಯ ಹೇಳಲು ಅವಕಾಶ ನೀಡಲಾಗಿತ್ತು, ಗಲಾಟೆ ಮಾಡಿದ್ದು ಸರಿಯಲ್ಲ ಎಂದು ಹೇಳಿದರು. ಎಚ್. ಆಂಜನೇಯ ಜತೆಗಿದ್ದರು.

ಕಾರ್ಯಕರ್ತರ ಅಭಿಪ್ರಾಯ ಪಡೆಯುವುದಕ್ಕೆ ಮೊದಲು ಔಪಚಾರಿಕವಾಗಿ ನಡೆದ ವೇದಿಕೆ ಕಾರ್ಯಕ್ರಮದಲ್ಲಿ ಮಂಜುನಾಥ ಭಂಡಾರಿ, ಎಚ್.ಎಂ. ರೇವಣ್ಣ, ಎಚ್. ಆಂಜನೇಯ ಮಾತನಾಡಿ, ದಾವಣಗೆರೆ ದಕ್ಷಿಣ ಕ್ಷೇತ್ರವನ್ನು ಕಾಂಗ್ರೆಸ್ ಉಳಿಸಿಕೊಳ್ಳಬೇಕು. ಅದಕ್ಕಾಗಿ ನಾವೆಲ್ಲ ಒಗ್ಗಟ್ಟು ಪ್ರದರ್ಶಿಸಬೇಕು ಎಂಬ ಸಂದೇಶ ನೀಡಿದರು.

ಜಿಲ್ಲಾ ಉಸ್ತುವಾರಿ ಸಚಿವ ಎಸ್.ಎಸ್. ಮಲ್ಲಿಕಾರ್ಜುನ್ ಮಾತನಾಡಿ, ಕಾಂಗ್ರೆಸ್ ಪಕ್ಷವೇ ಒಂದು ಸಮಾಜ. ಇದರಲ್ಲಿ ಆ ಜಾತಿ, ಈ ಜಾತಿ ಎಂಬುದಿಲ್ಲ. ಒಟ್ಟಿನಲ್ಲಿ ಗೆಲ್ಲುವ ಅಭ್ಯರ್ಥಿಯನ್ನು ಕಣಕ್ಕಿಳಿಸಬೇಕು. ಪಕ್ಷಕ್ಕಾಗಿ ಯಾರು ದುಡಿದಿದ್ದಾರೆ, ನಿಷ್ಠಾವಂತರು ಯಾರು ಎಂಬುದನ್ನು ಸಮಿತಿ ಪರಿಗಣಿಸಲಿ. ಎಲ್ಲರೂ ಚರ್ಚಿಸಿ, ಒಗ್ಗಟ್ಟಿನಿಂದ ನಗು ನಗುತ್ತ ಈ ಚುನಾವಣೆ ಮಾಡೋಣ ಎಂದರು.

ವಸತಿ ಸಚಿವ ಜಮೀರ್ ಅಹಮದ್ ಮತ್ತು ನಾನು ಸ್ನೇಹಿತರು. ಆತ್ಮೀಯತೆಯಿಂದ ಮಾತನಾಡಿದ್ದನ್ನು ತಪ್ಪಾಗಿ ಅರ್ಥೈಸಬಾರದು. ಕೆಲವರು ಇದರಿಂದಲೇ ತಮ್ಮ ಬೇಳೆ ಕಾಳು ಬೇಯಿಸಿಕೊಳ್ಳಲು ಪ್ರಯತ್ನಿಸುತ್ತಾರೆ ಎಂದು ಹೇಳಿದರು.