ದಾವಣಗೆರೆ

ಶಾಂತಿಸಾಗರ ಭರ್ತಿಗೆ 3 ಇಂಚು ಮಾತ್ರ ಬಾಕಿ

ಸೂಳೆಕೆರೆ ಕೋಡಿ ಬಳಿಯಲ್ಲಿ ಇರುವಂಥ ಸ್ಥಳವನ್ನು ನೀರು ಆಕ್ರಮಿಸಿರುವುದು.
ಸೂಳೆಕೆರೆ ಕೋಡಿ ಬಳಿಯಲ್ಲಿ ಇರುವಂಥ ಸ್ಥಳವನ್ನು ನೀರು ಆಕ್ರಮಿಸಿರುವುದು.
ಧನಂಜಯ ಎಸ್.ಹಕಾರಿ.
Published on: 

ಪ್ರಮುಖ ಮುಖ್ಯಾಂಶಗಳು

  • ಏಷ್ಯಾದ ಎರಡನೇ ಅತೀ ದೊಡ್ಡ ಕೆರೆ
  • ಮೂರು ಇಂಚು ಮಾತ್ರ ಬಾಕಿ
  • ಕೋಡಿ ಬೀಳುವ ಸಾಧ್ಯತೆ
ವಿಜಯವಾಣಿ ಸುದ್ದಿಜಾಲ ಚನ್ನಗಿರಿ
ಏಷ್ಯಾದ ಎರಡನೇ ಅತೀ ದೊಡ್ಡ ಕೆರೆಯಾದ ಶಾಂತಿಸಾಗರದ ಭರ್ತಿಗೆ ಮೂರು ಇಂಚು ಮಾತ್ರ ಬಾಕಿ ಇದ್ದು ಯಾವ ಸಂದರ್ಭದಲ್ಲಿ ಬೇಕಾದರೂ ಕೋಡಿ ಬೀಳುವ ಸಾಧ್ಯತೆ ಇದೆ.
ಈ ಸಾಲಿನ ಜನವರಿ ತಿಂಗಳಿಂದ ಪ್ರಾರಂಭವಾದ ಮಳೆಯಿಂದ ಕೆರೆಗೆ ಸಾಕಷ್ಟು ನೀರು ಸಂಗ್ರಹವಾಗಿದ್ದು, ತುಂಬುವ ಹಂತ ತಲುಪಿದೆ. ಅಕ್ಟೋಬರ್ ತಿಂಗಳಲ್ಲಿ ತಾಲೂಕಿನ ವಿವಿಧೆಡೆ ಉತ್ತಮ ಮಳೆಯಾಗಿದ್ದರಿಂದ ಈ ಭಾಗದ ಎಲ್ಲ ಕೆರೆಕಟ್ಟೆಗಳು ತುಂಬಿವೆ. ಚನ್ನಗಿರಿಯ ಹರಿದ್ರಾವತಿ ಹಳ್ಳ, ಸಂತೇಬೆನ್ನೂರಿನ ಹಿರೇಹಳ್ಳ ತುಂಬಿ ಹರಿದು ಸೂಳೆಕೆರೆ ಸೇರುತ್ತದೆ.
  • ಭದ್ರಾ ನಾಲೆಯಿಂದಲೂ ನೀರು ಹರಿದು ಬರುತ್ತದೆ. ಹಲವು ಜಲಮೂಲಗಳಿಂದ ಕೆರೆ ತುಂಬಿ ಕೋಡಿ ಬೀಳುವ ಹಂತ ತಲುಪಿದೆ. 
  • ಇತಿಹಾಸ ಪ್ರಸಿದ್ಧ ಕೆರೆ ಎಂದೇ ಹೆಸರಾಗಿರುವ ಶಾಂತಿ ಸಾಗರದಲ್ಲಿ ಸುಮಾರು 26 ಅಡಿ ನೀರು ಸಂಗ್ರಹವಾಗುತ್ತದೆ. ಒಟ್ಟು 650 ಹೆಕ್ಟೇರ್ ವಿಸ್ತೀರ್ಣವನ್ನು ಹೊಂದಿದೆ. 
  • ತಾಲೂಕಿನ ಸುತ್ತಮುತ್ತಲೂ ಉತ್ತಮ ಮಳೆಯಿಂದಾಗಿ ಕೆರೆ ಕೋಡಿ ಬೀಳುವ ಸಂಭವವಿದೆ. 2013,  2021 ಹಾಗೂ 2022ರಲ್ಲಿ ಕೋಡಿ ಬಿದ್ದಿತ್ತು.
  •  2018ರಲ್ಲಿ ಮಳೆ ಇಲ್ಲದೆ ತಾಲೂಕಿನ ಜನರು ಕುಡಿವ ನೀರಿಗಾಗಿ ಪರದಾಡಿದ್ದರು. ಆಗ ಕೆರೆ ಖಾಲಿಯಾಗಿ ನೆಲ ಕಾಣುವಂತಾಗಿತ್ತು.
ಕೆರೆ ಕೋಡಿ ಬೀಳಲು ನೀರು ಸಂಗ್ರಹವಾಗುತ್ತಿದ್ದಂತೆ ಸೂಳೆಕೆರೆ ಅಚ್ಚುಕಟ್ಟು ಜಲಾನಯನ ಪ್ರದೇಶದಲ್ಲಿ ಸ್ಥಳೀಯರು ಕೋಡಿ ಹಳ್ಳದ ಬಳಿ ಜಾನುವಾರುಗಳನ್ನು ಮೇಯಿಸಲು ಕೊಂಡೊಯ್ಯುವುದನ್ನು ನಿಲ್ಲಿಸಿದ್ದಾರೆ.
ತುಂಬಿರುವ ಕೆರೆ ವೀಕ್ಷಣೆಗೆ ಪ್ರವಾಸಿಗರು ತಂಡವಾಗಿ ಬರುತ್ತಿದ್ದಾರೆ.
ಅಕ್ವಾಡೆಕ್ ಮೇಲೆ ಓಡಾಡುವುದು, ಸೆಲ್ಫಿ ತೆಗೆಯುವುದು, ಇತರ ಚಟುವಟಿಕೆಗಳನ್ನು ಕೈಗೊಳ್ಳದಂತೆ ಕಾನೂನು ಕ್ರಮ ತೆಗೆದುಕೊಳ್ಳಲು ಸಂಬಂಧಿಸಿದ ಅಧಿಕಾರಿಗಳು ಎಚ್ಚರಿಕೆಯನ್ನು ನೀಡಿದ್ದಾರೆ.
82 ಗ್ರಾಮಗಳಿಗೆ ಕುಡಿಯುವ ನೀರು
ಕೆರೆ ಭರ್ತಿಯಿಂದ ಸುತ್ತಲಿನ 250 ಎಕರೆ ಜಮೀನಿನಲ್ಲಿ ಜೀವಜಲ ತನ್ನ ಸ್ಥಳವನ್ನು ಆಕ್ರಮಿಸಿಕೊಂಡಿದೆ. ಇನ್ನು ಹೆಚ್ಚಿನ ನೀರು ಬಂದರೆ  ಸುತ್ತಲಿನ ಗ್ರಾಮಗಳ ಮನೆಗಳಿಗೆ ನೀರು ನುಗ್ಗುವ ಆತಂಕ ಇದೆ.
ತಾಲೂಕಿನಲ್ಲಿ ನೀರಿನ ಸಮಸ್ಯೆ ಇರುವದರಿಂದ ಸೂಳೆಕೆರೆಯಿಂದ ಚನ್ನಗಿರಿ ಪಟ್ಟಣ ಸೇರಿ 82 ಗ್ರಾಮಗಳಿಗೆ ಕುಡಿಯುವ ನೀರನ್ನು ಹರಿಸುವ ಯೋಜನೆ ಕಾರ್ಯಗತವಾಗಿದೆ. 
ಚನ್ನಗಿರಿ, ಚಿತ್ರದುರ್ಗ, ಸಿರಿಗೆರೆ, ಭೀಮಸಮುದ್ರ, ಹೊಳೆಲ್ಕೆರೆ ಸೇರಿದಂತೆ ಹಲವು ತಾಲೂಕುಗಳಿಗೆ ಕುಡಿವ ನೀರು ಹರಿದು ಹೋಗುತ್ತಿದೆ. 
ಭದ್ರಾ ನದಿಯಿಂದ ನೀರನ್ನು ಕೆರೆಗೆ ತರಲು ಸಿದ್ಧತೆ ಕೈಗೊಂಡು ಸಾಸ್ವೇಹಳ್ಳಿ ಗ್ರಾಮದ ಹಳ್ಳದ ಬಳಿ 2017ರಲ್ಲಿ ಯೋಜನೆ ರೂಪಿಸಿ ಸರ್ಕಾರದಿಂದ ಮಂಜೂರಾತಿ ಪಡೆದು 431 ಕೋಟಿ ರೂ. ಅನುದಾನದಿಂದ ಕಾಮಗಾರಿ ಪ್ರಾರಂಭಿಸಲಾಗಿದೆ. ಸೂಳೆಕೆರೆಯಲ್ಲಿ ನೀರಿನ ಪ್ರಮಾಣವನ್ನು ಒಂದೇ ಸಮಾನ ನಿಯಂತ್ರಿಸುವ ಸಲುವಾಗಿ 0.989 ನೀರು ಹರಿಯುವಂತೆ ವ್ಯವಸ್ಥೆ ರೂಪಿಸಲಾಗಿದೆ.
"

ಶಾಂತಿಸಾಗರ ತುಂಬುತ್ತಿರುವುದರಿಂದ ಕೆರೆಯ ಸುತ್ತಲಿನ ಗ್ರಾಮಗಳಿಗೆ ಎಚ್ಚರಿಕೆಯಿಂದ ಇರಲು ತಾಲೂಕು ಆಡಳಿತದಿಂದ ತಿಳಿಸಲಾಗಿದೆ, ಜಾನುವಾರುಗಳನ್ನು ಕೆರೆಗೆ ತೆಗೆದುಕೊಂಡು ಹೋಗದಂತೆ ಸೂಚಿಸಲಾಗಿದೆ. ಈಜಾಡಲು ಬರುವಂತ ಜನರನ್ನು ತಡೆಹಿಡಿಯಲಾಗಿದೆ.

— ಎನ್.ಜೆ.ನಾಗರಾಜ್, ತಹಸೀಲ್ದಾರ್ ಚನ್ನಗಿರಿ.

"

ಕೆರೆಗೆ ನೀರು ಹರಿದು ಬರುತ್ತಿರುವುದರಿಂದ ಕಗತೂರು ಗ್ರಾಮದ ಬಳಿ ನೀರು ಬಂದಿದೆ. ಕೆರೆ ಅಳತೆ ಇರುವಷ್ಟು ಜಾಗವನ್ನು ನೀರು ಆಕ್ರಮಿಸಿಕೊಂಡಿದೆ. ನೀರು ಹೆಚ್ಚಾದರೆ ಗ್ರಾಮದೊಳಗೆ ಬರುವ ಸಾಧ್ಯತೆ ಇದೆ.

— ಮಲ್ಲಿಕಾರ್ಜುನ, ಕಗತೂರು ಗ್ರಾಮಸ್ಥ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net