ಶೀಘ್ರದಲ್ಲೇ ಬೋಧಕೇತರರ ರಾಜ್ಯ ಸಮಾವೇಶ

ಶಿಕ್ಷಣ ಇಲಾಖೆಯ ಲಿಪಿಕ ನೌಕರರು, ವಾಹನ ಚಾಲಕರು ಹಾಗೂ ಗ್ರೂಪ್ ಡಿ ನೌಕರರ ಸಂಘದ ಜಿಲ್ಲಾ ಶಾಖೆ ವತಿಯಿಂದ ಇಲ್ಲಿನ ಸರ್ಕಾರಿ ನೌಕರರ ಸಮುದಾಯ ಭವನದಲ್ಲಿ ಶನಿವಾರ ಹಮ್ಮಿಕೊಂಡಿದ್ದ, ನೂತನ ಜಿಲ್ಲಾ ಹಾಗೂ ತಾಲೂಕು ಸಂಘದ ಪದಾಧಿಕಾರಿಗಳ ಪದಗ್ರಹಣ, ನಿವೃತ್ತ ಬೋಧಕೇತರ ನೌಕರರ ಸನ್ಮಾನ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಸಿಎಂ ಡಿ.ಕೆ. ಶಿವಕುಮಾರ್ ಹಾಗೂ ಶಿಕ್ಷಣ ಸಚಿವರು ಒಳಗೊಂಡಂತೆ ಸರ್ಕಾರಿ ನೌಕರರ ಸಂಘದ ರಾಜ್ಯಾಧ್ಯಕ್ಷ ಸಿ.ಎಸ್. ಷಡಾಕ್ಷರಿ ನೇತೃತ್ವದಲ್ಲಿ ಈ ಸಮಾವೇಶ ನಡೆಸಲಾಗುವುದು. ಶಿಕ್ಷಣ ಇಲಾಖೆಯಲ್ಲಿ ಶಿಕ್ಷಕರಷ್ಟೇ ಬೋಧಕೇತರರಿಗೂ ಆದ್ಯತೆ ನೀಡಬೇಕು. ಸರ್ಕಾರದ ಸೇವಾ ಸೌಲಭ್ಯಗಳನ್ನು ಒದಗಿಸುವಂತೆ ಆಗ್ರಹಿಸಲಾಗುವುದು ಎಂದರು.

ನೂತನ ಕೆಪಿಎಸ್ ಶಾಲೆಗಳಲ್ಲಿ ಬೋಧಕೇತರರ ಹೊಸ ಹುದ್ದೆಗಳನ್ನು ಮಂಜೂರು ಮಾಡಬೇಕು. 1200 ಮಕ್ಕಳಿರುವ ಈ ಶಾಲೆಗಳಲ್ಲಿ ಗುಣಮಟ್ಟದ ಶಿಕ್ಷಣ ಕಲ್ಪಿಸಲು, ಶಿಕ್ಷಕರ ಮೇಲಿನ ಹೊರೆ ತಪ್ಪಿಸಲು ಸರ್ಕಾರ ಈ ಕ್ರಮ ವಹಿಸಬೇಕು. ಅಕ್ಷರದಾಸೋಹ ಸಹಾಯಕ ನಿರ್ದೇಶಕರ ಹುದ್ದೆಯನ್ನು ಬೋಧಕೇತರರಿಗೆ ನೀಡಬೇಕು. ಪ್ರತಿ ಆರು ತಿಂಗಳಿಗೊಮ್ಮೆ ನಿರ್ದಿಷ್ಟ ಖಾಲಿ ಹುದ್ದೆಗಳಿಗೆ ಮುಂಬಡ್ತಿ ನೀಡಬೇಕು ಎಂದು ಆಗ್ರಹಿಸಿದರು.

ವೃಂದ ಮತ್ತು ನೇಮಕಾತಿ ನಿಯಮ ಬದಲಾವಣೆ ಮಾಡಿ ಕಾಲಕಾಲಕ್ಕೆ ಶಿಕ್ಷಕರ ನೇಮಕಾತಿ ನಡೆಸಲಾಗುತ್ತಿದೆ. ಆದರೆ ಬೋಧಕೇತರರ ನೇಮಕಾತಿ ಸಂಬಂಧ 1967ರಲ್ಲಿದ್ದ ವೃಂದ ಮತ್ತು ನೇಮಕಾತಿ ನಿಯಮ ಬದಲಾಗಿಲ್ಲ. ಕೂಡಲೆ ಇದಕ್ಕೆ ತಿದ್ದುಪಡಿ ತರಬೇಕು. ಶಿಕ್ಷಕರು ಮತ್ತು ಮಕ್ಕಳ ಅನುಪಾತ ಆಧಾರಿಸಿ ಬಿಇಒ ಕಚೇರಿಗಳಲ್ಲಿಯೂ ಲಿಪಿಕ ನೌಕರರ ಸಂಖ್ಯೆ ಹೆಚ್ಚಿಸಬೇಕು ಎಂದು ಆಗ್ರಹಿಸಲಾಗುವುದು ಎಂದು ತಿಳಿಇದರು.

ನಮ್ಮ ಹೋರಾಟದ ಫಲವಾಗಿ ಡಿ ದರ್ಜೆ ನೌಕರರಿಂದ ಅಧೀಕ್ಷಕ ಹುದ್ದೆವರೆಗೆ 339 ನೌಕರರಿಗೆ ವರ್ಗಾವಣೆ ಹಾಗೂ 450 ಜನರಿಗೆ ಮುಂಬಡ್ತಿ ದೊರೆತಿದೆ. ಎ ಮತ್ತು ಬಿ ದರ್ಜೆ ನೌಕರರ ಮಾದರಿಯಲ್ಲೇ ಸಿ ದರ್ಜೆ ನೌಕರರೂ ಆನ್‌ಲೈನ್ ಮೂಲಕ ವಾರ್ಷಿಕ ಕಾರ್ಯನಿರ್ವಹಣಾ ವರದಿ ಸಲ್ಲಿಸಲು, ಜಿಲ್ಲಾ, ರಾಜ್ಯ, ವಿಭಾಗೀಯ ಹಂತದಲ್ಲಿ ತರಬೇತಿ ನೀಡಲು ಹಾಗೂ 6 ತಿಂಗಳಿಗೊಮ್ಮೆ ಮುಂಬಡ್ತಿ ನೀಡಲು ಆದೇಶವಾಗಿದೆ ಎಂದು ವಿವರಿಸಿದರು.

ಕರ್ನಾಟಕ ಪರೀಕ್ಷಾ ಮಂಡಳಿ ನಿವೃತ್ತ ಹಿರಿಯ ಸಹಾಯಕ ನಿರ್ದೇಶಕ ಜಿ.ಗೋಣಿಬಸಪ್ಪ ಮಾತನಾಡಿ ಇಲಾಖೆಯ ಲಿಪಿಕ ನೌಕರರು ಮತ್ತು ಅಧಿಕಾರಿಗಳ ನಡುವೆ ಪರಸ್ಪರ ನಂಬಿಕೆ ಹಾಗೂ ಪರಿಣಾಮಕಾರಿ ಸಂವಹನ ಇರಬೇಕು. ಆಗ ಇಲಾಖೆ ಹಂತ ಹಾಗೂ ವೈಯಕ್ತಿಕ ಜೀವನದಲ್ಲಿ ಸಮಸ್ಯೆಗಳು ಬರುವುದಿಲ್ಲ ಎಂದು ಹೇಳಿದರು.

ಅಧಿಕಾರಿಗಳಿಗಿಂತಲೂ ಹೆಚ್ಚಾಗಿ ಲಿಪಿಕ ನೌಕರರಿಗೆ ಇಲಾಖೆಯ ವಿಷಯಗಳ ಬಗ್ಗೆ ಆಳವಾದ ಜ್ಞಾನ, ಬುದ್ಧಿವಂತಿಕೆ ಮತ್ತು ಚಾಕಚಕ್ಯತೆ ಇರಲಿದೆ ಎಂದ ಅವರು, ನೌಕರರು ಬರೆಯುವ ಟಿಪ್ಪಣಿ, ಆದೇಶಗಳು ಸಮಗ್ರವಾಗಿಯೂ ಕಾನೂನುಬದ್ಧ ಆಗಿರಬೇಕು. ಹಾಗಿದ್ದಾಗ ಉನ್ನತ ಅಧಿಕಾರಿಯೂ ನಿಮ್ಮನ್ನು ಏನೂ ಮಾಡಲು ಸಾಧ್ಯವಿಲ್ಲ ಎಂದು ಹೇಳಿದರು.

ಸಂಘದ ರಾಜ್ಯ ಉಪಾಧ್ಯಕ್ಷ ಎಚ್.ಆರ್. ಮೋಹನ್, ಪ್ರಧಾನ ಕಾರ್ಯದರ್ಶಿ ಐ.ಎಂ. ಸಂತೋಷ್‌ಕುಮಾರ್, ಗೌರವಾಧ್ಯಕ್ಷ ಡಿ.ಕೊಟ್ರೇಶ್,ಜಿಲ್ಲಾಧ್ಯಕ್ಷ ಡಿ.ಮಂಜುನಾಥ, ಸರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ವೀರೇಶ್ ಎಸ್. ಒಡೇನಪುರ, ಗೌರವಾಧ್ಯಕ್ಷ ಡಿ.ಕೊಟ್ರೇಶ್, ಜಿ.ದೇವರಾಜು, ಟಿ. ಪೃಥ್ವಿಕುಮಾರ್, ಆದ್ಯಪ್ಪ ಬಾಗ್ಲಿ, ಕೆ.ಬಿ.ಆನಂದ, ಕೆ.ಸಿ. ರವೀಶ್, ಡಿಡಿಪಿಐ ಕೃಷ್ಣಪ್ರಸಾದ್, ಡಯಟ್ ಉಪನಿರ್ದೇಶಕಿ ಎಸ್.ಗೀತಾ ಇತರರಿದ್ದರು.