ಇನ್ಮುಂದೆ ರಾತ್ರಿ ಬೀಟ್ ವ್ಯವಸ್ಥೆ ಕಡ್ಡಾಯ

ಎಸ್ಪಿ ಕಚೇರಿಯ ಸಭಾಂಗಣದಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ಪರಿಶಿಷ್ಟ ಜಾತಿ ಮತ್ತು ಪಂಗಡಗಳ ಕುಂದು ಕೊರತೆ ಸಭೆಯ ಅಧ್ಯಕ್ಷತೆ ವಹಿಸಿ, ಎಲ್ಲರ ಅಹವಾಲು ಸ್ವೀಕರಿಸಿ ಮಾತನಾಡಿದರು.

ರಾತ್ರಿ ಬೀಟ್ ಬಲಪಡಿಸಬೇಕು. ಸರ್ಕಾರಿ ಕಟ್ಟಡಗಳು, ಶಾಲಾ-ಕಾಲೇಜು ಹಾಗೂ ಸಮುದಾಯ ಭವನದ ಆವರಣದಲ್ಲಿ ಸಂಜೆ ನಂತರದ ಕೆಲ ಕಿಡಿಗೇಡಿಗಳ ಅನುಚಿತ ವರ್ತನೆಗೆ ಕಡಿವಾಣ ಹಾಕಿ. ಅಂಥವರಿಗೆ ಎಚ್ಚರಿಕೆ ನೀಡಿ, ಪೆಟ್ಟಿ ಕೇಸ್ ಮಾಡಿ. ಸಾರ್ವಜನಿಕ ಆಸ್ತಿ ನಾಶಪಡಿಸಿದ್ದಲ್ಲಿ ಪ್ರಕರಣ ದಾಖಲಿಸಿ ಎಂದು ಸೂಚನೆ ನೀಡಿದರು.

‘ದಂಪತಿ ಜಗಳವಿದ್ದಲ್ಲಿ ತಪ್ಪು ತಿದ್ದಿಕೊಳ್ಳಲು ಅವಕಾಶ ನೀಡುತ್ತೇವೆ. ಎಲ್ಲ ಪ್ರಕರಣಗಳಲ್ಲೂ ಎಫ್‌ಐಆರ್ ದಾಖಲಿಸಲಾಗದು. ಕೇಸ್ ತೀವ್ರವಾಗಿದ್ದಲ್ಲಿ ಅನಿವಾರ್ಯವಾಗಬಹುದು. ಎಲ್ಲ ಸಮಸ್ಯೆಯನ್ನು ಪೊಲೀಸರು ನೂರರಷ್ಟು ಬಗೆಹರಿಸಲಾಗದು. ಪರಿಹರಿಸುವ ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇವೆ. ಠಾಣೆಗಳಲ್ಲಿ ನಾಗರಿಕರೊಂದಿಗೆ ಸೌಜನ್ಯವಾಗಿ ವ್ಯವಹರಿಸುವಂತೆ ಸೂಚನೆ ನೀಡುತ್ತಿದ್ದೇವೆ’ ಎಂದು ಮುಖಂಡರೊಬ್ಬರ ಹೇಳಿಕೆಗೆ ಎಸ್ಪಿ ಪ್ರತಿಕ್ರಿಯಿಸಿದರು.

ಗ್ರಾಮಗಳಲ್ಲಿ ಗರಡಿ ಮನೆಗಳಿದ್ದರೆ ಸುವ್ಯವಸ್ಥೆಗೆ ತನ್ನಿ. ಆಗ ಯುವಕರು ಮೊಬೈಲ್ ಬಿಟ್ಟು ವ್ಯಾಯಾಮ ಮಾಡಲು ಅವಕಾಶ ಆಗಬಹುದು ಎಂದರಲ್ಲದೆ ಹಾಸ್ಟೆಲ್ ನಿಲಯಾರ್ಥಿಗಳಿಗೆ ಉತ್ತ್ತಮ ಹಾಗೂ ಕೆಟ್ಟ ಸ್ಪರ್ಶದ ಅರಿವಿನ ಜತೆಗೆ ಮಾದಕ ವ್ಯಸನ, ರ‌್ಯಾಗಿಂಗ್ ಇನ್ನಿತರೆ ವಿಚಾರಗಳ ಬಗ್ಗೆಯೂ ಪ್ರಾತ್ಯಕ್ಷಿಕೆ ಸಹಿತ ವಿವರಣೆ ನೀಡಲಾಗುವುದು ಎಂದು ಹೇಳಿದರು.

ಆನಗೋಡು, ಹೊನ್ನಾಳಿ, ನಾಗನೂರು ಇತರೆಡೆ ಅಕ್ರಮ ಮದ್ಯ ಹಾವಳಿ ಹೆಚ್ಚಿದೆ. ಕಿರಾಣಿ ಅಂಗಡಿಗಳಲ್ಲಿ ಮಾರುತ್ತಿದ್ದಾರೆ ಎಂಬ ದೂರು ಸಾಮಾನ್ಯವಾಗಿತ್ತು. ಅಬಕಾರಿ ಇಲಾಖೆಯವರು ಕೆಲಸ ಮಾಡದಿದ್ದರೆ ನಿಯಂತ್ರಣಕ್ಕೆ ನಮ್ಮ ಸಂಘಟನೆಯ ಐವರನ್ನು ಕೊಡುತ್ತೇವೆ ಎಂದು ನರಗನಹಳ್ಳಿ ಮೈಲಾರಪ್ಪ ಹೇಳಿದರು. ಅಬಕಾರಿ ಇಲಾಖೆ ಜತೆ ಜಂಟಿ ಕಾರ್ಯ ಕೈಗೊಳ್ಳುತ್ತೇವೆ ಎಂದು ಎಸ್ಪಿ ತಿಳಿಸಿದರು.

ಆನಗೋಡಲ್ಲಿ ಬಡ್ಡಿ ದಂಧೆ, ಮಲೇಬೆನ್ನೂರಲ್ಲಿ ಒಸಿ- ಮಟಕಾ ಹಾವಳಿ ಹೆಚ್ಚಿದೆ ಎಂದು ಪ್ರಶಾಂತ್, ವಿಶ್ವನಾಥ್ ದೂರಿದರು. ಟಿವಿ ಸ್ಟೇಷನ್ ಹಿಂಬದಿಯಲ್ಲಿ 250 ಕುಟುಂಬಗಳು ಅನಾಗರಿಕರಂತೆ ವಾಸ ಮಾಡುತ್ತಿದ್ದರೂ ಆಡಳಿತ ವ್ಯವಸ್ಥೆ ಕಣ್ತೆರೆದಿಲ್ಲ ಎಂದು ರವಿಕುಮಾರ್ ಹೇಳಿದರು.

ಆಟೋ ಚಾಲಕರು ಆಟೋಗಳಲ್ಲಿ ಹೆಚ್ಚು ಜನರನ್ನು ತುಂಬಿಕೊಂಡು ಹೋಗುತ್ತಿದ್ದಾರೆ. ದಾವಣಗೆರೆಯಿಂದ ಹರಿಹರಕ್ಕೆ ರಾತ್ರಿ ವೇಳೆ ಬಸ್ ಇಲ್ಲದ್ದನ್ನೇ ನೆಪ ಮಾಡಿಕೊಂಡು ಹೈಸ್ಕೂಲ್ ಮೈದಾನ ಆವರಣದಿಂದ ಹೆಚ್ಚು ಜನರನ್ನು ತುಂಬಿಸಿಕೊಂಡು ಹೋಗಲಾಗುತ್ತಿದೆ. ಇದನ್ನು ತಡೆಯಬೇಕು ಎಂಬ ಮನವಿ ಬಂದಾಗ ಸಂಚಾರ ಪೊಲೀಸರು ವಿಶೇಷ ಕಾರ್ಯಾಚರಣೆ ನಡೆಸುವಂತೆ ಎಸ್ಪಿ ಸೂಚನೆ ನೀಡಿದರು.

ಹರಿಹರದ ರೈಲ್ವೆ ಕೆಳಸೇತುವೆ ಬಳಿ ರಸ್ತೆಯಲ್ಲಿ ಗುಂಡಿಬಿದ್ದಿವೆ. ಶಾಲೆಗಳು ಆರಂಭವಾದರೆ ಮಕ್ಕಳಿಗೂ ಸಮಸ್ಯೆಯಾಗಬಹುದು. ಸೋಮವಾರ ರಸ್ತೆ ತಡೆ ಮಾಡುತ್ತಿದ್ದೇವೆ. ಲೋಕೋಪಯೋಗಿ ಇಲಾಖೆಯವರು ಮಾಡಲಾಗದ ಕೆಲಸವನ್ನು ಪೊಲೀಸರೇ ಮಾಡಿ ತೋರಿಸಲಿ ಎಂದು ಡಿ.ಹನುಮಂತಪ್ಪ ಕೋರಿದರು.

ಆವರಗೆರೆ ವಾಸು ಮಾತನಾಡಿ ಎಪಿಎಂಸಿ ಬಳಿ 350 ಕುಟುಂಬಗಳು ತಾತ್ಕಾಲಿಕ ವ್ಯವಸ್ಥೆಯಡಿ ಬದುಕುತ್ತಿವೆ. ಮಳೆ ಬಂದರೆ ಸಮಸ್ಯೆ ಹೆಚ್ಚಲಿದೆ. ಇದನ್ನು ಪರಿಹರಿಸಬೇಕು. ಡಿಸಿಎಂ ಟೌನ್‌ಶಿಫ್‌ನಿಂದ ಆವರಗೆರೆವರೆಗೆ ಅಳವಡಿಸಿದ ಬೀದಿಬದಿ ದೀಪಗಳಿಗೆ ಶೀಘ್ರವೇ ಚಾಲನೆ ನೀಡಬೇಕೆಂದರು.

ಕಸ ವಿಲೇವಾರಿ ಮಾಡುವವರು, ಪೌರಕಾರ್ಮಿಕರು, ಲೋಡರ್ಸ್, ಕ್ಲೀನರ್‌ಗಳಿಗೆ ಯಾವುದೇ ಭದ್ರತೆ ಇಲ್ಲ. ರಸ್ತೆ ವಿಸ್ತರಣೆ ಇನ್ನಿತರೆ ಕಾರ್ಯಾಚರಣೆ ವೇಳೆ ಹಲ್ಲೆ ಆಗುತ್ತಿವೆ. ಬಿಬಿಎಂಪಿ ಮಾದರಿಯಲ್ಲಿ ಕಮಾಂಡೋ ನಿಯೋಜಿಸಬೇಕು ಎಂದು ಮುಖಂಡ ಎಲ್.ಎಂ.ಎಚ್.ಸಾಗರ್ ಸಲಹೆ ನೀಡಿದರು. ಎಸ್ಪಿ ಈ ಪಡೆಯನ್ನು ಜಾರಿಗೊಳಿಸಿದರೆ ನಮಗೂ ಅನುಕೂಲ ಎಂದು ಹಾಜರಿದ್ದ ಪಾಲಿಕೆ ಉಪಾಯುಕ್ತರಿಗೆ ಸೂಚಿಸಿದರು.

ಫೈನಾನ್ಸ್ ಒಂದರಲ್ಲಿ ಸಾಲ ಮಾಡಿದ್ದು, ಸಾಲದ ಕಂತು ಕಟ್ಟಲು ಸಮಯ ಕೇಳಿದ್ದರೂ, ಮೊಮ್ಮಗಳ ಆಪರೇಷನ್‌ಗೆಂದು ಹೋಗುತ್ತಿದ್ದಾಗಲೇ ಬೈಕ್ ವಶಪಡಿಸಿಕೊಂಡಿದ್ದಾರೆ ಎಂದು ಗುಡಾಳ್‌ನ ದಂಪತಿ ಅಹವಾಲು ಹೇಳಿಕೊಂಡರು. ಫೈನಾನ್ಸ್‌ನವರು ರೌಡಿಗಳಂತೆ ವರ್ತಿಸುತ್ತಿದ್ದಾರೆ ಎಂದೂ ಕೆಲವರು ದೂರಿದಾಗ ಈ ಪ್ರಕರಣದಲ್ಲಿ ಉಭಯತರರನ್ನೂ ಕರೆಸಿ ಮಾತನಾಡಿ ಕ್ರಮ ವಹಿಸುವಂತೆ ಎಸ್ಪಿ ಹೇಳಿದರು.

ದಾಗಿನಕಟ್ಟೆ ಪಿಎಚ್‌ಸಿಯಲ್ಲಿ ಹೊರಗೆ ಔಷಧ ಚೀಟಿ ಬರೆದುಕೊಡಲಾಗುತ್ತಿದೆ. ಯಲವಟ್ಟಿ ಆಸ್ಪತ್ರೆಯಲ್ಲಿ ವೈದ್ಯರ ಕೊರತೆ ಇದೆ. ಆಜಾದ್‌ನಗರ ಆಸ್ಪತ್ರೆಯಲ್ಲಿ ಪಿಜಿಗಳೇ ಕಾರ್ಯ ನಿರ್ವಹಿಸುತ್ತಿರುವ ಬಗ್ಗೆ ಕೆಲವರು ದೂರಿದರು. ಕೆಲವೆಡೆ ಸ್ಮಶಾನಗಳಿಗೆ ಜಾಗ ಒದಗಿಸದ್ದರಿಂದ ರಸ್ತೆಯಲ್ಲೇ ಶವ ಹೂಳುವ ಪರಿಸ್ಥಿತಿ ಇದೆ ಎಂಬುದಾಗಿ ಕೇಳಿ ಬಂದಿತು.

ಎಸ್‌ಒಜಿ ಕಾಲನಿಯಿಂದ ಹೈಟೆಕ್ ಆಸ್ಪತ್ರೆ ರಸ್ತೆ ಕಿರಿದಾಗಿದೆ ಎಂದು ತಿಮ್ಮಣ್ಣ ಹೇಳಿದರು. ಹಾಸ್ಟೆಲ್‌ಗಳಲ್ಲಿ ಕಾನೂನು ವಿದ್ಯಾರ್ಥಿಗಳಿಗೆ ಪ್ರವೇಶ ನಿರಾಕರಿಸಲಾಗುತ್ತಿದೆ ಎಂಬುದಾಗಿ ಹನುಮಂತನಾಯ್ಕ ಹೇಳಿದರು.

ಕೆಲವೆಡೆ ರಸ್ತೆಗಳಲ್ಲಿ ಹಂಪ್ಸ್ ಹಾಕಲು ಬೇಡಿಕೆ ಬಂದಾಗ ‘ರಸ್ತೆಯಲ್ಲಿ ಆಗಿರುವ ಅಪಘಾತಗಳ ಸಂಖ್ಯೆ ಆಧರಿಸಿ ಹಂಪ್ಸ್ ಬಗ್ಗೆ ನಿರ್ಧರಿಸಲಾಗುವುದು. ಕೆಲವೆಡೆ ಪರ್ಯಾಯ ಕ್ರಮ ಕೈಗೊಳ್ಳಬಹುದು’ ಎಂದು ಎಸ್ಪಿ ಹೇಳಿದರು.

ಸಭೆಯಲ್ಲಿ ಚನ್ನಗಿರಿ ಡಿವೈಎಸ್ಪಿ ಬಿ.ಎಸ್.ಬಸವರಾಜ್, ನಗರ ಡಿವೈಎಸ್ಪಿ ಶರಣ ಬಸವೇಶ್ವರ, ಸಿ ಕಚೇರಿಯ ತಹಸೀಲ್ದಾರ್ ಪ್ರಶಾಂತ್, ಗ್ರೇಡ್2 ತಹಸೀಲ್ದಾರ್ ಕೆ.ಆರ್.ದೇವರಾಜ್ ಇದ್ದರು.