ಅಡಕೆ ಬೆಳೆಗೆ ನುಸಿ ರೋಗದ ಬಿಸಿ

ಮಾಯಕೊಂಡದಲ್ಲಿ ರೋಗಬಾಧಿತ ಅಡಕೆ ಗಿಡಗಳಿಗೆ ಕೀಟನಾಶಕ ಸಿಂಪಡಣೆ ಮಾಡುತ್ತಿರುವುದು.

Published on:

02 Mar 2026, 9:50 am

ಪ್ರಮುಖ ಮುಖ್ಯಾಂಶಗಳು

ತೀವ್ರ ಉಷ್ಣಾಂಶಕ್ಕೆ ರೈತರು ಕಂಗಾಲು
ಮಳೆಯಾಶ್ರಿತ ಪ್ರದೇಶಗಳಲ್ಲಿ ಸಮಸ್ಯೆ ಉಲ್ಬಣ
ಕಾಂಡದ ಮೇಲೆ ಕೆಂಪು-ಕಪ್ಪು ಜಿಗಿ
ಕೀಟನಾಶಕ ಸಿಂಡಣೆ

ಕೃಷ್ಣಮೂರ್ತಿ ಪಿ.ಎಚ್. ಮಾಯಕೊಂಡ

ಈ ಬಾರಿ ಜನವರಿ ಮತ್ತು ಫೆಬ್ರವರಿ ತಿಂಗಳಿನಲ್ಲೇ ತೀವ್ರ ಬಿಸಿಲು ಕಾಣಿಸಿಕೊಂಡಿದ್ದು, ದಾವಣಗೆರೆ ಜಿಲ್ಲೆಯ ಅಡಕೆ ಬೆಳೆಗಾರರು ನುಸಿ ರೋಗದ ಬಾಧೆಯಿಂದ ತತ್ತರಿಸಿದ್ದಾರೆ. ವಿಶೇಷವಾಗಿ 1 ರಿಂದ 4 ವರ್ಷದ ಎಳೆ ಅಡಕೆ ಸಸಿಗಳು ರೋಗಕ್ಕೆ ತುತ್ತಾಗುತ್ತಿರುವುದು ರೈತರ ನೆಮ್ಮದಿ ಕೆಡಿಸಿದೆ.

ದಾವಣಗೆರೆ ಜಿಲ್ಲೆಯಲ್ಲಿ ಅತಿ ಹೆಚ್ಚು ಅಡಕೆ ವಿಸ್ತೀರ್ಣ ಹೊಂದಿರುವ ಚನ್ನಗಿರಿ ತಾಲೂಕಿನ ನಂತರದ ಸ್ಥಾನದಲ್ಲಿರುವ ದಾವಣಗೆರೆ ತಾಲೂಕಿನ ಮಳೆಯಾಶ್ರಿತ ಪ್ರದೇಶಗಳಾದ ಮಾಯಕೊಂಡ, ಆನಗೋಡು ಹಾಗೂ ಅಣಜಿ ಹೋಬಳಿಗಳ ನೂರಾರು ಗ್ರಾಮಗಳಲ್ಲಿ ಈ ಸಮಸ್ಯೆ ಉಲ್ಬಣಿಸಿದೆ.

ಹೆಚ್ಚುತ್ತಿರುವ ಉಷ್ಣಾಂಶದಿಂದಾಗಿ ಅಡಕೆ ಗಿಡಗಳಿಗೆ ಕಪ್ಪು, ಬಿಳಿ ಹಾಗೂ ಕಂದು ಜಿಗಿ ರೋಗ ಕಾಣಿಸಿಕೊಂಡಿದೆ. ಎಳೆ ಗಿಡಗಳ ಗರಿಗಳು ಬಿಸಿಲಿಗೆ ಸುಟ್ಟಂತೆ ಭಾಸವಾಗುತ್ತಿದ್ದು, ಕಾಂಡದ ಮೇಲೆ ಕೆಂಪು-ಕಪ್ಪು ಜಿಗಿ ಆವರಿಸಿಕೊಳ್ಳುತ್ತಿದೆ. ಕಳೆದ ವರ್ಷ ನೀರಿನ ಕೊರತೆಯಿಂದ ನುಸಿ ರೋಗ ಬಂದಿತ್ತು. ಆದರೆ ಈ ಬಾರಿ ಬೋರ್‌ವೆಲ್‌ಗಳಲ್ಲಿ ನೀರಿದ್ದರೂ ಸಹ, ವಾತಾವರಣದ ಅತಿಯಾದ ತಾಪಮಾನದಿಂದಾಗಿ ರೋಗ ಹರಡುತ್ತಿರುವುದು ರೈತರ ಆತಂಕಕ್ಕೆ ಕಾರಣವಾಗಿದೆ.

ಗುಡಾಳು, ಗುಮ್ಮನೂರು, ಮಂಡಲೂರು, ಕಾಟೀಹಳ್ಳಿ, ನೀರ್ಥಡಿ, ಹುಣಸೆಕಟ್ಟಿ, ಕಂದನಕೋವಿ, ಜಮಾ ಪುರ, ಕೆರೆಯಾಗಳಹಳ್ಳಿ, ಕುರುಡಿ, ಕಿತ್ತೂರು, ಹೆಮ್ಮನಬೇತೂರು, ಹಾಲವರ್ತಿ, ಸಿದ್ದನೂರು, ಆಗಸನಕಟ್ಟೆ, ಗಂಗನಕಟ್ಟೆ, ಚಿನ್ನಸಮುದ್ರ, ಬಾವಿಹಾಳ್, ಮಾಯಕೊಂಡ, ಹುಚ್ಚವ್ವನಹಳ್ಳಿ, ಎಚ್.ಬಸವಪುರ, ಕ್ಯಾತನಹಳ್ಳಿ, ಹಿಂಡಸಕಟ್ಟೆ, ನಲ್ಕುಂದ, ಅಣಬೇರು, ಬಾಡ ಸೇರಿದಂತೆ ಸುತ್ತಮುತ್ತಲಿನ ಹಲವು ಹಳ್ಳಿಗಳಲ್ಲಿ ನುಸಿ ರೋಗದ ಬಾಧೆ ವ್ಯಾಪಕವಾಗಿದೆ.

ಬಿಸಿಲು ಏರುತ್ತಿದ್ದಂತೆ ಎಲೆಚುಕ್ಕಿ ಮತ್ತು ನುಸಿ ರೋಗ ಕಾಣಿಸಿಕೊಳ್ಳುವುದು ಸಹಜ. ರೈತರು ಆತಂಕಕ್ಕೆ ಒಳಗಾಗದೆ ಗಿಡಗಳಲ್ಲಿ ನೀರಿನ ತೇವಾಂಶ ಕಡಿಮೆಯಾಗದಂತೆ ನೋಡಿಕೊಳ್ಳಬೇಕು. ರೋಗ ಕಂಡುಬಂದ ತಕ್ಷಣ ಸೂಕ್ತ ಕೀಟನಾಶಕ ಸಿಂಪಡಿಸಿದರೆ ಹತೋಟಿಗೆ ತರಬಹುದು.

ನಮ್ಮ 2 ಎಕರೆ ಜಮೀನಿನಲ್ಲಿದ್ದ 1,100 ಗಿಡಗಳ ಪೈಕಿ ಸುಮಾರು 200 ಗಿಡಗಳಿಗೆ ನುಸಿ ರೋಗ ತಗುಲಿ ಗರಿಗಳು ಸುಟ್ಟಂತಾಗಿವೆ. ತಕ್ಷಣ ಕೀಟನಾಶಕ ಸಿಂಪಡಿಸಿದ್ದರಿಂದ ಈಗ ರೋಗ ಸ್ವಲ್ಪ ಹತೋಟಿಗೆ ಬಂದಿದೆ.

ಬೇಸಿಗೆಯಲ್ಲಿ ತಾಪಮಾನ ಹೆಚ್ಚಾದಂತೆ ರೋಗಗಳು ಹರಡುತ್ತವೆ. ರೈತರು ಕೀಟನಾಶಕ ಸಿಂಪಡಣೆಯ ಜತೆಗೆ ಅಡಕೆ ತೋಟದಲ್ಲಿ ಅಂತರ ಬೆಳೆಯಾಗಿ ಸೆಣಬು, ಹಲಸಂದೆ ಅಥವಾ ಅವರೆಯನ್ನು ಬೆಳೆದರೆ ರೋಗ ಹರಡುವುದನ್ನು ಬೇಗನೆ ತಡೆಗಟ್ಟಬಹುದು.

Disease