ಮಾಯಕೊಂಡ ಕೆಪಿಎಸ್‌ಗೆ ನ್ಯಾಯಾಧೀಶ ಭೇಟಿ

ನ.23 ರಂದು ವಿಜಯವಾಣಿ ದಿನಪತ್ರಿಕೆಯಲ್ಲಿ 'ಶೌಚಗೃಹದ ಎದುರು ಉದ್ದನೆಯ ಸರತಿ ಸಾಲು, ವಿದ್ಯಾರ್ಥಿನಿಯರ ಗೋಳು' ಎಂಬ ಶೀರ್ಷಿಕೆಯಡಿ ವರದಿ ಪ್ರಕಟವಾಗಿತ್ತು. ಇದನ್ನು ಗಮನಿಸಿ ಶಾಲೆಯ ಕುಂದುಕೊರತೆಗಳ ವರದಿ ಸಲ್ಲಿಸುವಂತೆ ಹೈಕೋರ್ಟ್ ಸೂಚನೆ ನೀಡಿತ್ತು.

ಪ್ರೌಢಶಾಲಾ ವಿಭಾಗದ ಹಳೆಯ ಕಟ್ಟಡ, ಪಿಯು ಕಾಲೇಜು, ಪ್ರಾಥಮಿಕ ಹಾಗೂ ಪ್ರೌಢಶಾಲಾ ವಿಭಾಗಗಳನ್ನು ನ್ಯಾಯಾಧೀಶರು ವೀಕ್ಷಿಸಿದರು. ಪ್ರತಿ ತರಗತಿಗಳಿಗೂ ಭೇಟಿ ನೀಡಿ ಮಕ್ಕಳೊಂದಿಗೆ ಮಾತುಕತೆ ನಡೆಸಿದರು. ನಂತರ ಎಲ್ಲ ಪ್ರಾಚಾರ್ಯರು, ಮುಖ್ಯಶಿಕ್ಷಕರು ಸೇರಿ ಎಲ್ಲ ವಿಭಾಗಗಳ ಮುಖ್ಯಸ್ಥರೊಂದಿಗೆ ಸಭೆ ನಡೆಸಿದರು. ಅಗತ್ಯ ಶೌಚಗೃಹ, ಶುದ್ಧ ಕುಡಿಯುವ ನೀರು, ಪೀಠೋಪಕರಣಗಳು, ಬಿಸಿಯೂಟ ಇತರ ಮೂಲಸೌಕರ್ಯ ಮತ್ತು ಕುಂದು ಕೊರತೆಗಳ ಕುರಿತು ಮಾಹಿತಿ ಪಡೆದರು. ಬಳಿಕ ಮಕ್ಕಳೊಂದಿಗೆ ನೆಲದ ಮೇಲೆ ಕುಳಿತು ಬಿಸಿಯೂಟ ಸವಿದರು.

ನಂತರ ಮಾತನಾಡಿ, ಶಾಲೆಯ ಸಮಗ್ರ ಮಾಹಿತಿ ಸಲ್ಲಿಸುವಂತೆ ಹೈಕೋರ್ಟ್ ಆದೇಶಿಸಿದೆ. ಅದರಂತೆ ವರದಿ ಪಡೆದು ಶಾಲೆಯನ್ನು ಅಭಿವೃದ್ಧಿ ಪಡಿಸಲಾಗುವುದು ಎಂದು ತಿಳಿಸಿದರು.

ಪದವಿ ಕಾಲೇಜು ಪ್ರಾಚಾರ್ಯೆ ಡಾ. ತ್ರಿವೇಣಿ, ಕೆಪಿಎಸ್ ಪ್ರಾಚಾರ್ಯ ಡಾ.ಸಿ. ಬಸವರಾಜಪ್ಪ, ಉಪ ಪ್ರಾಚಾರ್ಯ ಟಿ.ಎಸ್. ನಾಗರಾಜ್, ಹಿರಿಯ ಶಿಕ್ಷಕ ಪಿ. ನಾಗರಾಜಪ್ಪ, ಎಚ್.ಪಿ. ರವಿಕುಮಾರ್, ಉಪನ್ಯಾಸಕರಾದ ಸುರೇಶ್, ಶಿಕ್ಷಕರಾದ ಕಲ್ಲೇಶ್, ಶಶಿರಾಜ್, ಅಂಜಿನಮ್ಮ, ಡಿಸಿಪಿಒ ಕಚೇರಿಯ ಚಂದ್ರಶೇಖರ್, ಕಾನೂನು ವಿದ್ಯಾರ್ಥಿ ತ್ಯಾಗರಾಜ್ ಮತ್ತಿತರರು ಇದ್ದರು.