ಎಸ್‌ಐಆರ್‌ನಲ್ಲಿ ಪಿಡಿಒಗಳದ್ದೇ ಹೆಚ್ಚು ಹೊಣೆ

ಜಿಲ್ಲಾಡಳಿತ ಭವನದ ತುಂಗಭದ್ರಾ ಸಭಾಂಗಣದಲ್ಲಿ ಶನಿವಾರ ಆಯೋಜಿಸಿದ್ದ ಸಭೆಯಲ್ಲಿ ಮಾತನಾಡಿ ಬಿ.ಎಲ್.ಒ ಗಳು ಮನೆ ಮನೆಗೆ ಭೇಟಿ ನೀಡಿ ವಿತರಿಸಲಿರುವ ಎನುಮೆರೇಷನ್ ಫಾರ್ಮ್‌ಗಳನ್ನು ಸೂಕ್ತವಾಗಿ ಭರ್ತಿ ಮಾಡಿ, ಸಹಿ ಪ್ರಕ್ರಿಯೆ ಪೂರ್ಣಗೊಳಿಸಿ ಬಿ.ಎಲ್.ಒಗಳಿಗೆ ಮರಳಿಸಬೇಕಲು. ಈ ಮಾಹಿತಿಯನ್ನು ಇತರರೊಂದಿಗೂ ಹಂಚಿಕೊಳ್ಳಬೇಕು ಎಂದು ಮನವಿ ಮಾಡಿದರು.

ಮತದಾರರ ಪಟ್ಟಿ ಪರಿಷ್ಕರಣೆಯು ಬಿ.ಎಲ್.ಒಗಳಿಗೆ ಸೀಮಿತವಾಗಿಲ್ಲ. ಗ್ರಾಪಂ ಪಿಡಿಒಗಳ ಮೇಲೆಯೂ ಹೆಚ್ಚಿನ ಜವಾಬ್ದಾರಿಯಿದೆ. ಪ್ರತಿ ಪಂಚಾಯಿತಿಯ ಬಿಲ್ ಕಲೆಕ್ಟರ್‌ಗಳು, ನೀರಗಂಟಿಗಳು ಸೇರಿ ಎಲ್ಲಾ ಸಿಬ್ಬಂದಿ ಕಡ್ಡಾಯವಾಗಿ ಬಿ.ಎಲ್.ಒಗಳ ಜತೆಗಿದ್ದು ಅರ್ಜಿಗಳ ಭರ್ತಿಗೆ ಸಹಕರಿಸಬೇಕು. ಮತದಾರರ ಪಟ್ಟಿಯಲ್ಲಿ ಅರ್ಹರ ಹೆಸರನ್ನು ಸೇರ್ಪಡೆಗೊಳಿಸುವ ಪ್ರಕ್ರಿಯೆಯನ್ನು ಸಲಹೆಯಾಗಿ ಪರಿಗಣಿಸದೇ, ಅತ್ಯಂತ ಗಂಭೀರ ವಿಷಯವಾಗಿ ಸ್ವೀಕರಿಸಬೇಕು ಎಂದರು.

ಅನಿವಾರ್ಯ ಕಾರಣ, ಪ್ರಕೃತಿ ವಿಕೋಪಗಳಂತಹ (ಮನೆ ಕುಸಿತ, ಬೆಂಕಿ ಅವಘಡ) ಸಂದರ್ಭಗಳಲ್ಲಿ ದಾಖಲೆಗಳನ್ನು ಕಳೆದುಕೊಂಡು ಗುರುತಿನ ಚೀಟಿ ಇಲ್ಲದಿರುವ ಸಾರ್ವಜನಿಕರು ಹಾಗೂ ರೈತರ ಹಿತದೃಷ್ಟಿಯಿಂದ ಜಿಲ್ಲಾಡಳಿತವು ವಿಶೇಷ ಕ್ರಮ ಕೈಗೊಂಡಿದೆ. ಇಂಥವರನ್ನು ಪಿಡಿಒಗಳು ಕಳುಹಿಸಿಕೊಟ್ಟಲ್ಲಿ ಒಂದೇ ದಿನದಲ್ಲಿ ಅವರಿಗೆ ಶಾಶ್ವತ ನಿವಾಸಿ ಪ್ರಮಾಣಪತ್ರ ನೀಡುವಂತೆ ಎಲ್ಲಾ ತಹಸೀಲ್ದಾರ್‌ಗಳಿಗೆ ನಿರ್ದೇಶನ ನೀಡಲಾಗಿದೆ ಎಂದು ತಿಳಿಸಿದರು. ಸಭೆಯಲ್ಲಿ ಜಿಪಂ ಸಿಇಒ ಗಿತ್ತೆ ಮಾಧವ ವಿಠ್ಠಲರಾವ್, ಜಿಲ್ಲಾ ಮಟ್ಟದ ಅಧಿಕಾರಿಗಳಿದ್ದರು.

ಜಿಲ್ಲೆಯಲ್ಲಿ ಎಸ್‌ಐಆರ್ ಕಾರ್ಯ ಚುರುಕಿನಿಂದ ಸಾಗಿದ್ದು, ಜಿಲ್ಲೆಯಲ್ಲಿ ಒಟ್ಟು 14,99,282 ಮತದಾರರ ಪೈಕಿ ಬಿ.ಎಲ್.ಒ ಗಳು ಈಗಾಗಲೇ 11,62,949 ಎನುಮೆರೇಷನ್ ನಮೂನೆಗಳನ್ನು ವಿತರಿಸಿದ್ದು, ಈ ಪೈಕಿ 72,918 ಅರ್ಜಿಗಳನ್ನು ಗಣಕೀಕರಿಸಲಾಗಿದೆ.

ಮಾಹಿತಿ ಸಂಗ್ರಹಣೆಯ ವೇಳೆ ಒಟ್ಟು 421 ಸ್ಥಳಾಂತರ/ವಲಸೆ/ಮರಣ/ದ್ವಿಪ್ರತಿ ಪ್ರಕರಣಗಳನ್ನು ಗುರುತಿಸಲಾಗಿದೆ. ಇದರಲ್ಲಿ ಶಾಶ್ವತ ವಲಸೆ ಹೋದ 153, ಮರಣ ಹೊಂದಿದ 188, ದ್ವಿಪ್ರತಿ ಹೊಂದಿದ 71, ಸಂಗ್ರಹವಾಗದ/ಗೈರು ಹಾಜರಾದ 5 ಹಾಗೂ ಇತರ 4 ಪ್ರಕರಣಗಳು ಸೇರಿವೆ ಎಂದು ಜಿಲ್ಲಾಧಿಕಾರಿ ಗಂಗಾಧರಸ್ವಾಮಿ ತಿಳಿಸಿದ್ದಾರೆ.

ಜಗಳೂರು ಕ್ಷೇತ್ರದ 2,00,836 ಮತದಾರರ ಪೈಕಿ 1,59,534 ನಮೂನೆಗಳನ್ನು ವಿತರಿಸಿದ್ದು 8,210 ಗಣಕೀಕೃತವಾಗಿವೆ. ಹರಿಹರ ಕ್ಷೇತ್ರದ 2,11,023 ಮತದಾರರ ಪೈಕಿ 1,99,245 ಅರ್ಜಿ ವಿತರಣೆಯಾಗಿದ್ದು 16,023 ಗಣಕೀಕರಣಗೊಂಡಿವೆ.

ದಾವಣಗೆರೆ ಉತ್ತರ ಕ್ಷೇತ್ರದ 2,58,718 ಮತದಾರರ ಪೈಕಿ 1,44,234 ನಮೂನೆ ಹಂಚಿಕೆಯಾಗಿದ್ದು, 4,124 ಗಣಕೀಕರಣವಾಗಿವೆ. ದಾವಣಗೆರೆ ದಕ್ಷಿಣದ 2,27,996 ಮತದಾರರ ಪೈಕಿ 1,23,615 ಅರ್ಜಿಗಳನ್ನು ತಲುಪಿಸಲಾಗಿದ್ದು 3,671 ಗಣಕೀಕರಣಗೊಂಡಿವೆ.

ಮಾಯಕೊಂಡ ಕ್ಷೇತ್ರದಲ್ಲಿ 1,97,048 ಮತದಾರರ ಪೈಕಿ 1,92,307 ನಮೂನೆ ವಿತರಿಸಲ್ಪಟ್ಟು 19,147 ಗಣಕೀಕೃತವಾಗಿವೆ. ಚನ್ನಗಿರಿ ಯಲ್ಲಿ 2,03,628 ಮತದಾರರ ಪೈಕಿ 1,83,553 ನಮೂನೆ ತಲುಪಿದ್ದು 18,324 ಗಣಕೀಕರಣವಾಗಿವೆ. ಹೊನ್ನಾಳಿ ಕ್ಷೇತ್ರದಲ್ಲಿ 2,00,033 ಮತದಾರರ ಪೈಕಿ 1,60,461 ನಮೂನೆಗಳ ವಿತರಣೆ ನಡೆದಿದ್ದು 3,419 ಗಣಕೀಕರಣವಾಗಿವೆ.