ಸಮಾಜದ ಜತೆಗಿರಲಿ ಸಾವಯವ ಸಂಬಂಧ

ನಗರದ ಕುವೆಂಪು ಕನ್ನಡ ಭವನದಲ್ಲಿ ಸೋಮವಾರ ಹಮ್ಮಿಕೊಂಡಿದ್ದ ವಿಶ್ವ ಮಾನವ ದಿನಾಚರಣೆ ಕಾರ್ಯಕ್ರಮದಲ್ಲಿ ಸಾಹಿತಿ ಎನ್.ಟಿ. ಎರ‌್ರಿಸ್ವಾಮಿ ರಚಿತ ಐದು ಕೃತಿಗಳನ್ನು ಬಿಡುಗಡೆಗೊಳಿಸಿ ಮಾತನಾಡಿದರು.

ಹಳ್ಳಿಗಳಿಂದು ವೃದ್ಧರ ತಾಣವಾಗುತ್ತಿವೆ. ಮನೆ ಮನೆಗೆ ಪೊಲೀಸ್ ಕಾರ್ಯಕ್ರಮದಡಿ ಹಳ್ಳಿಗಳಿಗೆ ಹೋದಾಗ ಅಲ್ಲೆಲ್ಲ ವೃದ್ಧರ ಸಂಖ್ಯೆ ನಿಧಾನವಾಗಿ ಹೆಚ್ಚುತ್ತಿದೆ. ಯುವಕರು ಹಕ್ಕಿಯಂತೆ ವಿದೇಶಗಳಿಗೆ ಹಾರುತ್ತಿದ್ದಾರೆ, ಆದರೆ ಮರಳುತ್ತಿಲ್ಲ. ದೂರದಿಂದಲೇ ಹಣಕಾಸು ನಿರ್ವಹಣೆ ಮಾಡಿದರೂ ಕುಟುಂಬದೊಂದಿಗೆ ಸಾವಯವ ಸಂಬಂಧ ಇಲ್ಲವಾಗಿದೆ ಎಂದು ವಿಷಾದಿಸಿದರು.

ಎರ‌್ರಿಸ್ವಾಮಿ ಅವರ ಕೃತಿಗಳಲ್ಲಿ ಗ್ರಾಮೀಣಾಭಿವೃದ್ಧಿ ಹಾಗೂ ಸಾವಯವ ಸಂಬಂಧದ ಧ್ವನಿ ಇದೆ ಎಂದ ಅವರು, ಸಮಾಜದೊಂದಿಗೆ ನಮ್ಮಲ್ಲಿ ಸಾವಯವ ಸಂಬಂಧವಿಲ್ಲವಾದರೆ ಪರಾಧೀನರಾಗುತ್ತೇವೆ. ಯಾವುದಕ್ಕೂ ಸಂಬಂಧವಿಲ್ಲದಂತೆ ತರಗೆಲೆಗಳಂತೆ ಉದುರಿ ಹೋಗುತ್ತೇವೆ ಎಂದು ಆತಂಕ ವ್ಯಕ್ತಪಡಿಸಿದರು.

ಅಕ್ಷರ ನಿರಾಕರಿಸಿದ ಶೂದ್ರ ಸಮುದಾಯದಲ್ಲಿ ಅಕ್ಷರ ಗಳಿಸಲು ಕುವೆಂಪು ಅವರು ನಡೆಸಿದ ಪ್ರಯತ್ನ ಮತ್ತು ಆನಂತರದ ಹಾದಿ ದುರ್ಗಮವಾಗಿತ್ತು. ಅವೈದಿಕ ಹಿನ್ನೆಲೆಯಿಂದ ಬಂದ ವ್ಯಕ್ತಿ ಏನನ್ನು ಸಾಧಿಸಬಹುದು ಎಂಬುದನ್ನು ಕುವೆಂಪು ಅವರು ತೋರಿದ್ದಾರೆ. ಅವರ ಭಾಷಣ, ಸಾಹಿತ್ಯದಲ್ಲಿ ವೈಜ್ಞಾನಿಕ ಹಾಗೂ ವೈಚಾರಿಕ ಆಲೋಚನೆಗಳು ಕೆಲಸ ಮಾಡಿವೆ ಎಂದು ಹೇಳಿದರು.

ಕುವೆಂಪು ಅವರು ಶ್ರೀಸಾಮಾನ್ಯನನ್ನು ಭಗವಂತನಂತೆ ಕಂಡರು. ರೈತರ ಕಾಯಕವನ್ನು ಪೂಜೆ ಎಂದರು. ಪೌರಕಾರ್ಮಿಕರನ್ನು ಶಿವನಿಗೆ ಹೋಲಿಸಿದರು. ಅವರ ಕಾದಂಬರಿ, ಕಾವ್ಯಗಳಲ್ಲೂ ಕೂಡ ಅಲಕ್ಷಿತ ಪ್ರಪಂಚದ ಒಳನೋಟಗಳನ್ನು ನೀಡಿದ್ದಾರೆ. ಯಾರೂ ಅಮುಖ್ಯರಲ್ಲ ಎಂಬುದನ್ನೂ ಹೇಳಿದ್ದಾರೆ ಎಂದು ತಿಳಿಸಿದರು.

ಅವರ ಸೃಷ್ಟಿಶೀಲ ಬರಹದಲ್ಲಿ ವಿಶ್ವ ಮಾನವ ಧರ್ಮದ ಕಲ್ಪನೆ ಇದೆ. ವ್ಯಕ್ತಿಯ ಕಾಲೆಗೆರುವುದು, ವ್ಯಕ್ತಿಪೂಜೆ ಮಾಡುವುದು ನಮ್ಮ ವೈಚಾರಿಕತೆಗೆ ಧಕ್ಕೆ ಇರಲಿದೆ, ಗುರುವಿರಲಿ, ಕವಿಯಿರಲಿ ಎಲ್ಲರನ್ನೂ ಪ್ರಶ್ನೆ ಮಾಡಬಾರದು ಎಂಬ ಮನೋಧರ್ಮ ಒಡೆದು ಹಾಕಬೇಕು ಎಂದು ಕುವೆಂಪು ಹೇಳಿದ್ದರು.

ಇಂದಿನ ಸಮಾಜ ಧರ್ಮ-ಜಾತಿಗಳ ನಡುವೆ ವಿಂಗಡನೆಯಾಗಿದ್ದು, ಜಾತಿ-ಧರ್ಮದಿಂದ ನಾವು ಬೇರೆ ಬೇರೆ ಆಗಿದ್ದೇವೆ. ನಮ್ಮೆಲ್ಲರ ಮನಸ್ಸಿನಲ್ಲಿ ಕುವೆಂಪು ಹೇಳಿದ ವೈಚಾರಿಕತೆಯ ದೀಪ ಬೆಳಗಿಸುವ ತುರ್ತು ಇಂದಿದೆ ಎಂದು ಪ್ರತಿಪಾದನೆ ಮಾಡಿದರು.

ಕಾರ್ಯಕ್ರಮ ಉದ್ಘಾಟಿಸಿದ ಶಾಸಕ ಚಿಕ್ಕಮ್ಮನಹಟ್ಟಿ ದೇವೇಂದ್ರಪ್ಪ ಮಾತನಾಡಿ ನೌಕರರಿಗೆ ನಿವೃತ್ತಿ ಇದೆ. ಆದರೆ ಸಾಧನೆಗೆ ನಿವೃತ್ತಿ ಎಂಬುದಿಲ್ಲ. ನಾನು ಮೊದಲು ಜವಾನ ಕೆಲಸದಲ್ಲಿದ್ದೆ. ಎರ‌್ರಿಸ್ವಾಮಿ ಅವರು ಕೆನರಾ ಬ್ಯಾಂಕ್‌ನ ವಿಭಾಗೀಯ ವ್ಯವಸ್ಥಾಪಕರಾಗಿ, ಮಗನ ಶಿಕ್ಷಣಕ್ಕೆ ಸಾಲ ಕೊಡಿಸಿದ್ದರು. ಅವರ ಮನೆಯಲ್ಲೇ ನಾವು ತ್ರಿವಿಧ ದಾಸೋಹ ಮಾಡಿದ್ದೇವೆ. ಅವರ ಋಣ ತೀರಿಸಲಾಗದು ಎಂದು ಹೇಳಿದರು.

ಮಕ್ಕಳನ್ನು ಎಷ್ಟೇ ವಿದ್ಯಾವಂತರನ್ನಾಗಿ ಮಾಡಿದರೂ ಸಂಸ್ಕಾರ ಎಂಬ ಬಲ್ಬ್ ನೀಡದೆ ಹೋದರೆ ಬೆಳಗುವುದಿಲ್ಲ. ಸಂಸ್ಕಾರ ಕಲಿಸಿದರೆ ಪಾಲಕರ ಜತೆಗೆ ನಾಡಿಗೆ ಬೆಳಕು ಸಿಗಲಿದೆ ಎಂದು ಹೇಳಿದರು. ಇದೇ ವೇಳೆ ಅವರು ‘ಕಷ್ಟ ಎಲ್ಲಾರಿಗೆಲ್ಲತವ್ವ..’ ಹಾಡು ಹೇಳಿ ರಂಜಿಸಿದರು.

ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು, ಜಿಲ್ಲಾ ಶರಣ ಸಾಹಿತ್ಯ ಪರಿಷತ್ತು, ಜಿಲ್ಲಾ ಸಂಸ್ಕಾರ ಭಾರತೀ, ಲಯನ್ಸ್ ಕ್ಲಬ್, ಜಿಲ್ಲಾ ಬ್ಯಾಂಕ್ ನೌಕರರ ಸಂಘದ ಸಹಯೋಗದಲ್ಲಿ ಕಾರ್ಯಕ್ರಮ ಆಯೋಜಿಸಲಾಗಿತ್ತು. ವಿಶ್ರಾಂತ ಪ್ರಾಚಾರ್ಯ ಡಾ.ನಾ. ಲೋಕೇಶ್ ಒಡೆಯರ್ ಅವರು ಕುವೆಂಪು ಜೀವನ ಕುರಿತು ಮಾತನಾಡಿದರು. ಎರ‌್ರಿಸ್ವಾಮಿ ರಚಿತ ಸಾಧನೆಗೆ ಹಾದಿ ನೂರು, ಕೆಂಚಾಪುರ ಕ್ರಾಂತಿ, ಕೆಂಚಾಪುರಂ ಕ್ರಾಂತಿಲು, ಜೇನಹನಿ, ಅರಿವಿನ ದೀವಿಗೆ ಕೃತಿಗಳ ಕುರಿತು ವಿಶ್ರಾಂತ ಪ್ರಾಚಾರ್ಯ ಡಾ. ದಾದಾಪೀರ್ ನವಿಲೇಹಾಳ್ ವಿವರಿಸಿದರು.

ಎರ‌್ರಿಸ್ವಾಮಿ, ಸಾವಿತ್ರಮ್ಮ ಎರ‌್ರಿಸ್ವಾಮಿ, ಕಸಾಪ ಜಿಲ್ಲಾಧ್ಯಕ್ಷ ಬಿ. ವಾಮದೇವಪ್ಪ, ತೊಗಲೇರಿ, ಶಸಾಪ ಜಿಲ್ಲಾಧ್ಯಕ್ಷ ಕೆ.ಬಿ. ಪರಮೇಶ್ವರಪ್ಪ, ಲಯನ್ಸ್ ಕ್ಲಬ್ ಅಧ್ಯಕ್ಷ ಎಲ್.ಎಸ್. ಪ್ರಭುದೇವ್, ಸಂಸ್ಕಾರ ಭಾರತೀ ಜಿಲ್ಲಾಧ್ಯಕ್ಷ ಬಿ. ದಿಳ್ಯೆಪ್ಪ, ಬ್ಯಾಂಕ್ ನೌಕರರ ಒಕ್ಕೂಟದ ಜಂಟಿ ಕಾರ್ಯದರ್ಶಿ ಕೆ. ರಾಘವೇಂದ್ರ ನಾಯರಿ ಇದ್ದರು.