ಸೈದ್ಧಾಂತಿಕ ಚಳವಳಿಯಿಂದ ಹೊಸ ಬೆಳಕು

ಸರ್ಕಾರಿ ಕನ್ನಡ ಶಾಲೆಗಳ ಉಳಿವಿಗಾಗಿ, ಕ್ಯಾಂಪಸ್ ಡೆಮಾಕ್ರಸಿ ಉಳಿಸಲು, ವಿದ್ಯಾರ್ಥಿ ಸಂಘದ ಚುನಾವಣೆ ನಡೆಸಲು ಒತ್ತಾಯಿಸಿ ಹರಿಹರ ಹೊರವಲಯದ ಪ್ರೊ. ಕೃಷ್ಣಪ್ಪ ಭವನದಲ್ಲಿ ಹಮ್ಮಿಕೊಂಡಿರುವ ಭಾರತ ವಿದ್ಯಾರ್ಥಿ ಫೆಡರೇಷನ್‌ನ ರಾಜ್ಯ ಮಟ್ಟದ ಅಧ್ಯಯನ ಶಿಬಿರ ಉದ್ಘಾಟಿಸಿ ಮಾತನಾಡಿದರು.

ಕ್ರಾಂತಿಕಾರಿ ಸಂಘಟನೆಯ ಶಿಬಿರ ಹರಿಹರದಲ್ಲಿ ನಡೆಯುತ್ತಿರುವುದೇ ಹೊಸ ಬೆಳಕು ತರುವ ಸಂದರ್ಭವಾಗಿದೆ. ಚಳವಳಿ ಹುಟ್ಟು ಹಾಕಿದ ಅನೇಕ ನಾಯಕರ ತ್ಯಾಗ ಸ್ಪೂರ್ತಿಯಾಗಬೇಕು. ಈ ಅಧ್ಯಯನ ಶಿಬಿರ ಚರಿತ್ರೆ ಸೃಷ್ಟಿಸಲಿ ಹಾಗೂ ಹೊಸ ನಾಯಕರು ಹುಟ್ಟಿ ಬರಲಿ ಎಂದು ಆಶಿಸಿದರು.

ಸಮಾಜ ವಿಜ್ಞಾನಿ, ಚಿಂತಕ ಜಿ.ಎನ್.ನಾಗರಾಜ್ ಮಾತನಾಡಿ, ನಮ್ಮ ದೇಶದಲ್ಲಿ ಪ್ರಜಾಪ್ರಭುತ್ವದ ಅರ್ಥ ಅನೇಕರಿಗೆ ತಿಳಿದಿಲ್ಲ. ಇಂದು ನಮಗೆ ಸ್ವಾತಂತ್ರ್ಯ ಸಿಕ್ಕಿದೆಯೇ? ನಾವು ಮಾತನಾಡುವ, ಬದುಕುವ, ನಮ್ಮ ವಾತಾವರಣವನ್ನು ನಾವೇ ಸೃಷ್ಟಿಸಿಕೊಳ್ಳುವುದು ಹಾಗೂ ಪೂರಕ ವಾತಾವರಣ ಕಲ್ಪಿಸಿಕೊಳ್ಳುವುದೇ ಸ್ವಾತಂತ್ರೃವಾಗಿದೆ ಎಂದರು.

ಇಂದಿನ ಶಿಕ್ಷಣ ಬ್ರಿಟಿಷ್ ಕಾಲದ ವ್ಯವಸ್ಥೆಯನ್ನು ಮುಂದುವರಿಸಿದೆ. ಇದು ಗುಮಾಸ್ತರನ್ನು ಸೃಷ್ಟಿಸುವ ವ್ಯವಸ್ಥೆಯ ಭಾಗವಾಗಿದೆ. ಇಂತಹ ಸಂದರ್ಭದಲ್ಲಿ ಎಸ್‌ಎಫ್‌ಐ ತನ್ನ ನಾಯಕರಿಗೆ ಸೈದ್ಧಾಂತಿಕ ತರಗತಿಗಳನ್ನು ನೀಡುವ ಮೂಲಕ, ಶಿಕ್ಷಣ ವ್ಯವಸ್ಥೆಗೆ ತೊಡಕಾಗಿರುವ ಸಮಸ್ಯೆಗಳ ವಿರುದ್ಧ ಹೋರಾಟಗಳನ್ನು ರೂಪಿಸುವ ಪ್ರಯತ್ನ ಮಾಡುತ್ತಿದೆ. ವಿದ್ಯಾರ್ಥಿ ಸಂಘಟನೆ ಬೃಹತ್ ಮಟ್ಟದಲ್ಲಿ ಬೆಳೆದು ಹೊಸ ನಾಯಕತ್ವ ನೀಡಬೇಕು ಎಂದು ಆಶಿಸಿದರು.

ಸಂಘಟನೆಯ ರಾಜ್ಯಾಧ್ಯಕ್ಷ ಶಿವಪ್ಪ ಅಂಬ್ಲಿಕಲ್ ಮಾತನಾಡಿ, ದೇಶದ ಉದ್ದಗಲಕ್ಕೂ ವಿದ್ಯಾರ್ಥಿಗಳ ಸಮಸ್ಯೆಗಳನ್ನು ಎಸ್‌ಎಫ್‌ಐ ಕೈಗೆತ್ತಿಕೊಂಡು ನಿರಂತರ ಹೋರಾಟಗಳನ್ನು ರೂಪಿಸುತ್ತಾ ಬರುತ್ತಿದೆ. ವಿದ್ಯಾರ್ಥಿ ಚುನಾವಣೆ ಆರಂಭಗೊಳ್ಳಲಿದೆ. ಇದರ ನಡುವೆ ಶಿಕ್ಷಣದ ಸಮಸ್ಯೆಗಳು ನಿರಂತರವಾಗಿ ದ್ವಿಗುಣಗೊಳ್ಳುತ್ತಿವೆ. ವಿದ್ಯಾರ್ಥಿಗಳ ಮೇಲಿನ ದಾಳಿ, ದೌರ್ಜನ್ಯಗಳು, ಆಡಳಿತಾತ್ಮಕ ಸಮಸ್ಯೆಗಳು ಹೆಚ್ಚುತ್ತಿವೆ ಇವೆಲ್ಲವುಗಳ ಪರಿಹಾರಕ್ಕಾಗಿ ನಾಲ್ಕು ದಿನದ ಶಿಬಿರ ನಡೆಯುತ್ತಿದೆ ಎಂದರು.

ರಾಜ್ಯ ಕಾರ್ಯದರ್ಶಿ ಟಿ.ಎಸ್. ವಿಜಯಕುಮಾರ್ ಪ್ರಾಸ್ತಾವಿಕ ಮಾತನಾಡಿದರು. ವೇದಿಕೆಯಲ್ಲಿ ರಾಜ್ಯ ಉಪಾಧ್ಯಕ್ಷ ಎಸ್.ಬಸವರಾಜ, ಗಣೇಶ ರಾಥೋಡ್, ದೊಡ್ಡ ಬಸವರಾಜ ಗುಳೆದಾಳ, ರಾಜ್ಯ ಸಮಿತಿ ಸದಸ್ಯೆ ರಜಿಯಾ ಯಾಸ್ಮಿನ್ ಇದ್ದರು. ಜಿಲ್ಲಾ ಸಂಚಾಲಕ ಅನಂತರಾಜ್ ಸ್ವಾಗತಿಸಿದರು. ಚಂದ್ರು ರಾಥೋಡ್ ಕಾರ್ಯಕ್ರಮ ನಿರ್ವಹಿಸಿದರು. ವೀರೇಶ ವಂದಿಸಿದರು.

---

ಹರಿಹರ ಹೊರವಲಯದ ಪ್ರೊ. ಕೃಷ್ಣಪ್ಪ ಭವನದಲ್ಲಿ ಹಮ್ಮಿಕೊಂಡಿರುವ ಭಾರತ ವಿದ್ಯಾರ್ಥಿ ಫೆಡರೇಷನ್‌ನ ರಾಜ್ಯ ಮಟ್ಟದ ಅಧ್ಯಯನ ಶಿಬಿರವನ್ನು ವಿಶ್ವಮಾನವ ಮಂಟಪ ಸ್ಥಾಪಕ ಆವರಗೆರೆ ರುದ್ರಮುನಿ ತಮಟೆ ಬಾರಿಸುವ ಮೂಲಕ ಉದ್ಘಾಟಿಸಿದರು. ಶಿವಪ್ಪ ಅಂಬ್ಲಿಕಲ್, ಜಿ.ಎನ್.ನಾಗರಾಜ್, ಟಿ.ಎಸ್. ವಿಜಯಕುಮಾರ್, ಎಸ್.ಬಸವರಾಜ, ಗಣೇಶ ರಾಥೋಡ್, ದೊಡ್ಡ ಬಸವರಾಜ ಗುಳೆದಾಳ, ರಜಿಯಾ ಯಾಸ್ಮಿನ್ ಇದ್ದರು.