ನವಪೀಳಿಗೆಗೆ ಇರಲಿ ಶುದ್ಧ ಪರ್ಯಾವರಣ

ಇಲ್ಲಿನ ಸೋಮೇಶ್ವರ ವಿದ್ಯಾಲಯ ಆವರಣದಲ್ಲಿ ಶುಕ್ರವಾರ ಹಮ್ಮಿಕೊಂಡಿದ್ದ ವಿಶ್ವ ಪರಿಸರ ದಿನಾಚರಣೆ ಹಾಗೂ ಪ್ರಕೃತಿ ಸಂರಕ್ಷಣಾ ಸಂಸ್ಥೆ ರಾಜ್ಯ ಘಟಕಕ್ಕೆ ಚಾಲನೆ ನೀಡಿ ಆಶೀರ್ವಚನ ನೀಡಿದರು.

ಧರ್ಮವನ್ನು ರಕ್ಷಿಸಿದರೆ ಅದು ನಮ್ಮನ್ನು ರಕ್ಷಿಸುತ್ತದೆ. ಪರಿಸರದ ವಿಚಾರದಲ್ಲೂ ಇದು ಅನ್ವಯವಾಗಲಿದೆ. ಪರಿಸರ ಸಂರಕ್ಷಣೆಯಲ್ಲಿ ಸ್ವಯಂ ಶಿಸ್ತು ಅಗತ್ಯ. ಪ್ರಕೃತಿಯು 84 ಲಕ್ಷ ಜೀವರಾಶಿಗಳಿಗೂ ಅನ್ನಾಹಾರ, ಮಳೆ, ಗಾಳಿ ಹಾಗೂ ಆಶ್ರಯ ನೀಡುತ್ತಿದೆ. ಹಾಲು ನೀಡಲು ಹಸು, ಉಸಿರು ನೀಡಲು ವೃಕ್ಷ, ಹಣ್ಣು-ಹಂಪಲಿಗೆ ಗಿಡ ಮರಗಳ ಮಹತ್ವ ಅರಿಯಬೇಕು ಎಂದರು.

ಸಕಲ ಜೀವರಾಶಿಗೂ ನೀರು ಅತ್ಯಗತ್ಯವಾಗಿದ್ದು, ನೀರಿನ ಹಿತ, ಮಿತ ಬಳಕೆಗೆ ಒತ್ತು ನೀಡಬೇಕು. ಮನೆ ಮುಂದೆ ಏನೂ ಇಲ್ಲದಿದ್ದರೆ ಕನಿಷ್ಠ ತುಳಸಿ ಗಿಡವಾದರೂ ಇರಿಸುವುದು ನಮ್ಮ ಸಂಸ್ಕೃತಿಯ ಭಾಗ ಎಂದು ಹೇಳಿದರು.

ಸಾಲು ಮರದ ತಿಮ್ಮಕ್ಕ ಹತ್ತಾರು ಸಾವಿರ ಸಸಿ ನೆಟ್ಟು ವೃಕ್ಷ ಮಾತೆಯಾಗಿದ್ದಾರೆ. ಪ್ರತಿಫಲಾಪೇಕ್ಷೆ ಇಲ್ಲದೆ, ಪರಿಸರಕ್ಕೆ ತನ್ನದೇ ಕೊಡುಗೆ ನೀಡಿದ್ದರಿಂದಲೇ ಅವರು ಸಾಕಿದ ಗಿಡ ಮರಗಳು ಆ ತಾಯಿ ಹೆಸರನ್ನು ಹೇಳುತ್ತಿವೆ ಎಂದು ತಿಳಿಸಿದರು.

ಪ್ರಕೃತಿ ಸಂರಕ್ಷಣಾ ಸಂಸ್ಥೆ ಸಂಸ್ಥಾಪಕ ರಾಜ್ಯಾಧ್ಯಕ್ಷ ಕೆ.ಬಿ.ಕೊಟ್ರೇಶ ಮಾತನಾಡಿ, ಕಸ ವಿಲೇವಾರಿ, ಸ್ವಚ್ಛತೆ, ಪರಿಸರ ಸಂರಕ್ಷಣೆ, ಚರಂಡಿ ನೀರು ಶುದ್ಧೀಕರಣ, ಪ್ಲಾಸ್ಟಿಕ್ ಬಳಕೆ ತಡೆಯುವುದು ಹೀಗೆ ಹಲವಾರು ಸದುದ್ದೇಶದಡಿ ಹೊಸ ಸಂಸ್ಥೆ ಕಟ್ಟಿದ್ದೇವೆ. ಇದರ ಮೂಲಕ ಪರಿಸರ ಪೂರಕ ಕಾರ್ಯಗಳನ್ನು ಹಮ್ಮಿಕೊಳ್ಳಲಾಗುವುದು. ಮಕ್ಕಳಲ್ಲಿ ಪರಿಸರದ ಬಗ್ಗೆ ಆಸಕ್ತಿ ಮೂಡಿಸುವ ಗುರಿ ಹೊಂದಿದ್ದೇವೆ ಎಂದರು.

ಕಸಮುಕ್ತ ಸಮಾಜ ನಿರ್ಮಾಣ ನಮ್ಮ ಉದ್ದೇಶವಾಗಿದೆ. ತ್ಯಾಜ್ಯ ಪುನರ್ಬಳಕೆಗೆ ಪ್ರಯತ್ನ ಮಾಡುತ್ತೇವೆ. ಭೂಮಿಯು ಅನಾರೋಗ್ಯಕ್ಕೆ ತುತ್ತಾಗಿದ್ದು, ಸಸ್ಯ ಸಂಪತ್ತನ್ನು ಹೆಚ್ಚಿಸುವ ಮೂಲಕ ಅದನ್ನು ಸಹಜ ಸ್ಥಿತಿಗೆ ತರುವ ಸಂಕಲ್ಪ ನಮ್ಮದು. ಸ್ವಚ್ಛ ಸುಂದರ ವಾತಾವರಣ ಕಲ್ಪಿಸಲು ಎಲ್ಲರೂ ಕೈಜೋಡಿಸೋಣ ಎಂದು ಹೇಳಿದರು.

ಸೋಮೇಶ್ವರ ವಿದ್ಯಾಸಂಸ್ಥೆ ಕಾರ್ಯದರ್ಶಿ ಕೆ.ಎಂ. ಸುರೇಶ್ ಮಾತನಾಡಿ ಪರಿಸರ ಸಂರಕ್ಷಣೆಯಲ್ಲಿ ಅನಾದಿ ಕಾಲದಿಂದಲೂ ಪ್ರಾಣಿ, ಪಕ್ಷಿಗಳ ಪಾತ್ರ ದೊಡ್ಡದು. ಅನಾದಿಯಿಂದಲೂ ಮುಂದುವರಿಯುತ್ತಿದೆ. ಭೂಮಿಯ ಮೇಲೆ ಹೇಳುವುದೆಲ್ಲವೂ ಮುಗಿದಿದ್ದು ಆಚರಣೆ ಬಾಕಿ ಇದೆ ಎಂಬ ಸಿದ್ದೇಶ್ವರ ಸ್ವಾಮಿಗಳ ಮಾತು ಅರ್ಥಪೂರ್ಣ ಎಂದರು.

ಪತ್ರಕರ್ತ ನಾಗರಾಜ ಎಸ್. ಬಡದಾಳ್ ಮಾತನಾಡಿ ಬಾಲ್ಯದಲ್ಲಿ ಕಾಣುತ್ತಿದ್ದ ಬ್ಯಾಲದಹಣ್ಣು, ಬೆಕ್ಕಿ ಹಣ್ಣು, ಕವಳಿ ಹಣ್ಣು ಂದು ಮರೆಯಾಗಿ ಇಂದು ಹಾನಿಕಾರಕ ಪಿಜ್ಜಾ, ಬರ್ಗರ್, ಫಾಸ್ಟ್‌ಫುಡ್ ಹೆಚ್ಚಿವೆ ಎಂದು ವಿಷಾದಿಸಿದರು.

ಭಾರತೀಯ ವಿಕಾಸ ಪರಿಷತ್ ಅಧ್ಯಕ್ಷ ಪ್ರಸಾದ ಬಂಗೇರ, ಹಿರಿಯ ವರ್ತಕ ಎಸ್.ಟಿ.ಕುಸುಮಶ್ರೇಷ್ಟಿ, ಶಾಲೆ ಪ್ರಾಚಾರ್ಯೆ ಪ್ರಭಾವತಿ, ಶಿಕ್ಷಕರಾದ ಕೇಶವ, ಮಾರುತಿ, ಸುನಂದಾ ವರ್ಣೇಕರ್, ಉಮಾದೇವಿ, ಸಂಘ ಸಂಸ್ಥೆಗಳ ಪ್ರಮುಖರಾದ ಗಿರೀಶ ಎಸ್.ದೇವರಮನಿ, ಕೆ.ಟಿ.ಗೋಪಾಲಗೌಡ್ರು, ನಾಗರಾಜ ಸುರ್ವೆ, ಪ್ರಸನ್ನ ಬೆಳಕೆರೆ ಇತರರಿದ್ದರು. ಭಾರತೀಯ ವಿಕಾಸ ಪರಿಷತ್‌ನ ಸ್ವಾಮಿ ವಿವೇಕಾನಂದ ಶಾಖೆ ಹಾಗೂ ಜಿಲ್ಲಾ ವರದಿಗಾರರ ಕೂಟದ ಸಹಯೋಗದಲ್ಲಿ ಕಾರ್ಯಕ್ರಮ ಆಯೋಜನೆಯಾಗಿತ್ತು.