ಜಗಳೂರು ರಸ್ತೆ ವಿಸ್ತರಣೆ ಶತಃಸಿದ್ಧ,ಅಕ್ರಮ ತೆರವಿಗಿಲ್ಲ ಮುಲಾಜು

ತಾಲೂಕು ಮಟ್ಟದ ಅಧಿಕಾರಿಗಳು, ಪಟ್ಟಣ ಪಂಚಾಯಿತಿ ಅಧ್ಯಕ್ಷರು, ಸದಸ್ಯರ ಜತೆ ಗುರುವಾರ ರಸ್ತೆ ವಿಸ್ತರಣೆ ಸ್ಥಳ ಪರಿಶೀಲಿಸಿ ಈ ಸಂಬಂಧ ಅಧಿಕಾರಿಗಳಿಗೆ ಸಲಹೆ ಸೂಚನೆ ನೀಡಿದರು.

ಯಾರೆಷ್ಟೇ ಅಡ್ಡಿಪಡಿಸಿದರೂ ಜಗ್ಗುವುದಿಲ್ಲ. ಕೆಲ ಕಟ್ಟಡ ಮಾಲೀಕರು ಸ್ವಯಂ ಪ್ರೇರಿತರಾಗಿ ತೆರವು ಮಾಡಿಕೊಂಡಿದ್ದಾರೆ. ಇನ್ನು ಕೆಲವರು ಕಾದುನೋಡುವ ಸ್ಥಿತಿಯಲ್ಲಿದ್ದಾರೆ. ಎಲ್ಲರೂ ತೆರವಿಗೆ ಸಹಕರಿಸುವಂತೆ ಕೋರಿದರು. ಡಾ.ಬಿ.ಆರ್.ಅಂಬೇಡ್ಕರ್ ವೃತ್ತದಿಂದ ನ್ಯಾಯಾಲಯದವರೆಗೆ ದ್ವಿಮುಖ ರಸ್ತೆ ಕಾಮಗಾರಿ ಶುರುವಾಗಿದೆ. ರಸ್ತೆ ಮಧ್ಯ ವಿದ್ಯುತ್ ದೀಪಗಳನ್ನು ಅಳವಡಿಸುವುದರಿಂದ ಸುಂದರವಾಗಿ ಕಾಣಲಿದೆ ಎಂದರು. 

ಒಂದು ವರ್ಷದಿಂದ ರಸ್ತೆ ವಿಸ್ತರಣೆ ಮಾಡುವ ಉದ್ದೇಶದಿಂದ ಹತ್ತಾರು ಸಲ ಸಭೆ   ಕರೆದಿದ್ದೇವೆ. ಪಪಂ ಅಧಿಕಾರಿಗಳು ಸಾಕಷ್ಟು ಬಾರಿ ನೋಟಿಸ್ ನೀಡಿದ್ದಾರೆ. ಮೌಖಿಕವಾಗಿ ಕೂಡ ತೆರವುಗೊಳಿಸಿ ಎಂದು ಸೂಚನೆ ನೀಡಿದ್ದಾರೆ. ಆದರೂ ಕೆಲವರ ಅಸಹಕಾರದಿಂದ ಕಾಮಗಾರಿ ವಿಳಂಬವಾಗುತ್ತಿದೆ. ಅಧಿಕಾರಿಗಳು ಅನಿವಾರ್ಯವಾಗಿ ಸರ್ಕಾರದ ಸೊತ್ತನ್ನು ತೆರವುಗೊಳಿಸುತ್ತಿದ್ದಾರೆ. ರಸ್ತೆ ಮಧ್ಯದಿಂದ ಎರಡೂ ಬದಿ ಏಳು ಮೀಟರ್ ರಸ್ತೆ ಉಳಿದ ಜಾಗದಲ್ಲಿ ಡ್ರೈನೇಜ್ ಮತ್ತು ಫುಟ್‌ಪಾತ್ ನಿರ್ಮಾಣವಾಗಲಿದೆ ಎಂದು ಹೇಳಿದರು.

ಕೆಪಿಸಿಸಿ ಎಸ್ಟಿ ಘಟಕದ ಮಾಜಿ ಅಧ್ಯಕ್ಷ ಕೆ.ಪಿ. ಪಾಲಯ್ಯ, ತಹಸೀಲ್ದಾರ್ ಸೈಯದ್ ಕಲೀಂ ಉಲ್ಲಾ, ಲೋಕೋಪಯೋಗಿ ಇಲಾಖೆ ಇಂಜಿನಿಯರ್ ನಾಗರಾಜ್,  ಪುರುಷೋತ್ತಮರೆಡ್ಡಿ, ಪಪಂ ಅಧ್ಯಕ್ಷ ನವೀನ್‌ಕುಮಾರ್, ಮುಖ್ಯಾಧಿಕಾರಿ ಸಿ. ಲೋಕ್ಯಾನಾಯ್ಕಾ,  ಸದಸ್ಯರಾದ ಆದರ್ಶ, ಮಂಜುನಾಥ್, ರೇವಣಸಿದ್ದಪ್ಪ, ದೇವರಾಜ್, ಶಕೀಲ್ ಅಹಮದ್, ರಮೇಶ್ ರೆಡ್ಡಿ, ಮಹಮದ್ ಅಲಿ, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಶಂಷೀರ್ ಅಹಮದ್, ಸಣ್ಣ ತಾನಾಜಿ ಗೋಸಾಯಿ, ಕುರಿ ಜಯಣ್ಣ, ಶಾಂತಪ್ಪ, ಸಣ್ಣ ಸೂರಯ್ಯ, ಕೆಳಗೋಟೆ ಮಹಮದ್ ಅಲಿ ಮತ್ತಿತರರಿದ್ದರು. 

ಮರೇನಹಳ್ಳಿ ರಸ್ತೆ ಸಮೀಪ 5 ಎಕರೆ ಜಾಗದಲ್ಲಿ ತುಂಬ ಗುಂಡಿ ಬಿದ್ದಿರುವುದರಿಂದ ಆಸ್ಪತ್ರೆ ನಿರ್ಮಾಣ ಬೇಡ ಎಂಬ ಅಭಿಪ್ರಾಯ ಬಂದಿವೆ.ಈಗಿರುವ ಆಸ್ಪತ್ರೆ ತೆರವುಗೊಳಿಸಿ ಅದೇ ಸ್ಥಳದಲ್ಲಿ ಹೊಸದಾಗಿ ನಿರ್ಮಿಸುವಂತೆ ಕಾರ್ಯದರ್ಶಿ ಹರ್ಷಗುಪ್ತಾ ಜತೆ ಸಚಿವ  ದಿನೇಶ್ ಗುಂಡೂರಾವ್ ಮತ್ತು ನಾನು ಚರ್ಚಿಸಿದ್ದೇವೆ.ಬೆಳಗಾವಿ ಯಲ್ಲಿ ನಡೆಯಲಿರುವ ಚಳಿಗಾಲ ಅಧಿವೇಶನದಲ್ಲಿ ಸಚಿವರ ಗಮನಕ್ಕೆ ತರುವ ಕೆಲಸ ಮಾಡುತ್ತೇನೆ ಎಂದು ಶಾಸಕ ಬಿ.ದೇವೇಂದ್ರಪ್ಪ ಹೇಳಿದರು.

ರಸ್ತೆ ವಿಸ್ತರಣೆಯಲ್ಲಿ ಅಧಿಕೃತ ಕಟ್ಟಡ ತೆರವುಗೊಳಿಸುವುದರಿಂದ ಅವರಿಗೆ ಪರಿಹಾರ ನೀಡಲು 100 ಕೋಟಿ ರೂ. ಅನುದಾನ ಬೇಕಾಗುತ್ತದೆ. ಈ ಬಗ್ಗೆ ಲೋಕೋಪಯೋಗಿ ಇಲಾಖೆ  ಅಧಿಕಾರಿಗಳು ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದ್ದಾರೆ. ಈಗ ಸರ್ಕಾರಿ ಒತ್ತುವರಿ ಜಾಗವನ್ನು ಮಾತ್ರ ತೆರವುಗೊಳಿಸಿ, ಅನುದಾನ ಬಿಡುಗಡೆ ನಂತರ ಉಳಿದ ಕಟ್ಟಡಗಳನ್ನು ತೆರೆವುಗೊಳಿಸ ಲಾಗುವುದು ಎಂದು ಶಾಸಕ ಬಿ. ದೇವೇಂದ್ರಪ್ಪ ಮಾಹಿತಿ ನೀಡಿದರು.