ದಾವಣಗೆರೆ

ಕಾಡಿದ ಒಣಹವೆ ಬಾಡಿದ ಮೆಕ್ಕೆಜೋಳ

ಚನ್ನಗಿರಿ ತಾಲೂಕು ಭೀಮನೆರೆ ಗ್ರಾಮದ ಹೊಲದಲ್ಲಿ ಬಾಡುತ್ತಿರುವ ಮೆಕ್ಕೆಜೋಳ ಗಿಡಗಳು.
ಚನ್ನಗಿರಿ ತಾಲೂಕು ಭೀಮನೆರೆ ಗ್ರಾಮದ ಹೊಲದಲ್ಲಿ ಬಾಡುತ್ತಿರುವ ಮೆಕ್ಕೆಜೋಳ ಗಿಡಗಳು.
ಡಿ. ಎಂ. ಮಹೇಶ್
Published on: 

ಪ್ರಮುಖ ಮುಖ್ಯಾಂಶಗಳು

  • ಮಳೆಯ ಕಣ್ಣಾಮುಚ್ಚಾಲೆಗೆ ನಲುಗಿದ ಕೃಷಿ
  • ತೊಗರಿ, ಹತ್ತಿಗೂ ತಟ್ಟಿದ ಬರದ ಛಾಯೆ
  • ಜಿಲ್ಲಾದ್ಯಂತ ಮಳೆರಾಯನಿಗೆ ಮೊರೆತ
ದಾವಣಗೆರೆ: ಜಿಲ್ಲಾದ್ಯಂತ ಮಳೆಯ ಕಣ್ಣಾಮುಚ್ಚಾಲೆ ಮುಂದುವರಿದಿದ್ದು ಎಲ್ಲೆಡೆ ಒಣ ಹವಾಮಾನ ಮುಂದುವರಿದಿದೆ. ನಿರೀಕ್ಷಿತ ಮುಂಗಾರು ಕೈಕೊಟ್ಟ ಹಿನ್ನೆಲೆಯಲ್ಲಿ ಕೃಷಿ ಕ್ಷೇತ್ರದಲ್ಲಿ ಗರ ಬಡಿದಿದೆ. ಬೆಳೆದ ಗೇಣುದ್ದದ ಮೆಕ್ಕೆಜೋಳ, ತೊಗರಿ ಬಾಡುವ ಸ್ಥಿತಿಯಲ್ಲಿವೆ. ಹತ್ತಿ ಕೂಡ ಬರಕ್ಕೆ ತುತ್ತಾಗುವ ಹಂತದಲ್ಲಿದೆ.
ಜಿಲ್ಲೆಯಲ್ಲಿ ಜೂನ್ ತಿಂಗಳಲ್ಲಿ ಒಟ್ಟು ವಾಡಿಕೆ ಮಳೆ ಪ್ರಮಾಣ 79 ಮಿ.ಮೀ. ಇದೆ. ಜೂ.23ರವರೆಗೆ 58 ಮಿ.ಮೀ. ಮಳೆ ಆಗಬೇಕಿತ್ತು. ಆದರೆ 25 ಮಿ.ಮೀ ಮಳೆಯಾಗಿದ್ದು ಸರಾಸರಿ ಶೇ.57ರಷ್ಟು ಕೊರತೆ ರೈತರನ್ನು ಕಾಡುತ್ತಿದೆ. ‘ಹುಯ್ಯೋ ಹುಯ್ಯೋ ಮಳೆರಾಯ..’ ಎನ್ನುವ ಅನ್ನದಾತರ ಮೊರೆತ ವರುಣನನ್ನು ತಲುಪಿಲ್ಲ.
ಜೂ.22ರಿಂದ ಮೂರು ದಿನಗಳವರೆಗೆ ನಿರೀಕ್ಷೆಯಿದ್ದ ಆರಿದ್ರಾ ಮಳೆ ಕೂಡ ಮಾಯವಾದಂತಿದೆ. ಸದ್ಯಕ್ಕೆ 12,196 ಹೆ. ಪ್ರದೇಶದಲ್ಲಿ ಅಂದರೆ ಶೇ.5.67ರಷ್ಟು ಮಾತ್ರವೇ ಬಿತ್ತನೆಯಾಗಿದೆ. ಇದರಲ್ಲಿ 10 ಸಾವಿರ ಹೆ. ಪ್ರದೇಶದಲ್ಲಿನ 25ದಿನದ 1 ತಿಂಗಳವಧಿಯ ಮೆಕ್ಕೆಜೋಳ ಒಣಗುವ ಸ್ಥಿತಿಗೆ ತಲುಪಿದೆ. ಉಳಿದಂತೆ 2ಸಾವಿರ ಹೆ. ಪ್ರದೇಶದಲ್ಲಿನ ತೊಗರಿ, ಹತ್ತಿ ಕೂಡ ನಲುಗುತ್ತಿದೆ.
ಜಗಳೂರು, ನ್ಯಾಮತಿ ಹಾಗೂ ಚನ್ನಗಿರಿ ತಾಲೂಕಿನ ಸಂತೆಬೆನ್ನೂರು, ಭೀಮನೆರೆ ಭಾಗಗಳಲ್ಲಿ (ಪ್ರಿವೆಂಟಿಂಗ್ ಸೋಯಿಂಗ್) ಬಿತ್ತನೆ ಆಗದಿರುವ ಪರಿಸ್ಥಿತಿ ತಲೆದೋರಿದೆ. ವಾರದಲ್ಲಿ ಮಳೆಯಾಗದಿದ್ದರೆ ಬೆಳೆ ನಷ್ಟಭೀತಿ ಇದೆ. ಸ್ವಲ್ಪ ಮಟ್ಟದ ಮಳೆಯಾದಲ್ಲಿ ಪರ್ಯಾಯ ಬೆಳೆ ಯೋಜನೆ ಮಾಡಬಹುದು. ಮುಂಗಾರು ವಿಫಲವಾದಲ್ಲಿ ರೈತರು ಹಿಂಗಾರು ಬೆಳೆ ನೆಚ್ಚಿಕೊಳ್ಳಬೇಕಾದೀತು.

ಪ್ರಾರ್ಥನೆಗೂ ಫಲ ನೀಡದ ವರುಣ

ನಗರ-ಹಳ್ಳಿ ಎನ್ನದೆ ಸಮೃದ್ಧ ಮಳೆಗಾಗಿ ಸಾಲುಸಾಲು ಪ್ರಾರ್ಥನೆ ನಡೆದಿವೆ. ಮಾಯಕೊಂಡದ ಆಂಜನೇಯ ದೇವಸ್ಥಾನದ ವೃತ್ತದಲ್ಲಿ ಪ್ರತಿ ಶುಕ್ರವಾರದಂತೆ ಐದು ವಾರಗಳ ಸಂತೆ ನಡೆಸಲಾಗುತ್ತಿದೆ. ಗಂಗನಕಟ್ಟೆ, ಹುಚ್ಚವ್ವನಹಳ್ಳಿ ಗ್ರಾಮಗಳಲ್ಲಿಯೂ ಕಂತೆಭಿಕ್ಷೆ, ಭಜನೆ ಕಾರ್ಯಕ್ರಮ ನಡೆದಿವೆ.
ಕೊಗ್ಗನೂರು ಗ್ರಾಮದಲ್ಲಿ ಆಂಜನೇಯ, ಬೀರಲಿಂಗೇಶ್ವರ, ದುರ್ಗಾಂಬಿಕಾ ದೇವಿಗೆ ಕರಗಲ್ಲು ಪೂಜೆ, ಜಲಾಭಿಷೇಕ ನಡೆಸಲಾಗಿದೆ. ಕೆಲ ಗ್ರಾಮಸ್ಥರು ಅಮ್ಮನಗುಡ್ಡದ ದೇವಿಗೆ ಪೂಜೆ ಸಲ್ಲಿಸಿದ್ದಾರೆ. ಜಿಲ್ಲಾ, ತಾಲೂಕು ಬಿತ್ತನೆ ಬೀಜ, ಕ್ರಿಮಿನಾಶಕ, ರಸಗೊಬ್ಬರ ಮಾರಾಟಗಾರರ ಸಂಘದಿಂದಲೂ ನಗರದೇವತೆ ದುಗಾಂಬೆ ದೇವಸ್ಥಾನದ ಬಳಿಯ ಕರಗಕಲ್ಲಿಗೆ ಪೂಜೆ ನಡೆದಿದೆ.
ಮಂಗಳವಾರ ಕೂಡ ದುರ್ಗಾಂಬಿಕಾ ದೇವಿಗೆ ಶಾಸ್ತ್ರೋಕ್ತವಾಗಿ ಎಡೆಪೂಜೆ ಸೇವೆ ಸಲ್ಲಿಕೆಯಾಗಿದೆ. ಇನ್ನೊಂದು ವಾರದಲ್ಲಿ ಮಳೆ ಆಗದಿದ್ದರೆ ವಾರದ ಸಂತೆ ಆಯೋಜಿಸುವ ಬಗ್ಗೆ ದೇವಸ್ಥಾನ ಸಮಿತಿ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ.

ಭೀಮನೆರೆಯ 700 ಎಕರೆಗೂ ಸಂಚಕಾರ

ಚನ್ನಗಿರಿ ತಾಲೂಕಿನ ಭೀಮನೆರೆ ಗ್ರಾಮವೊಂದರಲ್ಲೇ 700 ಎಕರೆ ಪ್ರದೇಶದಲ್ಲಿ ಮೆಕ್ಕೆಜೋಳ ಬೆಳೆದ ರೈತರು ಚಿಂತೆಗೆ ಜಾರಿದ್ದಾರೆ. ಕೂಲಿಕಾರ್ಮಿಕರ ಬೇಡಿಕೆ ಇಲ್ಲದ್ದರಿಂದ, ಎರೆ ನೆಲದಲ್ಲೇ ಮೆಕ್ಕೆಜೋಳವನ್ನು ಹೆಚ್ಚು ಬೆಳೆದ ರೈತರು ಮಳೆಯ ನಿರೀಕ್ಷೆಯಲ್ಲಿದ್ದರು. ಹದ ಮಳೆಯಾಗದ್ದರಿಂದ ಮುಸುಕಿನ ಜೋಳದ ಪೈರು ಒಣಗುವ ಹಂತದಲ್ಲಿದೆ.
ಕಳೆದ ಬಾರಿಯೂ ಮೆಕ್ಕೆಜೋಳ ಯಥೇಚ್ಛ ಬೆಳೆದರೂ ಉತ್ತಮ ಬೆಲೆ ಕಾಣದೆ ಕಂಗಾಲಾಗಿದ್ದ ಭೀಮನೆರೆ ಗ್ರಾಮದ ರೈತರು ಇದೀಗ ಮಳೆ ಅಭಾವಕ್ಕೆ ಮತ್ತೊಮ್ಮೆ ನಷ್ಟದ ಹೊಡೆತಕ್ಕೆ ಸಿಲುಕಿದ್ದಾರೆ. ಬೆಳೆ ನಷ್ಟ ಪರಿಹಾರಕ್ಕಾಗಿ ಕೆಲವರು ಹಾತೊರೆಯುತ್ತಿದ್ದಾರೆ. ಮೆಕ್ಕೆಜೋಳ ತೆಗೆದು ಸೋಯಾಬೀನ್, ರಾಗಿ ಬೆಳೆಯುವತ್ತ ಸಜ್ಜಾಗಿದ್ದಾರೆ.
ಗ್ರಾಮದ ರೈತರು ಮೊದಲೆಲ್ಲ ಸಿರಿಧಾನ್ಯ ಬೆಳೆದರೂ ಬೆಲೆ ಕಾಣಲಿಲ್ಲ. ಹತ್ತಿ ಬೆಳೆದಾಗ ಕೂಲಿಕಾರ್ಮಿಕರ ಸಮಸ್ಯೆ ಕಾಡಿತ್ತು. ಹೀಗಾಗಿ ಕಳೆದ ವರ್ಷದಿಂದ ಮೆಕ್ಕೆಜೋಳವನ್ನೇ ಬೆಳೆಯುತ್ತಿದ್ದಾರೆ. ಕಳೆದ ಬಾರಿ ಮೆಕ್ಕೆಜೋಳ ಬೆಳೆದರೂ ಉತ್ತಮ ಧಾರಣೆ ಸಿಗಲಿಲ್ಲ. ಈ ಬಾರಿ ಒಂದೆರೆಡು ಗೇಣುದ್ದದ ಬೆಳೆ ಇದ್ದರೂ ಬಾಡುವ ಹಂತಕ್ಕೆ ತಲುಪಿದೆ ಎಂದು ಮುಖಂಡ ವಿಶ್ವನಾಥ ಪಾಟೀಲ್ ಹೇಳಿಕೊಳ್ಳುತ್ತಾರೆ.
ಈ ಬಾರಿ ಅಡಕೆ ಜತೆಗೆ 20 ಎಕರೆಯಲ್ಲಿ ಮೆಕ್ಕೆಜೋಳ ಬಿತ್ತನೆ ಮಾಡಿದ್ದು 4ರಿಂದ 5 ಲಕ್ಷ ರೂ. ವೆಚ್ಚ ಮಾಡಿದ್ದೇನೆ. ಕಳೆದ ಬಾರಿ ಎಕರೆಗೆ 14 ಕ್ವಿಂಟಾಲ್ ಮೆಕ್ಕೆಜೋಳ ಇಳುವರಿಯಾಗಿತ್ತು. ಈ ಬಾರಿ ಅಷ್ಟೂ ಇಳುವರಿ ಜತೆಗೆ ಹಾಕಿದ ಬಂಡವಾಳ ಕೈ ಸಿಗುವುದು ಅನುಮಾನವಿದೆ. ಕೃಷಿ ಅಧಿಕಾರಿಗಳ ಸಲಹೆಯಂತೆ ಬೆಳೆವಿಮೆ ಮಾಡಿಸಬೇಕಿದೆ ಎಂಬುದು ಕೆ.ಎನ್. ರಾಜಪ್ಪ ಅವರ ಮಾತು.

ಜೂ. 22ರಿಂದ ಆಗಬೇಕಿದ್ದ ಮಳೆ ಬಾರದೆ ಬೇಸಗೆಯ ಸ್ಥಿತಿ ಮುಂದುವರಿದಿದೆ. ವಾರದಲ್ಲಿ ಮಳೆ ಆಗದಿದ್ದರೆ ಬಿತ್ತಲಾದ ಬೆಳೆ ನಷ್ಟ ಆಗಬಹುದು. ಜಿಲ್ಲಾದ್ಯಂತ ಬೆಳೆ ಸಮೀಕ್ಷೆ ನಡೆಸಲಾಗುತ್ತಿದೆ. ರೈತರು ಬೆಳೆವಿಮೆ ಕಂತು ಕಟ್ಟಿ ಪರಿಹಾರ ಪಡೆಯುವಂತೆ ಪ್ರಚಾರ ಕಾರ್ಯ ಮಾಡಲಾಗುತ್ತಿದೆ.

— ಕೆ. ಜಿಯಾವುಲ್ಲಾ, ಜಂಟಿ ಕೃಷಿ ನಿರ್ದೇಶಕ.

9 ಎಕರೆಯಲ್ಲಿ ಮೆಕ್ಕೆಜೋಳ ಬೆಳೆದಿದ್ದರೂ ಮಳೆ ಕೊರತೆ ಕಾಡಿದೆ. ಬೆಳೆ ನೆಲಕ್ಕೆ ಒರಗಿದೆ. ಎಕರೆಗೆ 12ರಿಂದ 15 ಸಾವಿರ ವೆಚ್ಚ ಮಾಡಿದ್ದೇನೆ. ಕೃಷಿ ಇಲಾಖೆ ಸೂಕ್ತ ಪರಿಹಾರ ಕೊಡಿಸಬೇಕು.

— ಬಿ.ವಿ. ಕಾರ್ತೀಕ್ ಪಾಟೀಲ್, ಭೀಮನೆರೆ ರೈತ.

ಹತ್ತೆಕರೆಯಲ್ಲೂ ಮೆಕ್ಕೆಜೋಳ ಬಿತ್ತಿದ್ದೇನೆ. 28 ದಿನದ ಗಿಡಗಳು ಮಳೆ ಇಲ್ಲದೆ ಒಣಗುತ್ತಿವೆ. ಆರಂಭದಲ್ಲಿ ಹದ ಮಳೆಯಾಗಿದ್ದರಿಂದ ಮುಂದೆಯೂ ಇಂತಹ ಮಳೆಯಾಗಬುದು ಎಂಬ ಆಶಾಭಾವನೆಯಿಂದ ಬಿತ್ತಿದೆವು. ವೆಚ್ಚ ಕೂಡ ಕೈ ಸಿಗದಂತಾಗಿದೆ.

— ಪ್ರವೀಣ್ ರೆಡ್ಡಿ, ಭೀಮನೆರೆ ರೈತ.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net