ದಾವಣಗೆರೆ

ಕನ್ನಡ ಸಾಹಿತ್ಯ ಪರಿಷತ್ತಿಗೆ ಅನುದಾನ ಗ್ರಹಣ!

ದಾವಣಗೆರೆ ಕನ್ನಡ ಭವನ
ದಾವಣಗೆರೆ ಕನ್ನಡ ಭವನ
ಡಿ. ಎಂ. ಮಹೇಶ್
Published on: 

ಪ್ರಮುಖ ಮುಖ್ಯಾಂಶಗಳು

  • ಸಮ್ಮೇಳನಗಳಿಗೂ ದಾನಿಗಳಿಗೆ ಬೇಡುವ ದುಸ್ಥಿತಿ
  • ಭವನಗಳ ನಿರ್ಮಾಣಕ್ಕೂ ಇಲ್ಲ ಲಕ್ಷ್ಮೀಕಟಾಕ್ಷ
  • ಇಲಾಖೆ ಆಡಳಿತಾತ್ಮಕ ವಿಳಂಬ ಧೋರಣೆ

ದಾವಣಗೆರೆ: ಮಾತೃಭಾಷೆ, ಸಾಹಿತ್ಯದ ಪರಿಚಾರಕರಂತೆ ಕೆಲಸ ಮಾಡುವ ಕನ್ನಡಿಗರ ಪ್ರಾತಿನಿಧಿಕ ಸಂಸ್ಥೆ, ಕನ್ನಡ ಸಾಹಿತ್ಯ ಪರಿಷತ್ತು ಕಳೆದ ಮೂರ್ನಾಲ್ಕು ವರ್ಷದಿಂದ ಹಣಕಾಸಿನ ಸಮಸ್ಯೆ ಎದುರಿಸುತ್ತಿದೆ. ದಾವಣಗೆರೆ ಜಿಲ್ಲಾ ಹಾಗೂ ಎಲ್ಲ ತಾಲೂಕು ಘಟಕಗಳು ಈ ಸಂಕಷ್ಟದಿಂದ ನಲುಗುತ್ತಿವೆ.

ರಾಜ್ಯ ಬಜೆಟ್‌ನಲ್ಲಿ ಘೋಷಿತ 2025-26ರಲ್ಲಿ ಅನುದಾನ ಸಂಪೂರ್ಣವಾಗಿ ಬಿಡುಗಡೆಯಾಗಿಲ್ಲ. 2026-27ನೇ ಸಾಲಿನಲ್ಲೂ ಸರ್ಕಾರದಿಂದ ಹಣ ಬಾರದಿರುವುದರಿಂದ ಕನ್ನಡದ ಚಟುವಟಿಕೆಗಳಿಗೆ ದಾನಿಗಳತ್ತ ಕೈಯೊಡ್ಡುವ ಸ್ಥಿತಿ ಕಸಾಪಕ್ಕೆ ಒದಗಿ ಬಂದಿದೆ.
ಅನುದಾನ ದುರ್ಬಳಕೆ ಆರೋಪದಡಿ, ಕಸಾಪ ಅಧ್ಯಕ್ಷ ಡಾ.ಮಹೇಶ ಜೋಶಿ ವಿರುದ್ಧದ ತನಿಖೆ ಹಿನ್ನೆಲೆಯಲ್ಲಿ ಅನುದಾನ ಬಿಡುಗಡೆಗೆ ಹಿನ್ನೆಡೆಯಾಗಿದೆ. ಮಂಡ್ಯ ಜಿಲ್ಲಾ ಸಾಹಿತ್ಯ ಸಮ್ಮೇಳನದ ಬಳಿಕ ಉಂಟಾದ ವಿವಾದದ ಹಿನ್ನೆಲೆಯಲ್ಲಿ ಸರ್ಕಾರ ಕಸಾಪಕ್ಕೆ ಆಡಳಿತಾಧಿಕಾರಿಯನ್ನು ನೇಮಿಸಿದೆ. ಪ್ರಕರಣ ಸದ್ಯಕ್ಕೆ ನ್ಯಾಯಾಲಯದ ಹಂತದಲ್ಲಿದೆ.
ಕಳೆದ ವರ್ಷ ಬಜೆಟ್‌ನಲ್ಲಿ ಅನುದಾನಕ್ಕೆ ಅವಕಾಶವಾಗಿದ್ದರೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಆಡಳಿತಾತ್ಮಕ ವಿಳಂಬ ಧೋರಣೆಯಿಂದಾಗಿ ಕಸಾಪ ಜೇಬಿನಲ್ಲಿ ಬಿಡಿಗಾಸಿಲ್ಲವಾಗಿದೆ.
ಸರ್ಕಾರ, ಜಿಲ್ಲಾ ಸಾಹಿತ್ಯ ಸಮ್ಮೇಳನಕ್ಕೆ 5 ಲಕ್ಷ ರೂ., ತಾಲೂಕು ಸಮ್ಮೇಳನಕ್ಕೆ 1 ಲಕ್ಷ ರೂ. ನೀಡಬೇಕು. ಆದರೆ ಈ ಹಿಂದೆ ನಡೆಸಲಾದ ಏಳು ತಾಲೂಕು ಸಮ್ಮೇಳನದ 7 ಲಕ್ಷ ರೂ. ಇನ್ನೂ ಬಂದೇ ಇಲ್ಲ. ಬೆಳವನೂರು, ಹೆಬ್ಬಾಳ್, ಉಕ್ಕಡಗಾತ್ರಿ, ಹೊನ್ನಾಳಿ, ಸಂತೆಬೆನ್ನೂರು, ಕುರ್ಕಿ ಮತ್ತು ದಾವಣಗೆರೆಯಲ್ಲಿ ಹೀಗೆ 2022-23ನೇ ಸಾಲಿನಿಂದ ಇದುವರೆಗೂ ನಡೆದ ಏಳು ತಾಲೂಕು ಸಮ್ಮೇಳನದ ಹಣ ಬಂದಿಲ್ಲ.

2022-23ನೇ ಸಾಲಿನಲ್ಲಿ ನಡೆದ ಸಮ್ಮೇಳನಗಳನ್ನು ಅನುಮತಿ ಪಡೆದೆ ನಡೆಸಿದ್ದೆವು. ಅದರ ಆಡಿಟ್ ಮಾಡಿಸಿ ಮೂಲ ದಾಖಲೆಗಳನ್ನು ನೀಡಿದ್ದಾಗ್ಯೂ ಇದುವರೆಗೆ ಹಣ ಬಿಡುಗಡೆಯಾಗಲಿಲ್ಲ. ಹೀಗಾಗಿ ನಂತರದ ವರ್ಷದಲ್ಲಿ ಕೆಲವು ತಾಲೂಕು ಸಮ್ಮೇಳನಗಳನ್ನು ಸ್ಥಳೀಯ ಸಂಪನ್ಮೂಲಗಳಿಂದಲೇ ನಡೆಸಬೇಕಾಯಿತು ಎಂದು ಕಸಾಪ ಜಿಲ್ಲಾಧ್ಯಕ್ಷ ಬಿ. ವಾಮದೇವಪ್ಪ ತೊಗಲೇರಿ ಹೇಳುತ್ತಾರೆ.

ಕಚೇರಿ ನಿರ್ವಹಣೆ ವೆಚ್ಚಕ್ಕೂ ಖೋತಾ!

ಜಿಲ್ಲಾ ಸಮ್ಮೇಳನಗಳಿಗೆ ಅನುದಾನ ಕಡಿತವಾಗದಿರುವುದೇ ಅದೃಷ್ಟ! ಇನ್ನು ಕಚೇರಿ ನಿರ್ವಹಣೆಗೆ ಜಿಲ್ಲಾ ಘಟಕಕ್ಕೆ ವಾರ್ಷಿಕ 1.30 ಲಕ್ಷ ರೂ., ತಾಲೂಕು ಘಟಕಕ್ಕೆ 15 ಸಾವಿರ ರೂ. ನೀಡಬೇಕು. ಆದರಂತೆ ಸುಮಾರು 4 ಲಕ್ಷ ರೂ. ಹಣ ಕೂಡ ಬಂದಿಲ್ಲ.
ಸದ್ಯಕ್ಕೆ ಜಿಲ್ಲಾ ಕನ್ನಡ ಭವನ ಕಟ್ಟಡವನ್ನು ಸಾರ್ವಜನಿಕರು, ಶಾಲಾ ಕಾಲೇಜುಗಳ ಸಾಹಿತ್ಯ, ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಬಾಡಿಗೆ ರೂಪದಲ್ಲಿ ನೀಡಲಾಗುತ್ತಿದೆ. ಇದರಿಂದ ಆದಾಯ ಬರುತ್ತಿರುವ ಕಾರಣಕ್ಕೆ ಜಿಲ್ಲಾ ಕೇಂದ್ರದಲ್ಲಿ ಕಚೇರಿ ನಿರ್ವಹಣೆಗೆ ಸಮಸ್ಯೆಯಾಗಿಲ್ಲ. ಬಾಡಿಗೆ ಮೊತ್ತದಲ್ಲಿ ವಿದ್ಯುತ್ ವೆಚ್ಚ ಭರಿಸಬೇಕಿದೆ.
ಎರಡು ವರ್ಷದಿಂದ ಅನುದಾನ ಬಾರದ ಹಿನ್ನೆಲೆಯಲ್ಲಿ ಜಲಸಿರಿ ನಳವನ್ನು ವಾಣಿಜ್ಯೇತರ ಬಳಕೆ ಎಂದು ಪರಿವರ್ತಿಸಬೇಕು. ಈ ಹಿಮದಿನ ಎಲ್ಲ ವಿದ್ಯುಶ್ಚಕ್ತಿ ಬಿಲ್ ಮಾಪಿ ಮಾಡಿ, ಹೊಸ ಬಿಲ್ ನೀಡಿದರೆ ಹಣ ಕಟ್ಟುವುದಾಗಿ ಜಿಲ್ಲಾ ಘಟಕ ಈ ಹಿಂದೆ ನಗರಪಾಲಿಕೆ ಆಯುಕ್ತರಿಗೆ ಪತ್ರ ಬರೆದಿತ್ತು. ಆದರೆ ಇದಕ್ಕೆ ಯಾವುದೇ ಉತ್ತರ ಬಂದಿಲ್ಲ. ಹೀಗಾಗಿ ಸದ್ಯಕ್ಕೆ ಈ ಕಟ್ಟಡದಲ್ಲಿ ಕೊಳವೆಬಾವಿ ನೀರನ್ನೇ ಆಶ್ರಯಿಸಲಾಗಿದೆ.
ಜಿಲ್ಲಾದ್ಯಂತ ಕನ್ನಡ ಭವನಗಳ ನಿರ್ಮಾಣಕ್ಕೂ ಗ್ರಹಣ ಬಡಿದಿದೆ. ಹೊನ್ನಾಳಿ ಪಟ್ಟಣದಲ್ಲಿ ಕಟ್ಟಡ ನಿರ್ಮಾಣಕ್ಕೆ ಐದು ವರ್ಷದ ಹಿಂದೆ ಅಡಿಪಾಯ ಹಾಕಿದ್ದರೂ ಕಾಮಗಾರಿ ನಿಂತಲ್ಲೇ ನಿಂತಿದೆ. ಚನ್ನಗಿರಿಯಲ್ಲಿ ಹೊಸ ನಿವೇಶನ ದಕ್ಕಿದ್ದರೂ 32 ಲಕ್ಷ ರೂ. ಭರಿಸಲು ಶಕ್ತಿ ಕಸಾಪಕ್ಕಿಲ್ಲ. ಮಾಯಕೊಂಡದಲ್ಲೂ ಅಡಿಗಲ್ಲು ಹಾಕುವ ಕಾರ್ಯ ಇನ್ನೂ ಈಡೇರಿಲ್ಲ. ಕಸಾಪ ಜಿಲ್ಲಾಧ್ಯಕ್ಷರ ಅವಧಿ ಇನ್ನು ಮೂರೂವರೆ ತಿಂಗಳಷ್ಟೆ ಬಾಕಿ ಇದೆ.

ನುಡಿ ಜಾತ್ರೆ ನಡೆಸಲು ಪರದಾಟ

ಜಿಲ್ಲೆಯಲ್ಲೇ ಪ್ರಥಮ ಬಾರಿಗೆ ಜಿಲ್ಲಾ ಮಹಿಳಾ ಸಮ್ಮೇಳನ ಆಯೋಜಿಸಲಾಗಿದೆ. ಆದರೆ ಸರ್ಕಾರದ ಹಣವನ್ನೇ ನೆಚ್ಚಿಕೊಳ್ಳದೆ ಸ್ಥಳೀಯರ ನೆರವಿನಲ್ಲೇ ನಡೆಸಲಾಗುತ್ತಿದೆ ಎಂಬುದು ವಿಶೇಷ. ಮಹಿಳೆಯರೇ ಇದುವರೆಗೆ 2 ಲಕ್ಷ ರೂ. ಸಂಪನ್ಮೂಲ ಕ್ರೋಡೀಕರಿಸಿದ್ದಾರೆ. ಆಹ್ವಾನಪತ್ರಿಕೆಯಲ್ಲಿ ಸಂಸದೆ ಡಾ. ಪ್ರಭಾ ಮಲ್ಲಿಕಾರ್ಜುನ್, ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳ ಪತ್ನಿಯರ ಹೆಸರಿವೆ. ಅವರೇ ಸಹಾಯಹಸ್ತ ಚಾಚಿದರೆ ಸಮ್ಮೇಳನ ಅದ್ದೂರಿಯಾಗಿ ನಡೆಸಬಹುದು ಎಂಬುದು ಸಾಹಿತ್ಯಾಸಕ್ತರ ಮಾತು.

ಸಮ್ಮೇಳನಗಳಿಗೆ ನಿಗದಿತ ಅನುದಾನ ಬಾರದಿರುವುದರಿಂದ ಸಮಸ್ಯೆಯಾಗಿದೆ. ಹಣ ಬರಬಹುದು ಎಂದು ಕೆಲವೆಡೆ ತಾಲೂಕು ಅಧ್ಯಕ್ಷರು ಪಿಂಚಣಿ ಮೊತ್ತವನ್ನು ಹೊಂದಾಣಿಕೆ ಮಾಡಿ ಬಳಸಿದ್ದಾರೆ. ಜಿಲ್ಲಾ ಮಹಿಳಾ ಸಮ್ಮೇಳನಕ್ಕೂ ಯಾವ ಹಣ ಬಂದಿಲ್ಲ. ಸಾಹಿತ್ಯಾಸಕ್ತರ ನೆರವು ಬಯಸಿದ್ದೇವೆ. ಅಧಿಕಾರಿಗಳು, ಜನಪ್ರತಿನಿಧಿಗಳು ಕನ್ನಡದ ಕೆಲಸಕ್ಕೆ ಕೈಜೋಡಿಸಬೇಕು.

— ಬಿ. ವಾಮದೇವಪ್ಪ ತೊಗಲೇರಿ, ಕಸಾಪ ಜಿಲ್ಲಾಧ್ಯಕ್ಷ.

ಕಸಾಪ ಅಧ್ಯಕ್ಷ, ಜಿಲ್ಲಾ ಘಟಕಗಳ ಅವಧಿ 3 ವರ್ಷಕ್ಕೆ ಸೀಮಿತಗೊಳಿಸಬೇಕು. ಆಡಿಟ್, ಸೂಕ್ತ ಲೆಕ್ಕಪತ್ರ ಮಂಡಿಸುವ ಷರತ್ತಿನಡಿ ಸಮ್ಮೇಳನ, ಸಾಹಿತ್ಯ ಚಟುವಟಿಕೆಗೆ ಅನುಮತಿಸಬೇಕು. ಅಧಿಕಾರಿಯೊಬ್ಬರನ್ನು ಸರ್ಕಾರವೇ ಪರಿಷತ್ತಿನ ನಾಮನಿರ್ದೇಶಿತ ಸದಸ್ಯರಾಗಿ ನಿಯೋಜಿಸಿದರೆ ಸಂಸ್ಥೆಗೆ ಬಲ ಬರಲಿದೆ.

— ಬಾ.ಮ.ಬಸವರಾಜಯ್ಯ, ಸಾಹಿತಿ.

ಕಸಾಪ
Kasapa
grant deficit
ಅನುದಾನ ಖೋತಾ
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net