ಶನಿವಾರದಿಂದ ಪಾರಂಪರಿಕ ಬೀಜೋತ್ಸವ

ವ್ಯವಸಾಯದ ಜೀವಾಳವಾದ ಬೀಜ ವೈವಿಧ್ಯಕ್ಕೆ ಧಕ್ಕೆ ಬಂದಿದೆ. ಇಂದು ಎದುರಾಗಿರುವ ಕೃಷಿ ಬಿಕ್ಕಟ್ಟನ್ನು ಎದುರಿಸಲು ಸಾಂಪ್ರದಾಯಿಕ ತಳಿಗಳಿಗೆ ಆದ್ಯತೆ ನೀಡಬೇಕಿದೆ. ಪಾರಂಪರಿಕ ಬೀಜ ವೈವಿಧ್ಯದ ಮಹತ್ವದ ಬಗ್ಗೆ ಅರಿವು ಮೂಡಿಸುವ ಉದ್ದೇಶದಿಂದ ಈ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಪಂಡರಾಪುರ ಹತ್ತಿ, ಬ್ಯಾಡಗಿ ಕಡ್ಡಿ ಮೆಣಸು, ಹಾಲುಬ್ಬಲು, ಜೇನುಗೂಡು ರಾಗಿ, ಮರ ಸಜ್ಜೆಯಂಥ ನೂರಾರು ತಳಿಗಳು ನಾಶದ ಅಂಚಿನಲ್ಲಿವೆ. ಸ್ಥಳೀಯ ವಾತಾವರಣಕ್ಕೆ ಹೊಂದಿಕೊಳ್ಳುವ, ಮಳೆ ವೈಪರೀತ್ಯ ಎದುರಿಸಿ ನಿಲ್ಲುವ ದೇಸಿ ತಳಿಗಳನ್ನು ಉಳಿಸಿ, ಬೆಳೆಸುವ ಅಗತ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಎರಡು ದಿನದ ಬೀಜ ಉತ್ಸವದಲ್ಲಿ ದೇಶದ ವಿವಿಧ ಭಾಗಗಳಿಂದ 30ಕ್ಕೂ ಹೆಚ್ಚಿನ ಬೀಜ ಸಂರಕ್ಷಕರ ಗುಂಪುಗಳು ಪಾಲ್ಗೊಳ್ಳಲಿವೆ.

ದೇಸಿ ಧಾನ್ಯ, ತರಕಾರಿ, ಕಾಳು, ಗೆಡ್ಡೆ ಗೆಣಸು, ಸೊಪ್ಪು ಮತ್ತು ಹಣ್ಣಿನ ಸುಮಾರು 1 ಸಾವಿರ ತಳಿಗಳ ಬಿತ್ತನೆ ಬೀಜಗಳು ಇಲ್ಲಿ ಪ್ರದರ್ಶಿತವಾಗಲಿವೆ. ಗುಣಮಟ್ಟದ ಭತ್ತ, ಸಿರಿಧಾನ್ಯ ಮತ್ತು ತರಕಾರಿ ಬೀಜಗಳು, ಹಣ್ಣಿನ ಗಿಡಗಳು ಹಾಗೂ ರೈತ ವಿಜ್ಞಾನಿಗಳು ಅಭಿವೃದ್ಧಿಪಡಿಸಿದ ಭತ್ತದ ತಳಿಗಳ ಮಾರಾಟಕ್ಕೆ ವ್ಯವಸ್ಥೆ ಕಲ್ಪಿಸಲಾಗಿದೆ ಎಂದರು.

ಯುಎನ್‌ಡಿಪಿ ಇಕ್ರೇಟರ್ ಪ್ರಶಸ್ತಿ ಪುರಸ್ಕೃತ, ಧಾರವಾಡದ ಬೀಜಮಾತೆ ಬೀಬಿ ಜಾನ್ ಮೇ 9ರಂದು ಬೆಳಗ್ಗೆ 10 ಗಂಟೆಗೆ ಕಾರ್ಯಕ್ರಮ ಉದ್ಘಾಟಿಸುವರು. ದೃಶ್ಯಕಲಾ ಕಾಲೇಜಿನ ಪ್ರಾಚಾರ್ಯ ಡಾ.ಸತೀಶ್ ಕುಮಾರ್ ಪಿ. ವಲ್ಲೇಪುರೆ, ತರಳಬಾಳು ಕೃಷಿ ವಿಜ್ಞಾನ ಕೇಂದ್ರದ ಮುಖ್ಯಸ್ಥ ಡಾ.ಟಿ.ಎನ್‌ದೇವರಾಜ, ಕೃಷಿ ಇಲಾಖೆ ಉಪನಿರ್ದೇಶಕ ತಿಪ್ಪೇಸ್ವಾಮಿ, ಛತ್ತೀಸ್‌ಘಡದ ಭಾರತ್ ಬೀಜ್ ಮಂಚ್‌ನ ಸಂಚಾಲಕ ಜಾಕೋಬ್ ನೆಲ್ಲಿತ್ತಾನಂ, ಸಹಜ ಸಮೃದ್ಧ ಸಂಸ್ಥೆಯ ಕೃಷ್ಣ ಪ್ರಸಾದ್ ಪಾಲ್ಗೊಳ್ಳುವರು.

ಕೃಷಿಯೆಂಬ ಹತ್ತು ತಲೆಮಾರಿನ ಜ್ಞಾನ ಹಾಗೂ ಬದಲಾದ ಹವಾಮಾನ ಕುರಿತು ಕೃಷಿ ಮತ್ತು ಪರಿಸರ ಬರಹಗಾರ ಶಿವಾನಂದ ಕಳವೆ, ಚರಕದ ಸುತ್ತ ಸಂಭಾಷಣೆ ಕುರಿತು ಮೈಸೂರಿನ ಸಚ್ಚು, ಲಯಬದ್ಧ ವಿಶ್ರಾಂತಿ: ಪ್ರಕೃತಿಯೊಂದಿಗೆ ನಿದ್ರೆಯ ಸಮನ್ವಯ ಕುರಿತು ಹೋಮಿಯೋಪತಿ ವೈದ್ಯ ರಂಗರಾಜನ್, ಚೌಕಾಬಾರಾ-ತರಕಾರಿ ಬೆಳೆಯುವ ವಿನೂತನ ಪದ್ಧತಿ ಕುರಿತು ಶಿವಮೊಗ್ಗದ ಸಂತೋಷ್ ಅವರು ಕನ್ನಡ ಹಾಗೂ ಇಂಗ್ಲಿಷ್‌ನಲ್ಲಿ ತಯಾರಿಸಿದ ಪ್ರಾತ್ಯಕ್ಷಿಕೆ ಮೂಲಕ ಮಾಹಿತಿ ನೀಡುವರು. ಸಹಜ ಕೃಷಿಕರ ಸಾಕ್ಷ್ಯಚಿತ್ರ ಕೂಡ ಪ್ರದರ್ಶಿತವಾಗಲಿದೆ.

ಹರಿಯಾಣ, ಕೇರಳ, ತೆಲಂಗಾಣ, ಮಹಾರಾಷ್ಟ್ರ, ತಮಿಳುನಾಡು, ಕರ್ನಾಟಕ ಮತ್ತು ಇತರ ರಾಜ್ಯಗಳಿಂದ ಬೀಜ ಸಂರಕ್ಷಕರ ಗುಂಪುಗಳು ಭಾಗವಹಿಸಲಿವೆ. ಬೀಜ ವಿನಿಮಯ ಕಾರ್ಯಕ್ರಮವಿರುತ್ತದೆ. ಆಸಕ್ತರು ಬೀಜ ಮತ್ತು ಗಿಡಗಳನ್ನು ವಿನಿಮಯಕ್ಕೆ ತರಬಹುದು. ವಿಷಮುಕ್ತ ಕೃಷಿ ಉತ್ಪನ್ನಗಳು, ನೀರಾ, ಸಾವಯವ ಎಳನೀರು ಸೇರಿ ಆರೋಗ್ಯಕರ ಪೇಯ, ತೆಂಗಿನ ನೀರಾ ಬೆಲ್ಲ, ಸಾವಯವ ಊಟ ಮತ್ತು ತಿನಿಸುಗಳು ಇರಲಿವೆ ಎಂದು ಮಾಹಿತಿ ನೀಡಿದರು.

ಸುದ್ದಿಗೋಷ್ಠಿಯಲ್ಲಿ ಸಂಘಟನೆಯ ಸಂಚಾಲಕರಾದ ಅಭಿಷೇಕ್, ಕೃಷ್ಣಮೋಹನ್, ಹನುಮಂತಪ್ಪ, ಅಶೋಕ್ ಕುಕ್ಕುವಾಡ ಇದ್ದರು.