ಹೋಟೆಲ್‌ಗಳ ಅಡುಗೆ ಮನೆಯಲ್ಲಿ ಮತ್ತೆ ಕಾಣಿಸಿಕೊಂಡ ಹೊಗೆ!

ಈ ಹಿಂದೆ ಅನಿಲ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾದಾಗ ಮನೆಬಳಕೆಯ ಸಿಲಿಂಡರ್ ಬರಲು ಕನಿಷ್ಠ 30 ದಿನಗಳು ಬೇಕಾಗುತ್ತಿತ್ತು. ಆದರೆ ಈಗ ಪರಿಸ್ಥಿತಿ ಸುಧಾರಿಸಿದ್ದು, 8 ದಿನದೊಳಗೆ ಸಿಲಿಂಡರ್ ಪೂರೈಕೆಯಾಗುತ್ತಿದೆ. ಆದರೆ, ಈ ಹಿಂದೆ ಮನೆ ಬಳಕೆಯ ಸಿಲಿಂಡರ್‌ಗಳನ್ನು ಅಕ್ರಮವಾಗಿ ಬಳಸುತ್ತಿದ್ದ ಹೋಟೆಲ್‌ಗಳಿಗೆ ಈಗ ಪೂರೈಕೆ ಸ್ಥಗಿತಗೊಂಡಿದೆ. ಗೃಹ ಬಳಕೆದಾರರಿಗೆ ಸಿಲಿಂಡರ್ ಕೊರತೆಯಾಗದಂತೆ ಏಜೆನ್ಸಿಗಳು ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿರುವುದರಿಂದ, ಹೋಟೆಲ್ ಮಾಲೀಕರು ಕಟ್ಟಿಗೆ ಒಲೆ ಹಚ್ಚಿ ಅಡುಗೆ ಮಾಡುವಂತಾಗಿದೆ.

ಬೆಲೆ ಏರಿಕೆ!: ವಾಣಿಜ್ಯ ಸಿಲಿಂಡರ್ ಬೆಲೆಯನ್ನು ಕೇಂದ್ರ ಸರ್ಕಾರ ಏಕಾಏಕಿ 900 ರೂ. ಏರಿಕೆ ಮಾಡಿದೆ. ಈ ಹಿಂದೆ 2,300 ರೂ. ಇದ್ದ ಬೆಲೆ ಗಗನಕ್ಕೇರಿರುವುದು ಸಣ್ಣಪುಟ್ಟ ಹೋಟೆಲ್‌ಗಳು ಮತ್ತು ಬೀದಿಬದಿ ವ್ಯಾಪಾರಿಗಳ ನಿದ್ದೆಗೆಡಿಸಿದೆ. ಈ ದರ ಏರಿಕೆಯನ್ನು ಭರಿಸಲಾಗದೆ ಹಲವು ಹೋಟೆಲ್‌ಗಳು ಮುಚ್ಚುವ ಹಂತಕ್ಕೆ ತಲುಪಿದ್ದರೆ, ಇನ್ನು ಕೆಲವು ಹೋಟೆಲ್‌ಗಳ ಮೂಲೆಯಲ್ಲಿ ಮತ್ತೆ ಕಟ್ಟಿಗೆ ಹೊಗೆ ಕಾಣಿಸಿಕೊಳ್ಳುತ್ತಿದೆ.

ಮದುವೆ ಸಮಾರಂಭಗಳಲ್ಲೂ ಒಲೆ ಅಡುಗೆ: ಕೇವಲ ಹೋಟೆಲ್‌ಗಳಷ್ಟೆ ಅಲ್ಲದೆ, ಹೊನ್ನಾಳಿ- ನ್ಯಾಮತಿ ತಾಲೂಕಿನಾದ್ಯಂತ ನಡೆಯುವ ಮದುವೆ ಹಾಗೂ ಶುಭ ಸಮಾರಂಭಗಳ ಮೇಲೆಯೂ ಗ್ಯಾಸ್ ಕೊರತೆ ಪ್ರಭಾವ ಬೀರಿದೆ. ನಿಗದಿತ ಸಮಯಕ್ಕೆ ಬೇಕಾದಷ್ಟು ಸಿಲಿಂಡರ್ ಸಿಗದ ಕಾರಣ, ಮದುವೆ ಛತ್ರಗಳಲ್ಲಿ ದೊಡ್ಡ ದೊಡ್ಡ ಒಲೆಗಳನ್ನು ಹೂಡಿ ಭಕ್ಷ್ಯಗಳನ್ನು ತಯಾರಿಸಲಾಗುತ್ತಿದೆ.

ಸದ್ಯದ ಪರಿಸ್ಥಿತಿಯಲ್ಲಿ ಮನೆಬಳಕೆಯ ಅನಿಲ ವಿತರಣೆಯಲ್ಲಿ ಯಾವುದೆ ಸಮಸ್ಯೆ ಇಲ್ಲ. ಬುಕ್ ಮಾಡಿದ ಒಂದು ವಾರದೊಳಗೆ ಪೂರೈಕೆ ಮಾಡುತ್ತಿದ್ದೇವೆ. ಆದರೆ, ಕಮರ್ಷಿಯಲ್ ಗ್ಯಾಸ್‌ಗೆ ಸಂಬಂಧಿಸಿದಂತೆ, ಈ ಹಿಂದೆ ಯಾರು ನಿಯಮಿತವಾಗಿ ಪಡೆಯುತ್ತಿದ್ದರೋ ಅಂತಹವರಿಗೆ ಮಾತ್ರ ಶೇ. 75ರಷ್ಟು ಪೂರೈಕೆ ಮಾಡಲಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.

ಗ್ಯಾಸ್ ದರ ಏರಿಕೆಯ ಬಿಸಿ ನೇರವಾಗಿ ಗ್ರಾಹಕರಿಗೂ ತಟ್ಟುತ್ತಿದೆ. ಹೋಟೆಲ್‌ಗಳಲ್ಲಿ ಮಸಾಲೆ ದೋಸೆ, ಪೂರಿ ಸಾಗು, ರೈಸ್ ಐಟಂ ಹಾಗೂ ಚಹಾ-ಕಾಫಿ ಬೆಲೆಗಳನ್ನು ಅನಿವಾರ್ಯವಾಗಿ ಹೆಚ್ಚಿಸಲಾಗಿದೆ. ಇದರಿಂದಾಗಿ ಹೋಟೆಲ್ ತಿಂಡಿಗಳ ಬೆಲೆ ಕೇಳಿ ಗ್ರಾಹಕರು ಬೆಚ್ಚಿ ಬೀಳುವಂತಾಗಿದೆ.