ಇಗ್ನಿಟ್ರಾನ್ ತಾಂತ್ರಿಕ ಮಹೋತ್ಸವಕ್ಕೆ ಚಾಲನೆ

ಹೊಸತನ್ನು ಹುಡುಕುವ ಸೃಜನಶೀಲ ಮನಸ್ಸುಗಳಿಗೆ ಅವಕಾಶ ಒದಗಿಸುವ ವೇದಿಕೆಯಾಗಿರುವ ಈ ತಾಂತ್ರಿಕ ಉತ್ಸವವನ್ನು ಬಲೂನು ಹಾರಿ ಬಿಡುವ ಮೂಲಕ ಹ್ಯೂಮನಟಿಕ್ಸೃ್ ಸಂಸ್ಥೆಯ ಮುಖ್ಯ ಇಂಜಿನಿಯರ್ ರೇಣುಕ ಪ್ರಸಾದ್ ಜಿ.ಎಂ. ಉದ್ಘಾಟಿಸಿದರು.

ಜಿಎಂ ವಿಶ್ವವಿದ್ಯಾಲಯದ ವಿದ್ಯಾರ್ಥಿ ವ್ಯವಹಾರಗಳ ವಿಭಾಗದಿಂದ ಆಯೋಜಿಸಲಾದ ಈ ಮಹೋತ್ಸವದಲ್ಲಿ 23 ಸ್ಪರ್ಧೆಗಳು, 3 ಲಕ್ಷ ರೂ.ಗಳ ವಿಸ್ತೃತ ಪ್ರಶಸ್ತಿ ನಿಧಿ ಮತ್ತು ದೇಶದ ವಿವಿಧೆಡೆಯಿಂದ ಬಂದ 2000ಕ್ಕೂ ಹೆಚ್ಚು ನೋಂದಣಿಗಳೊಂದಿಗೆ ಇದು ಗುರುತಿಸಿಕೊಂಡಿದೆ.

ಮೂರು ದಿನಗಳ ಈ ಉತ್ಸವ ತಂತ್ರಜ್ಞಾನ, ಸೃಜನಶೀಲತೆ ಮತ್ತು ಸ್ಪರ್ಧಾತ್ಮಕತೆಯ ಸಂಯೋಜನೆಯೊಂದಿಗೆ ಸಾಗಲಿದೆ. ಮೊದಲ ದಿನ ಆಟೋ ಎಕ್ಸ್‌ಪೋ, ಬ್ಯಾನರ್ ಡ್ರಾಪ್, ಫ್ಲ್ಯಾಶ್ ಮೊಬ್ ಕಾರ್ಯಕ್ರಮಗಳಿಂದ ಆರಂಭಗೊಂಡು ವಿವಿ ಆವರಣಕ್ಕೆ ಹೊಸ ಚೈತನ್ಯ ತುಂಬಲಿದೆ.

24 ಗಂಟೆಗಳ ಕೋಡ್ ರಶ್ ಹ್ಯಾಕಥಾನ್‌ಗೆ 300ಕ್ಕೂ ಹೆಚ್ಚು ಐಡಿಯಾಗಳು ಸಲ್ಲಿಕೆಯಾಗಿದ್ದವು. 80 ತಂಡಗಳು ಆಫ್‌ಲೈನ್ ಸುತ್ತಿಗೆ ಆಯ್ಕೆಯಾಗಿದ್ದವು. ಮಾಡೆಲ್ ಕ್ವೆಸ್ಟ್, ಸಿಟಿಎಫ್, ರೋಬೋ ರೇಸ್, ಟೆಕ್ ಥೀಸೀಸ್, ನೆಕ್ಸ್ಟ್ ವೇವ್ ಪೇಪರ್ ಪ್ರೆಸೆಂಟೇಷನ್, ಇಗ್ನಿಟೆಕ್ಸ್ ಡಿಬೇಟ್, ಮಾರ್ಕೆಟ್ ಮಾವೆರಿಕ್ಸ್, ಮೂಟ್ ಕೋರ್ಟ್ ಸ್ಪರ್ಧೆಯ ಪ್ರಾರಂಭಿಕ ಹಂತಗಳು ನಡೆದವು. ಸಂಜೆ ಗೇಮಿಂಗ್ ಅಭಿಮಾನಿಗಳನ್ನು ಒಂದೆಡೆ ಸೇರಿಸುವ ಇ-ಸ್ಪೋರ್ಟ್ಸ್ ನೈಟ್ ಉತ್ಸಾಹಭರಿತ ವಾತಾವರಣವನ್ನು ಸೃಷ್ಟಿಸಿತ್ತು.

ಜಿಎಂ ವಿಶ್ವವಿದ್ಯಾಲಯದ ಕುಲಪತಿ ಡಾ. ಎಸ್.ಆರ್. ಶಂಕಪಾಲ್ ಅಧ್ಯಕ್ಷತೆ ವಹಿಸಿದ್ದರು. ಉಪ ಕುಲಪತಿ ಡಾ. ಎಚ್.ಡಿ. ಮಹೇಶಪ್ಪ, ಕುಲಸಚಿವ ಡಾ. ಸುನೀಲ್ ಕುಮಾರ್ ಬಿ.ಎಸ್, ವಿದ್ಯಾರ್ಥಿ ವ್ಯವಹಾರಗಳ ನಿರ್ದೇಶನಾಲಯದ ನಿರ್ದೇಶಕ ಡಾ. ಎಚ್.ಎಸ್. ಕಿರಣ್ ಕುಮಾರ್, ಸಹಾಯಕ ನಿರ್ದೇಶಕ ಇಮ್ರಾನ್ ಖಾನ್ ಇದ್ದರು.

ಜಿಎಂಯು ರೋಬೋಟಿಕ್ಸೃ್ ಆ್ಯಂಡ್ ಆಟೋಮೇಶನ್ ವಿದ್ಯಾರ್ಥಿಗಳು ಸಿದ್ಧಪಡಿಸಿದ ‘ರೋಬೋ ಮಿತ್ರ’ ಹೆಸರಿನ ರೋಬೋಟ್, ಅತಿಥಿಗಳಿಗೆ ಹೂವಿನ ಗುಚ್ಛ ನೀಡಿ ಸ್ವಾಗತಿಸಿದ್ದು ಗಮನ ಸೆಳೆಯಿತು. ‘ಆರಂಭ’ ಹೆಸರಿನ ರೋಬೋಟ್ ತಾಂತ್ರಿಕ ಉತ್ಸವವನ್ನು ಪ್ರತಿಬಿಂಬಿಸಿತು. ಇಸಿಇ ವಿಭಾಗದ ವಿದ್ಯಾರ್ಥಿ ಸಮರ್ಥ ಗೌಡ ಮತ್ತು ತಂಡದ ರೋಬೋ ನೃತ್ಯ ಆಕರ್ಷಿಸಿತು.

ಜೈವಿಕ ತಂತ್ರಜ್ಞಾನ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಗಣೇಶ್ ಜಿ. ಟಿಲ್ವೆ ನಿರೂಪಿಸಿದರು. ತೇಜಸ್ವಿನಿ ಡಿ. ಸ್ವಾಗತಿಸಿದರು. ಕೌಶಿಕ್ ಎಸ್‌ಪಿ ಅತಿಥಿ ಪರಿಚಯ ಮಾಡಿದರು. ಯಶವಂತ್ ವಿ.ಎಸ್. ದೇವಾಂಗ್ ವಂದಿಸಿದರು.

ಮಾತನಾಡಲು ಆಗದ, ಚಲಿಸಲು ಸಾಧ್ಯವಾಗದ ರೋಗಿಗಳಿಗೆ ನೆರವಾಗುವ ರೋಬೋಟ್ ಆಧಾರಿತ ‘ಅಯಾನ ಮೈಂಡ್ ಆರ್‌ಎಎಸ್’ ಎಂಬ ವ್ಯವಸ್ಥೆಯನ್ನು ಜಿಎಂ ವಿವಿಯ ರೋಬೋಟಿಕ್ಸ್ ಮತ್ತು ಆಟೋಮೇಶನ್ ವಿಭಾಗದ ವಿದ್ಯಾರ್ಥಿಗಳು ಆವಿಷ್ಕಾರ ಮಾಡಿದ್ದಾರೆ.

ಆಸ್ಪತ್ರೆಗೆ ದಾಖಲಾಗಿರುವ, ಐಸಿಯುನಲ್ಲಿರುವ ರೋಗಿಗಳಿಗೆ ಇದು ಸಹಾಯ ಮಾಡುತ್ತದೆ. ಇಇಜಿ ಸೆನ್ಸರ್‌ಗಳು ಮೆದುಳಿನ ತರಂಗಗಳನ್ನು, ಭಾವನೆಗಳನ್ನು, ಒತ್ತಡವನ್ನು ಪತ್ತೆಹಚ್ಚುತ್ತದೆ. 20 ನಿಮಿಷಗಳಲ್ಲಿ 6 ಲಕ್ಷ ದತ್ತಾಂಶಗಳನ್ನು ಸಂಗ್ರಹಿಸುತ್ತದೆ.

ಆರೋಗ್ಯ ಸಮಸ್ಯೆ ಎದುರಿಸುತ್ತಿರುವ, ಮಾತನಾಡಲು ಆಗದ, ಚಲನೆಯೂ ಸಾಧ್ಯವಾಗದ, ಪಾರ್ಶ್ವವಾಯು ಪೀಡಿತ ಇನ್ನಿತರ ರೋಗಿಗಳಿಗೆ ರೋಬೋಟ್ ಔಷಧ ಒದಗಿಸುವುದು ಇನ್ನಿತರ ಸಹಾಯವನ್ನು ಮಾಡುತ್ತದೆ.

ಈ ಆವಿಷ್ಕಾರದ ಸಂಬಂಧ ಕೆಲವು ಆಸ್ಪತ್ರೆಗಳೊಂದಿಗೆ ಒಡಂಬಡಿಕೆ ಮಾಡಿಕೊಳ್ಳುವ ಪ್ರಯತ್ನ ನಡೆದಿದೆ ಎಂದು ಜಿಎಂ ವಿವಿಯ ರೋಬೋಟಿಕ್ಸ್ ಮತ್ತು ಆಟೋಮೇಶನ್ ವಿಭಾಗದ ಪ್ರೊಫೆಸರ್ ಡಾ. ರಾಜಕುಮಾರ್ ಡಿ.ಜಿ. ತಿಳಿಸಿದರು.