ಮಂಜು ಮೊಗವೀರ್ ಮಿ.ಇಂಡಿಯಾ ರನ್ನರ್‌ಅಪ್

ಮಿಸ್ಟರ್ ಇಂಡಿಯಾ ದೇಹದಾರ್ಢ್ಯ ಸ್ಪರ್ಧೆಯಲ್ಲಿ ದೇಶದ ವಿವಿಧೆಡೆಗಳಿಂದ ಭಾಗಿಯಾಗಿದ್ದ 380 ಕ್ರೀಡಾಪಟುಗಳ ಪೈಕಿ, ಕರ್ನಾಟಕದಿಂದ ಪ್ರಶಸ್ತಿ ಪಡೆದವರಲ್ಲಿ ಮಂಜು ಮೊಗವೀರ್ ಮೊದಲಿಗರು. 100 ಕೆಜಿ ತೂಕದ ವಿಭಾಗದಲ್ಲಿ ಪ್ರಶಸ್ತಿ ಪಡೆದು ಜಿಲ್ಲೆಗೆ ಕೀರ್ತಿ ತಂದಿದ್ದಾರೆ ಎಂದು ಮುಖಂಡ ನೂರ್ ಅಹ್ಮದ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಶಿವರಾಂ - ಬೇಬಿ ದಂಪತಿ ಮಗನಾದ ಮಂಜು ಮೊಗವೀರ್ ಪದವೀಧರರಾಗಿದ್ದು 25 ವರ್ಷದಿಂದ ದಾವಣಗೆರೆಯಲ್ಲಿ ನೆಲೆಸಿದ್ದಾರೆ. 2025ರಲ್ಲಿ ಆಂಧ್ರದಲ್ಲಿ ನಡೆದ ಲ್ ಇಂಡಿಯಾ ಯೂನಿವರ್ಸಿಟಿ ಚಾಂಪಿಯನ್ ಶಿಪ್‌ನಲ್ಲಿ ಚಿನ್ನದ ಪದಕ ಗಳಿಸಿದ್ದರು. 2013ರಿಂದ ಸತತ ಮೂರು ವರ್ಷಗಳ ಕಾಲ ಭಾರತ ಉದಯ ಭಾರತ ಕಿಶೋರ ಭಾರತ ಶ್ರೇಷ್ಠ ಪ್ರಶಸ್ತಿ, 2015ರಲ್ಲಿ ಆಂಧ್ರದಲ್ಲಿ ನಡೆದಿದ್ದ ಆಲ್ ಇಂಡಿಯಾ ಯೂನಿವರ್ಸಿಟಿ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನದ ಪದಕ ಪಡೆದಿದ್ದರು.

2016ರಲ್ಲಿ ಹಾಂಕಾಂಗ್‌ನಲ್ಲಿ ನಡೆದಿದ್ದ ಮಿಸ್ಟರ್ ಒಲಂಪಿಯಾ ಸ್ಪರ್ಧೆಯಲ್ಲಿ 18 ದೇಶದ ಪಟುಗಳು ಭಾಗಿಯಾಗಿದ್ದರು. ಅಲ್ಲಿ ಆರನೇ ಸ್ಥಾನ ಗಳಿಸಿದ್ದರು. 2016ರಲ್ಲಿ ಕೇಳದಲ್ಲಿ ಜೂನಿಯರ್ ಮಿಸ್ಟರ್ ಇಂಡಿಯಾ ಸ್ಪರ್ಧೆಯಲ್ಲಿ ಪ್ರಥಮ ಸ್ಥಾನದೊಂದಿಗೆ ಚಾಂಪಿಯನ್ಸ್ ಆಫ್ ಚಾಂಪಿಯನ್ ಆಗಿದ್ದರು. 2023ರಲ್ಲಿ ಬೆಳಗಾವಿಯಲ್ಲಿ ಸತೀಶ್ ಶುಗರ್ಸ್‌ ರಾಷ್ಟ್ರೀಯ ದೇಹದಾರ್ಢ್ಯ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಗಳಿಸಿದ್ದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸ್ಪರ್ಧೆ ಮಾಡಲಿದ್ದಾರೆ ಎಂದು ವಿವರಿಸಿದರು.

ಮಂಜು ಮೊಗವೀರ್ ಮಾತನಾಡಿ ದೇಹದಾರ್ಢ್ಯ ಬಹು ವೆಚ್ಚದಾಯಕವಾದುದು. ವಿವಿಧ ಗಮನಾರ್ಹ ಸ್ಪರ್ಧೆಗಳಲ್ಲಿ ಸಾಧನೆ ಮಾಡಿದ ಪಟುಗಳಿಗೆ ಇತರೆ ರಾಜ್ಯಗಳಲ್ಲಿ ಪ್ರಾಯೋಜಕತ್ವ ಸೇರಿ ಉತ್ತಮ ಸ್ಪಂದನೆ ಸಿಗುತ್ತಿದೆ. ಇದು ಕರ್ನಾಟಕದ ಮಟ್ಟಿಗೆ ಆಗುತ್ತಿಲ್ಲ. ಇದು ಸಾಧ್ಯವಾದರೆ ಹೆಚ್ಚಿನ ಪಟುಗಳಿಗೆ ಅನುಕೂಲವಾಗಲಿದೆ ಎಂದು ತಿಳಿಸಿದರು. ಸುದ್ದಿಗೋಷ್ಠಿಯಲ್ಲಿ ಮಹ್ಮದ್ ಜಿಲಾನಿ, ಮಹೇಶ್, ಕೌಶಿಕ್ ಇತರರಿದ್ದರು.