ದಾವಣಗೆರೆ

ಮೆಕ್ಕೆಜೋಳದ ಹೊಲದಲ್ಲಿ ಶುರುವಾಯ್ತು ಬುಡಗುಂಟೆ ಸದ್ದು Crop

ಮಾಯಕೊಂಡ ಹೋಬಳಿ ಹುಚ್ಚವ್ವನಹಳ್ಳಿ ಹೊರವಲಯದ ಮೆಕ್ಕೆಜೋಳ ಬೆಳೆಯಲ್ಲಿ ಬುಡಗುಂಟೆ ಹೊಡೆಯುತ್ತಿರುವ ರೈತರು. Crop
ಮಾಯಕೊಂಡ ಹೋಬಳಿ ಹುಚ್ಚವ್ವನಹಳ್ಳಿ ಹೊರವಲಯದ ಮೆಕ್ಕೆಜೋಳ ಬೆಳೆಯಲ್ಲಿ ಬುಡಗುಂಟೆ ಹೊಡೆಯುತ್ತಿರುವ ರೈತರು. Crop
Published on: 

ಪ್ರಮುಖ ಮುಖ್ಯಾಂಶಗಳು

  • ಮುಳ್ಳು ಸಜ್ಜೆ ಕಳೆ ತೊಡೆದು ಹಾಕಲು ಸಹಕಾರಿ
  • ಪ್ರತಿ ಎಕರೆಗೆ 1200 ರೂ. ದರ ನಿಗದಿ
  • ದರ ಏರಿಕೆಯಾದರೂ ಅನಿವಾರ್ಯ
ಮಾಯಕೊಂಡ: ಹೋಬಳಿಯ ಹಲವು ಗ್ರಾಮಗಳಲ್ಲಿ ಮುಂಗಾರು ಹಂಗಾಮಿನ ಮೆಕ್ಕೆಜೋಳ ಬಿತ್ತನೆ ಮಾಡಿ ತಿಂಗಳಾಗಿದ್ದು, ಬೆಳೆಯಲ್ಲಿ ರೈತರು ಬುಡಗುಂಟೆ ಹೊಡೆಯಲು ಪ್ರಾರಂಭ ಮಾಡಿದ್ದಾರೆ. Crop
ಮೆಕ್ಕೆಜೋಳದಲ್ಲಿ ಬುಡಗುಂಟೆ ಹೊಡೆಯಲು ಪ್ರತಿ ಎಕರೆಗೆ 1200 ರೂ. ದರ ನಿಗದಿ ಮಾಡಿದ್ದಾರೆ. ಮೇವಿನ ಕೊರತೆ, ಎತ್ತುಗಳ ಸಾಕಣೆಯ ವೆಚ್ಚ ಹಾಗೂ ಎತ್ತುಗಳನ್ನು ಕೊಂಡು ತರಲು ವಿಪರೀತ ದುಬಾರಿ ಬೆಲೆ, ಹೀಗೆ ಹಲವು ಅನಾನುಕೂಲತೆ ಇರುವುದರಿಂದ ಬುಡಗುಂಟೆ ಹೊಡೆಯಲು ಬೇಸಾಯದ ದರವನ್ನು ಏರಿಕೆ ಮಾಡುವುದು ಅನಿವಾರ್ಯವಾಗಿದೆ ಎನ್ನುತ್ತಾರೆ ಬೇಸಾಯ ಹೊಂದಿರುವ ರೈತರು.
ಯಂತ್ರಗಳ ಮೊರೆ: ದಾವಣಗೆರೆ ತಾಲೂಕಿನ ಆನಗೋಡು, ಮಾಯಕೊಂಡ, ಅಣಜಿಯ ನೂರಾರು ಗ್ರಾಮಗಳಲ್ಲಿ ಎತ್ತುಗಳ ಬೇಸಾಯವನ್ನು ರೈತರು ಕೈಬಿಟ್ಟಿದ್ದಾರೆ. ಸಂಪೂರ್ಣ ಯಾಂತ್ರಿಕೃತ ಕೃಷಿಯ ಕಡೆ ರೈತರು ಮುಖಮಾಡಿದ್ದಾರೆ. ಬಿತ್ತನೆ ಕಟಾವು ಒಕ್ಕಣೆಯವರೆಗೂ
ಯಂತ್ರಗಳನ್ನು ಬಳಕೆ ಮಾಡುವುದರಿಂದ ಎತ್ತುಗಳು ವಿರಳವಾಗಿವೆ.
ಹೋಬಳಿಯಲ್ಲಿ ಈ ಭಾರಿ ಮುಂಗಾರು ಹಂಗಾಮಿನ ಮಳೆ ನಿರೀಕ್ಷೆ ಮಾಡಿದಷ್ಟು ಬಾರದೆ ಇದ್ದುದರಿಂದ ಸರಿಸುಮಾರು 2000-2500 ಹೆಕ್ಟರ್ ಪ್ರದೇಶದಲ್ಲಿ ಮೆಕ್ಕೆಜೋಳ ಬಿತ್ತನೆ ಮುಂದಿನ ದಿನಗಳಲ್ಲಿ ಹೆಚ್ಚಿನ ಪ್ರದೇಶದಲ್ಲಿ ಬಿತ್ತನೆ ಕಾರ್ಯ ಮಾಡಲಿದ್ದಾರೆ ಎಂದು ಕೃಷಿ ಅಧಿಕಾರಿಗಳು ತಿಳಿಸುತ್ತಾರೆ.
ಮೆಕ್ಕೆಜೋಳ ಬಿತ್ತನೆ ಮಾಡಲು ಜಮೀನುಗಳನ್ನು ಹದಗೊಳಿಸುವ ಸಂದರ್ಭದಿಂದ ಕಟಾವಿನವರೆಗೂ ಮುಳ್ಳು ಸಜ್ಜೆ ಕಳೆ ಬೆಳೆದು ತೊಂದರೆಯಾಗುತ್ತದೆ. ಆದ್ದರಿಂದಾಗಿ ಬುಡಗುಂಟೆ ಹೊಡೆಯುವುದು ಅನಿವಾರ್ಯವಾಗಿದೆ. ಬೆಳೆ ಕಾಪಾಡುವ ಸಲುವಾಗಿ ದುಬಾರಿಯಾದರೂ ಹೊಡೆಸಬೇಕು ಎನ್ನುತ್ತಾರೆ ರೈತರು.
ಮೆಕ್ಕೆಜೋಳ ಬೆಳೆಯಲ್ಲಿ ಪ್ರತಿ ದಿನ 4-5 ಎಕರೆ ಬುಡಗುಂಟೆ ಹೊಡೆಯುತ್ತೇವೆ, ಬೇಸಾಯಕ್ಕೆ ಎರಡು ಕುಂಟೆ ಅಳವಡಿಸಿಕೊಂಡು ಹೊಡೆಯಲಾಗುತ್ತದೆ ಎಂದು ರೈತ ನಾಗರಾಜ್ ವಿಜಯವಾಣಿಗೆ ಮಾಹಿತಿ ನೀಡಿದರು.

ದುಬಾರಿ ಬೆಲೆ ಕೊಟ್ಟು ಎತ್ತುಗಳನ್ನು ತಂದಿದ್ದೇವೆ, ಎಡೆಕುಂಟೆ, ಬುಡುಗುಂಟೆ ಮತ್ತು ಬಿತ್ತನೆ ಮಾಡಲು ದರ ಏರಿಕೆ ಮಾಡುವುದು ಅನಿವಾರ್ಯ. ಆದ್ದರಿಂದ ಪ್ರತಿ ಎಕರೆ ಬುಡುಗುಂಟೆ ಹೊಡೆಯಲು 1200 ರೂ. ದರ ನಿಗದಿ ಮಾಡಿದ್ದೇವೆ.

— ಎ.ಕೆ. ನಾಗರಾಜ್, ಎತ್ತುಗಳ ಮಾಲೀಕ, ಹುಚ್ಚವ್ವನಹಳ್ಳಿ

ಮಾಯಕೊಂಡ ಹೋಬಳಿಯಲ್ಲಿ ಮೆಕ್ಕೆಜೋಳ ಬಿತ್ತನೆ ಮಾಡಿದ್ದು ಈಗಾಗಲೇ ಬುಡಗುಂಟೆ ಹೊಡೆಯುತ್ತಿದ್ದಾರೆ, ಉತ್ತಮ ಮಳೆ ಬಾರದಿದ್ದರೂ ಮೆಕ್ಕೆಜೋಳ ಬಿತ್ತನೆಗೆ ಮುಂದಾಗಿದ್ದಾರೆ.

— ಕೆ. ಬೀರಪ್ಪ, ಕೃಷಿ ಅಧಿಕಾರಿ, ರೈತ ಸಂಪರ್ಕ ಕೇಂದ್ರ ಮಾಯಕೊಂಡ

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net