ಸಮರ್ಥ್ ಶಾಮನೂರು ರಂಗಪ್ರವೇಶ

ಜಿಲ್ಲಾ ಉಸ್ತುವಾರಿ ಸಚಿವ ಎಸ್.ಎಸ್.ಮಲ್ಲಿಕಾರ್ಜುನ್ ಅವರ ಪುತ್ರ, ಕಾಂಗ್ರೆಸ್‌ನ ಅಭ್ಯರ್ಥಿ ಸಮರ್ಥ್ ಶಾಮನೂರು ಅವರು ಬಿಜೆಪಿ ಹುರಿಯಾಳು ಶ್ರೀನಿವಾಸ ದಾಸಕರಿಯಪ್ಪ ಅವರಿಗಿಂತ 5708 ಮತಗಳ ಅಂತರದಿಂದ ಜಯ ಸಾಧಿಸಿ ವಿಧಾನಸಭೆಗೆ ಚುನಾಯಿತರಾದರು.

ಸಮರ್ಥ್ ಒಟ್ಟು 69578 ಮತಗಳನ್ನು ಗಳಿಸಿದರೆ ಎದುರಾಳಿ ಬಿಜೆಪಿಯ ಶ್ರೀನಿವಾಸ ದಾಸಕರಿಯಪ್ಪ ಅವರು 63870 ಮತಗಳನ್ನು ಪಡೆದರು. ಚೊಚ್ಚಲ ಅದೃಷ್ಟ ಪರೀಕ್ಷೆಗಿಳಿದಿದ್ದ ದಿ. ಶಾಮನೂರು ಶಿವಶಂಕರಪ್ಪ ಅವರ ಮೊಮ್ಮಗ, ‘ಸಮರ್ಥ’ವಾಗಿ ಎದುರಿಸಿದ್ದು ಶಾಮನೂರು ಕುಟುಂಬದ ಮೂರನೇ ತಲೆಮಾರು ರಾಜಕೀಯ ರಂಗಕ್ಕೆ ಅಡಿಯಿಟ್ಟಿದೆ.

ಈ ಬಾರಿಯ ದಕ್ಷಿಣ ಕ್ಷೇತ್ರದ ಚುನಾವಣೆ, ಹಿಂದಿನ ಎಲೆಕ್ಷನ್‌ಗಳಷ್ಟು ಸಲೀಸಾಗಿರಲಿಲ್ಲ. ಮುಸ್ಲಿಮರ ಬಾಹುಳ್ಯದ ಕ್ಷೇತ್ರದಲ್ಲಿ ಬೇಡಿಕೆಯಂತೆ ಟಿಕೆಟ್ ದಕ್ಕದಿರುವುದು ಆ ಸಮುದಾಯದಲ್ಲಿ ಮುನಿಸಿಗೆ ಕಾರಣವಾಗಿತ್ತು. ಕ್ಷೇತ್ರದಲ್ಲಿ ಸ್ಪರ್ಧಿಸಿದ್ದ 25 ಅಭ್ಯರ್ಥಿಗಳಲ್ಲಿ 14 ಮಂದಿ ಮುಸ್ಲಿಮರೇ ಕಣಕ್ಕಿಳಿದಿದ್ದರು.

ಮುಖ್ಯಮಂತ್ರಿ ಸಿದ್ದರಾಮಯ್ಯ, ಡಿಸಿಎಂ ಡಿ.ಕೆ. ಶಿವಕುಮಾರ್, ಸುರ್ಜೆವಾಲಾ ಆದಿಯಾಗಿ ಕಾಂಗ್ರೆಸ್ ಸಚಿವರು, ಶಾಸಕರ ದಂಡೇ ಇಲ್ಲಿ ಪ್ರಚಾರ ನಡೆಸಿತ್ತು. ಬಿಜೆಪಿ ಅಭ್ಯರ್ಥಿ ಪರವಾಗಿ ಮಾಜಿ ಸಿಎಂ ಬಿ.ಎಸ್. ಯಡಿಯೂರಪ್ಪ, ರಾಜ್ಯಾಧ್ಯಕ್ಷ ವಿಜಯೇಂದ್ರ, ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಸೇರಿ ಘಟಾನುಘಟಿಗಳು ಮತ ಯಾಚಿಸಿದ್ದರು. ಹೀಗಾಗಿ ಸಹಜವಾಗಿ ಚುನಾವಣೆ ಕುತೂಹಲ ಮೂಡಿಸಿತ್ತು.

ಸೋಮವಾರ ನಡೆದ ಮತ ಎಣಿಕೆ, ಐಪಿಎಲ್ ಪಂದ್ಯದಷ್ಟೇ ರೋಚಕತೆ ಸೃಷ್ಟಿಸಿತ್ತು. ಬಿಜೆಪಿಯ ಶ್ರೀನಿವಾಸ ದಾಸಕರಿಯಪ್ಪ ಅವರು ಮೊದಲ ಸುತ್ತಿನಿಂದಲೇ ಮುನ್ನಡೆಯ ಭೇಟೆ ಗಮನ ಸೆಳೆಯಿತು. ಪ್ರಥಮ ರೌಂಡ್‌ನಲ್ಲಿ 577 ಮತಗಳ ಅಂತರ ಕಾಯ್ದುಕೊಂಡಿದ್ದ ಶ್ರೀನಿವಾಸ 3711 ಮತ ಪಡೆದರು. ಸಮರ್ಥ್ 3134 ಮತಗಳನ್ನು ಗಳಿಸಿದ್ದರು.

ಏಳನೇ ಸುತ್ತಿನವರೆಗೂ (3295 ಮತ) ಮುನ್ನಡೆಯೊಂದಿಗೆ ಬಿಜೆಪಿ ಟ್ರೆಂಡ್ ಉಳಿಸಿಕೊಂಡಿತ್ತು. 8ನೇ ಸುತ್ತಿನಲ್ಲಿ ಸಮರ್ಥ್ ಶಾಮನೂರು ತಮ್ಮ (1073) ಮುನ್ನಡೆಯನ್ನು ಸಾಬೀತುಪಡಿಸಿದರು. ಅಲ್ಲಿಂದ ಕೆಲ ಕಾಲ ಲೀಡ್‌ನ ನಾಗಾಲೋಟ ಕಾಂಗ್ರೆಸ್‌ನತ್ತ ವಾಲಿತು.

ತನ್ನ ಸಾಂಪ್ರದಾಯಿಕ ಮತಗಳುಳ್ಳ ಪ್ರದೇಶಗಳಲ್ಲಿ ಕಾಂಗ್ರೆಸ್ ಗಮನ ಸೆಳೆಯುತ್ತ ಹೋದರೆ, ಗ್ರಾಮೀಣ ಭಾಗದಲ್ಲಿ ಬಿಜೆಪಿ-ಕಾಂಗ್ರೆಸ್ ಸಮಬಲದ ಹೋರಾಟವೇ ನಡೆಯಿತು. 12ನೇ ರೌಂಡ್‌ನಲ್ಲಿ ಸಮರ್ಥ್ 9952 ಮತಗಳ ಅಂತರ ಸಾಧಿಸಿದರು. ಬರುಬರುತ್ತಾ ಲೀಡ್ ಪ್ರಮಾಣ ತಗ್ಗುತ್ತ ಹೋಯಿತು. 21ನೇ ಸುತ್ತಿನ ಹೊತ್ತಿಗೆ ಲೀಡ್ ಪ್ರಮಾಣ 5708ಕ್ಕೆ ಇಳಿಕೆಯಾಯಿತು.

ಇದರೊಂದಿಗೆ ಸಮರ್ಥ್ ಮೊದಲ ಬಾರಿಗೆ ರಾಜಕಾರಣದ ರಂಗ ಪ್ರವೇಶ ಪಡೆದರೆ, ದಕ್ಷಿಣದಲ್ಲಿ ಚೊಚ್ಚಲ ಖಾತೆ ತೆರೆಯುವ ಬಿಜೆಪಿ ಕನಸು ಛಿದ್ರವಾಯಿತು. ಎಸ್‌ಡಿಪಿಐ ಸ್ಪರ್ಧಿ ಅಫ್ಸರ್ ಕೊಡ್ಲಿಪೇಟೆ 18975 ಮತಗಳನ್ನು ಪಡೆದು ಗಮನ ಸೆಳೆದರು. ಅವರೂ ಸೇರಿ ಎಲ್ಲ 23 ಮಂದಿ ಠೇವಣಿ ಕಳೆದುಕೊಂಡರು.

ಸಮರ್ಥ್ ಶಾಮನೂರು (ಕಾಂಗ್ರೆಸ್)- 69578, ಶ್ರೀನಿವಾಸ ದಾಸಕರಿಯಪ್ಪ (ಬಿಜೆಪಿ) -63870, ಅಫ್ಸರ್ ಕೊಡ್ಲಿಪೇಟೆ (ಎಸ್‌ಡಿಪಿಐ)- 18975, ಕೆ.ಎಸ್. ಶಿವಕುಮಾರಪ್ಪ (ಆಮ್ ಆದ್ಮಿ) 453, ಈರಣ್ಣ (ಇಂಡಿಯನ್ ಪೊಲಿಟಿಕಲ್ ಕಾಂಗ್ರೆಸ್ ಪಾರ್ಟಿ)- 234, ಈಶ್ವರ್ ಸೇಂಗಾ(ಪ್ರಜಾಕೀಯ)- 157, ಖಾಜಾ ಮೊಹಿದ್ದೀನ್ ಗುಡಗೇರಿ (ಬ್ಲೂ ಇಂಡಿಯಾ ಪಾರ್ಟಿ)- 50, ದಾದಾ ಖಲಂದರ್ (ಕಂಟ್ರಿ ಸಿಟಿಜೆನ್ ಪಾರ್ಟಿ)- 50, ಜಿ.ಎನ್. ಪ್ರಶಾಂತ್ ಕುಮಾರ್ (ಜನತಾ ಚಳವಳಿ ಭಾರತ)- 46, ಶಹಬಾಜ್ ಉಲ್ಲಾ ಖಾನ್ (ಯಂಗ್‌ಸ್ಟರ್ ಎಂಪವರ್‌ಮೆಂಟ್ ಪಾರ್ಟಿ)- 95, ಎಂ.ಜಿ. ಶ್ರೀಕಾಂತ್ (ನವ ಭಾರತ್ ಸೇನಾ)-72, ಶ್ರೀನಿವಾಸ ಎಂ.ಸಿ (ಭಾರತೀಯ ಪ್ರಜೆಗಳ ಕಲ್ಯಾಣ ಪಕ್ಷ)- 42, ಸಯ್ಯದ್ ಇಮ್ತಿಯಾಜ್ (ಜನಹಿತ ಪಕ್ಷ)-87, ಖಾದರ್ ಆದಿಲ್ ಬಾಷಾ (ಪಕ್ಷೇತರ)- 1082, ಗೌತಮ್ ಕುಮಾರ್ ಯು. ಜೈನ್ (ಪಕ್ಷೇತರ)-102, ಟಿ. ಜಬೀನ್ ತಾಜ್ (ಪಕ್ಷೇತರ)- 335, ಯು.ಎಂ. ಮನ್ಸೂರ್ ಅಲಿ (ಪಕ್ಷೇತರ)- 477, ಕೆ.ಎಚ್. ಮಹಬೂಬ್ (ಪಕ್ಷೇತರ)- 225, ಸಿ.ಎಂ. ಮಂಜುನಾಥಯ್ಯ ಸ್ವಾಮಿ (ಪಕ್ಷೇತರ)- 297, ಬಿ. ರಾಜಶೇಖರ್ (ಪಕ್ಷೇತರ)-106, ಸಾಜಿದ್ (ಪಕ್ಷೇತರ)- 94, ಸಾದಿಕ್ ಪೈಲ್ವಾನ್- 47, ಎಚ್. ಸುಬಾನ್ ಸಾಬ್ (ಪಕ್ಷೇತರ)-70, ಸಯ್ಯದ್ ಚಾಂದ್ ಪೀರ್ (ಪಕ್ಷೇತರ)-77, ಡಿ. ಸಯ್ಯದ್ ರಿಯಾಜ್ (ಪಕ್ಷೇತರ)- 1186 ಮತ ಪಡೆದರು.

ಮತ ಎಣಿಕೆ ವೇಳೆ ಮೂರು ಮತಯಂತ್ರಗಳು ಎಣಿಕೆಗೆ ತೆರೆದುಕೊಳ್ಳದೆ ತಾಂತ್ರಿಕ ಸಮಸ್ಯೆಯಾಗಿತ್ತು. 111 (ಎಸ್‌ಎಸ್‌ಎಂ ನಗರ), 121 (ಸಿದ್ದರಾಮೇಶ್ವರ ಬಡಾವಣೆ) ಹಾಗೂ 139 (ಮಾಗಾನಹಳ್ಳಿ ರಸ್ತೆಯ ಶಾಲೆ) ಸಂಖ್ಯೆಯ ಮತಗಟ್ಟೆಗಳ ಯಂತ್ರಗಳಲ್ಲಿ ಈ ದೋಷ ಕಂಡುಬಂದಿತ್ತು. ಹೀಗಾಗಿ 21ನೇ ಸುತ್ತಿನ ಬಳಿಕ ಈ ಯಂತ್ರಗಳ ವಿವಿ ಪ್ಯಾಟ್ ಚೀಟಿಗಳ ಮೂಲಕ ಮೂಲಕ ಒಟ್ಟು 1672 ಮತಗಳ ಎಣಿಕೆ ನಡೆಸಲಾಯಿತು.

ದಕ್ಷಿಣ ಕ್ಷೇತ್ರದಲ್ಲಿ ನೋಟಾ ಹೊರತುಪಡಿಸಿ, 187 ಅಂಚೆ ಮತಗಳೂ ಸೇರಿ ಒಟ್ಟು 157807 ಮತಗಳು ಚಲಾವಣೆಯಾಗಿದ್ದವು. ಇದರಲ್ಲಿ ಬಿಜೆಪಿ-ಕಾಂಗ್ರೆಸ್ ಅಭ್ಯರ್ಥಿಗಳನ್ನು ಹೊರತಾಗಿಸಿ ಶೇ.15.43ರಷ್ಟು (24359) ಮತಗಳು ಛಿದ್ರವಾದವು.

ಕಣದಲ್ಲಿದ್ದ 25 ಅಭ್ಯರ್ಥಿಗಳಲ್ಲಿ 14 ಮಂದಿ ಮುಸ್ಲಿಮರೇ ಸ್ಪರ್ಧಿಸಿದ್ದರು. ಅವರೆಲ್ಲರೂ ಸೇರಿ ಒಟ್ಟು 22850 ಮತಗಳನ್ನು ಪಡೆದರೆ, ಇದರಲ್ಲಿ 18975 ಮತಗಳು ಎಸ್‌ಡಿಪಿಐ ಹುರಿಯಾಳು ಅಫ್ಸರ್ ಕೊಡ್ಲಿಪೇಟೆ ಗಳಿಸಿದ್ದು ಎಂಬುದು ವಿಶೇಷ. ಈ ಮತಗಳ ಮೂಲಕ ಕೊಡ್ಲಿಪೇಟೆ ಕಾಂಗ್ರೆಸ್ ಲೀಡ್‌ಗೆ ‘ಕೊಡಲಿ’ ಪೆಟ್ಟು ನೀಡಿದರು. ಕ್ಷೇತ್ರದಲ್ಲಿ ಒಟ್ಟು 511 ನೋಟಾ ಮತಗಳು ಚಲಾವಣೆಯಾದವು.