ಸ್ವಚ್ಛತೆ ಮರೆತ ಹೊನ್ನಾಳಿ ಪುರಸಭೆ ಅಧಿಕಾರಿಗಳು sanitation

ಶುದ್ಧ ಕುಡಿಯುವ ನೀರಿನ ಘಟಕದ ಸುತ್ತ ನೀರು ನಿಂತು ಚರಂಡಿಯಂತಾಗಿದ್ದು ಸೊಳ್ಳೆಗಳ ಆಗರವಾಗಿದೆ. ಪಕ್ಕದ ಅಂಬೇಡ್ಕರ್ ಭವನದ ಬಳಿ ಆಳೆತ್ತರದಲ್ಲಿ ಗಿಡಗಂಟಿ ಬೆಳೆದು ವಿಷ ಜಂತುಗಳ ವಾಸಸ್ಥಾನವಾಗಿದ್ದು ನೈರ್ಮಲ್ಯತೆ ಮರೆಯಾಗಿದೆ. ಇದು ತಾಲೂಕಿನ ಕೋರ್ಟ್ ರಸ್ತೆಯ ದುಸ್ಥಿತಿ. sanitation

ಇದಕ್ಕೆ ಪುರಸಭೆ ಅಧಿಕಾರಿಗಳ ನಿರ್ಲಕ್ಷ್ಯ ಕಾರಣ ಎಂದು ಸ್ಥಳೀಯರು ದೂರುತ್ತಿದ್ದು, ಗಿಡಗಂಟಿ ತೆಗೆಸುವಂತೆ ಅನೇಕ ಬಾರಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಕಿಡಿ ಕಾರುತ್ತಿದ್ದಾರೆ.

ಈ ರಸ್ತೆಯ ಅಣತಿ ದೂರದಲ್ಲಿಯೇ ಪಿಯು, ಪ್ರಥಮದರ್ಜೆ ಕಾಲೇಜು, ನ್ಯಾಯಾಲಯ, ಆಸ್ಪತ್ರೆ, ತಾಲೂಕು ಕ್ರೀಡಾಂಗಣ ಇದೆ. ನಿತ್ಯ ಬೇರೆಡೆಯಿಂದ ಬಂದ ಸಾವಿರಾರು ಜನ ಈ ರಸ್ತೆಯಲ್ಲಿ ಓಡಾಡುತ್ತಾರೆ. ದುರ್ಗಿಗುಡಿ ಬಡಾವಣೆಯ 3 ರಿಂದ 6ನೇ ಕ್ರಾಸ್‌ನ ಎಲ್ಲರೂ ಇಲ್ಲಿಂದಲೇ ಓಡಾಡಬೇಕು. ಇಲ್ಲಿ ಸಂಚರಿಸುವರೆಲ್ಲ ಮೂಗು ಮುಚ್ಚಿಕೊಂಡು ಓಡಾಡಬೇಕಿದೆ.

ದುರ್ಗಿಗುಡಿ ಬಡಾವಣೆಯ ಕೆಲವು ಕ್ರಾಸ್‌ಗಳಿಂದ ಕೋರ್ಟ್ ರಸ್ತೆ ಕಡೆ ಬರುವುದಕ್ಕೆ ರಸ್ತೆಗಳೇ ಸಮರ್ಪಕವಾಗಿ ಇಲ್ಲ. ಇನ್ನು ಮಳೆಗಾಲ ಬಂದರೆ ದೇವರೆ ಗತಿ, ಮತ್ತೊಂದು ಕಡೆ ಇರುವ ರಸ್ತೆಗಳಿಗೆ ಸರಿಯಾದ ಡಾಂಬರು ಇಲ್ಲ, ಎಲ್ಲೆಂದರೆ ಅಲ್ಲಿ ಜಾಲಿಗಿಡಗಳು ಬೆಳೆದು ನಿಂತಿದೆ. ಸಂಜೆ ನಂತರ ಅಲ್ಲಿ ಓಡಾಡುವುದಕ್ಕೆ ಅಸಾಧ್ಯವಾಗಿದೆ. ಇಲ್ಲಿ ವಾಸಮಾಡುವವರ ಪಾಡೇನು ಎಂಬುದೇ ಸ್ಥಳೀಯರ ಪ್ರಶ್ನೆ.

ಈ ರಸ್ತೆಯಲ್ಲಿ ಸರ್ಕಾರಿ ಶಾಲೆ ಹಾಗೂ ಅಂಗನವಾಡಿ ಕೂಡ ಇದ್ದು ಇಲ್ಲಿ ಮಕ್ಕಳು ಓಡಾಡುವುದು ಕಷ್ಟಕರವಾಗಿದೆ. ಕಂದಾಯ ಕಟ್ಟುವ ನಮಗೆ ಮೂಲ ಸೌಕರ್ಯ ಕಲ್ಪಿಸಬೇಕು, ಸಂಬಂಧಪಟ್ಟ ಅಧಿಕಾರಿಗಳು ಇತ್ತ ಗಮನಹರಿಸಿ ಸ್ಥಳ ಪರಿಶೀಲಿಸಿ ಸಮಸ್ಯೆ ಬಗೆಹರಿಸಬೇಕು. ಸ್ವಚ್ಛತೆಗೆ ಆದ್ಯತೆ ನೀಡಬೇಕೆಂಬುದು ಸ್ಥಳೀಯರ ಒತ್ತಾಯ.

"

ಕೋರ್ಟ್ ರಸ್ತೆ ಎದುರು ಚರಂಡಿ ಕಾಮಗಾರಿ ನಡೆಯುತ್ತಿರುವ ಹಿನ್ನೆಲೆ ಇಲ್ಲಿನ ಚರಂಡಿ ನೀರು ಅಂಬೇಡ್ಕರ್ ಭವನದ ಬಳಿ ನಿಂತಿದೆ. ಕಾಮಗಾರಿ ಮುಗಿದ ಕೂಡಲೆ ಚರಂಡಿ ನೀರನ್ನು ತೆಗೆಸಲಾಗುವುದು. ಖಾಲಿ ಜಾಗದಲ್ಲಿ ಬೆಳೆದಿರುವ ಜಾಲಿಗಿಡ ಹಾಗೂ ಪಾರ್ಥೇನಿಯಂ ಗಿಡಗಳನ್ನು ನಿವೇಶನದ ಮಾಲೀಕರೇ ತೆರವು ಮಾಡಿಸಬೇಕು. ಅಂಬೇಡ್ಕರ್ ಭವನದ ಬಳಿ ಇರುವ ಗಿಡಗಂಟಿ ತೆರವು ಮಾಡಿಸಲಾಗುವುದು.

— ಲೀಲಾವತಿ ಮುಖ್ಯಾಧಿಕಾರಿ ಪುರಸಭೆ ಹೊನ್ನಾಳಿ

ದುರ್ಗಿಗುಡಿ ಬಡಾವಣೆಗೆ ಹೋಗುವುದಕ್ಕೆ ಸರಿಯಾದ ದಾರಿಗಳಿಲ್ಲ, ಚರಂಡಿ ವ್ಯವಸ್ಥೆ ಮಾಡಿಲ್ಲ, ಕೆಲವು ಮನೆಗಳ ಮುಂದೆ ಚರಂಡಿ ನೀರು ನಿಲ್ಲುತ್ತಿದೆ, ದುರ್ಗಿಗುಡಿ ಬಡಾವಣೆ ಹೈಟೆಕ್ ಸ್ಲಮ್ ಎಂದರೆ ತಪ್ಪಾಗಲಾರದು, ಪುರಸಭೆ ಅಧಿಕಾರಿಗಳು ಎಚ್ಚೆತ್ತುಕೊಂಡು ಸ್ವಚ್ಛತೆಗೆ ಮುಂದಾಗಬೇಕಿದೆ.

— ಮಂಜುನಾಥ ಬಿಂಬ ಹೊನ್ನಾಳಿ