ದಾವಣಗೆರೆ

ಗೃಹರಕ್ಷಕ ಪಡೆಗಿಲ್ಲ ವರ್ಷದ ಕೂಳು!

ಕರ್ತವ್ಯಕ್ಕೆ ಸಜ್ಜಾಗುತ್ತಿರುವ ಗೃಹರಕ್ಷಕ ಸಿಬ್ಬಂದಿ.
ಕರ್ತವ್ಯಕ್ಕೆ ಸಜ್ಜಾಗುತ್ತಿರುವ ಗೃಹರಕ್ಷಕ ಸಿಬ್ಬಂದಿ.
ಡಿ. ಎಂ. ಮಹೇಶ್
Published on: 

ಪ್ರಮುಖ ಮುಖ್ಯಾಂಶಗಳು

  • ಇಲಾಖೆವಾರು ಕರ್ತವ್ಯ ಭತ್ಯೆಯಲ್ಲೂ ತಾರತಮ್ಯ
  • ಆರೋಗ್ಯ ವಿಮೆ ಇತರೆ ಸೌಲಭ್ಯಗಳಿಂದ ನಗಣ್ಯ
  • ಬಿಡುವಿನ ವೇಳೆಯಲ್ಲಿ ಸ್ವ ಉದ್ಯೋಗಗಳತ್ತ ಚಿತ್ತ
ದಾವಣಗೆರೆ: ಯಾವುದೇ ಚುನಾವಣೆ ಎದುರಾಗಲಿ, ಹಬ್ಬ-ಜಾತ್ರೆಗಳ ಬಂದೋಬಸ್ತ್ ಇರಲಿ, ರಾಷ್ಟ್ರೀಯ ವಿಪತ್ತುಗಳೇ ಬರಲಿ.. ಈ ಎಲ್ಲ ಸಂದರ್ಭದ ರಕ್ಷಣಾ ಕಾರ್ಯದಲ್ಲಿ ನೆನಪಾಗುವವರೇ ಗೃಹರಕ್ಷಕ ಸಿಬ್ಬಂದಿ. ಪೊಲೀಸರಿಗೆ ಸಹಾಯಕರಾಗಿ ಕೆಲಸ ಮಾಡಿದರೂ ನ್ಯಾಯೋಚಿತ ಸೌಲಭ್ಯಗಳ ವಿಚಾರದಲ್ಲಿ ನಿರ್ಲಕ್ಷಿತ ವಲಯವಾಗಿದೆ!
ಕೋವಿಡ್ ಕಾಲದಲ್ಲಿ ಕರೊನಾ ಸೇನಾನಿಗಳಂತೆ ಕೆಲಸ ಮಾಡಿದ್ದ ಹೋಂ ಗಾರ್ಡ್ ಸಿಬ್ಬಂದಿಗೆ ಕರೊನಾ 1ರ ಅಲೆ ವೇಳೆ ದಿನಕ್ಕೆ 750 ರೂ. ಗೌರವಧನ ಇದ್ದದ್ದು ಎರಡನೆ ಅಲೆ ಹೊತ್ತಿಗೆ 380 ರೂ. ಸಂದಾಯವಾಗಿತ್ತು. ಕರ್ತವ್ಯ ಭತ್ಯೆ ನೀಡುವಲ್ಲಿ ಪೊಲೀಸ್ ಹೊರತಾಗಿ ಅನ್ಯ ಇಲಾಖೆಗಳಲ್ಲಿ ತಾರತಮ್ಯ ನೀತಿ ಇದೆ. ಎಲ್ಲೆಡೆಯೂ 8 ತಾಸಿನ ಸಮಾನ ಕೆಲಸ ಇರುವಾಗ ಭತ್ಯೆಗೆ ಭೇದವೇಕೆ ಎಂಬುದು ಗೃಹರಕ್ಷಕರ ಪ್ರಶ್ನೆ.
ಪೊಲೀಸ್ ಠಾಣೆಗಳಲ್ಲಿ ಹಾಗೂ ಬಂದೋಬಸ್ತ್ ಕಾರ್ಯಗಳಲ್ಲಿ ಭಾಗವಹಿಸಿದರೆ 800 ರೂ. ದಿನಭತ್ಯೆ ಇದೆ. ಪ್ರವಾಸೋದ್ಯಮ ಇಲಾಖೆಯಡಿ ಪ್ರವಾಸಿ ತಾಣಗಳಲ್ಲಿ ಪ್ರವಾಸಿ ಮಿತ್ರ ಹೆಸರಲ್ಲಿ ನಿಯೋಜನೆಯಾಗುವ ಗೃಹರಕ್ಷಕ ದಳದವರಿಗೆ 600 ರೂ. ಇದೆ.
ಉಳಿದಂತೆ ಆರ್‌ಟಿಒ, ಕೆಎಸ್‌ಆರ್‌ಟಿಸಿ, ಬೆಸ್ಕಾಂ, ಬಂದೀಖಾನೆ, ನಗರಪಾಲಿಕೆ, ಅಬಕಾರಿ, ಎನ್‌ಸಿಸಿ ಇತ್ಯಾದಿ ಕಡೆಗಳಲ್ಲಿ ಕೆಲಸ ಮಾಡಿದರೆ 500 ರೂ. ನೀಡಲಾಗುತ್ತಿದೆ. ಅಕ್ಕ ಪಡೆಯಲ್ಲಿ ನಿಯೋಜನೆ ಆದವರಿಗೂ ಇದೇ ಸಂಭಾವನೆ. 380 ರೂ. ಇದ್ದ ಗೌರವಧನಕ್ಕೆ ಕಳೆದ ವರ್ಷವಷ್ಟೇ 120 ರೂ. ಸೇರ್ಪಡೆಯಾಗಿದೆ. ಆದರೂ ಈ ಬಗ್ಗೆ ಗೃಹರಕ್ಷಕರಲ್ಲಿ ಸಮಾಧಾನವಿಲ್ಲ.
ರೈಲ್ವೆ ಹಾಗೂ ಅಗ್ನಿಶಾಮಕ ದಳದಲ್ಲಿ ಈ ಹಿಂದೆ ಬಳಸಿಕೊಳ್ಳಲಾಗುತ್ತಿದ್ದ ಗೃಹರಕ್ಷಕರ ಸೇವೆ ಕೂಡ ಸ್ಥಗಿತಗೊಂಡಿದೆ. ಇನ್ನು ಗೃಹರಕ್ಷಕರಿಗೆ ವರ್ಷದಲ್ಲಿ 2-3 ತಿಂಗಳವರೆಗೆ ಕೆಲಸ ಸಿಕ್ಕರೆ, ಉಳಿದ ದಿನಗಳಲ್ಲಿ ಅವರ ಜೀವನದ ಲೆಕ್ಕಾಚಾರವೇ ಉಲ್ಟಾಪಲ್ಟಾ. ಕೆಲವರಿಗೆ ರೊಟೇಷನ್ ಮಾದರಿಯಲ್ಲಿ ಇಲಾಖೆಗಳ ಕಾರ್ಯ ಬದಲಾವಣೆ ಆಗುತ್ತದೆ.
ಗೃಹರಕ್ಷಕರಿಗೆ ನಿಯೋಜಿತ ಕೆಲಸ ಇಲ್ಲದಿದ್ದಾಗ ಬಾಕಿ ದಿನಗಳಲ್ಲಿ ಗಾರೆ ಕೆಲಸ, ಹಮಾಲಿ, ಕೂಲಿ ಕೆಲಸ, ಕೃಷಿಕಾರ್ಯ, ಎಲೆಕ್ಟ್ರೀಷಿಯನ್, ಪ್ಲಂಬರ್, ಟೈಲರಿಂಗ್, ಕಿರಾಣಿ ಅಂಗಡಿ, ಫಾರ್ಮಸಿ ಅಂಗಡಿ ಇತ್ಯಾದಿ ಸ್ವಯಂ ಉದ್ಯೋಗಗಳಲ್ಲಿ ತೊಡಗಿಕೊಂಡಿದ್ದಾರೆ.
ಆಂಧ್ರ, ತೆಲಂಗಾಣ ಮಾದರಿಯಲ್ಲಿ ವರ್ಷದ 365 ದಿನವೂ ವಿವಿಧ ಇಲಾಖೆಗಳಲ್ಲಿ ಕೆಲಸ ನೀಡಬೇಕು. ಕೆಲವು ಸರ್ಕಾರಿ ಕಚೇರಿಗಳಲ್ಲಿ ಖಾಲಿ ಇರುವ ಸಿ ಮತ್ತು ಡಿ ದರ್ಜೆ ಹುದ್ದೆಗಳಿಗೆ ಗೃಹರಕ್ಷಕರನ್ನೇ ಹೊರಗುತ್ತಿಗೆ ಆಧಾರದಡಿ ನೇಮಕ ಮಾಡಿಕೊಳ್ಳಬೇಕು. ಹೀಗಾದಲ್ಲಿ ಅವರ ಕುಟುಂಬಗಳಿಗೆ ಆರ್ಥಿಕ ಹಾಗೂ ಸಾಮಾಜಿಕ ಭದ್ರತೆಯೂ ಸಿಗಲಿದೆ.
ತಿಂಗಳಿಗೆ ನಾಲ್ಕು ಬಾರಿ ಕಡ್ಡಾಯವಾಗಿ ಕವಾಯತಿಗೆ ಗೃಹರಕ್ಷಕರು ಹಾಜರಾಗಬೇಕಿದೆ. ಒಂದು ಪರೇಡ್‌ಗೆ ಹಾಜರಾದರೆ ನೀಡುತ್ತಿದ್ದ 22 ರೂ. 100 ರೂ.ಗೆ ಏರಿಕೆಯಾಗಿದೆ. ಆದರೆ ದೂರದೂರಿನಿಂದ ಜಿಲ್ಲಾ ಕೇಂದ್ರಕ್ಕೆ ಬಂದು ನಿಭಾಯಿಸುವ ವೆಚ್ಚ ಈ ಗೌರವಧನಕ್ಕಿಂತಲೂ ಹೆಚ್ಚಿನದೇ ಆಗಿದೆ!
ಕರ್ತವ್ಯ ನಿರತರಿದ್ದ ವೇಳೆ ಮೃತರಾದವರಿಗೆ 10 ಲಕ್ಷ ರೂ.ಗಳ ಪರಿಹಾರಧನ ಸಿಗಲಿದೆ. ಸಂತೇಬೆನ್ನೂರು ಘಟಕದ ಕೆ. ರಮೇಶ್, ಹರಿಹರ ಘಟಕದ ನಾಗಪ್ಪ ಎಂಬುವರು ಈ ವರ್ಷದಲ್ಲಿ ಮೃತರಾಗಿದ್ದು ಪರಿಹಾರಧನ ಸಿಗುವಂತಾದರೆ ಅವರ ಕುಟುಂಬಕ್ಕೂ ನೆರವಾಗಲಿದೆ.
ಜಿಲ್ಲಾ ಗೃಹರಕ್ಷಕ ದಳದಲ್ಲಿದ್ದ ಬಸ್, ಜೀಪ್ ಸಂಚಾರ ಎಫ್‌ಸಿ ಕಾರಣಕ್ಕೆ ಸ್ಥಗಿತಗೊಂಡು ಒಂದೂವರೆ ವರ್ಷ ಕಳೆದಿದೆ. ವಾಹನ ವ್ಯವಸ್ಥೆ ಆಗಬೇಕಾದ ಜರೂರತ್ತಿದೆ. ಜಿಲ್ಲಾ ಕಚೇರಿಯಲ್ಲಿ ಗೃಹರಕ್ಷಕ ದಳ ಸಿಬ್ಬಂದಿಗೆ ಬೋಧನೆ ಮಾಡುವಷ್ಟು ವಿಶಾಲ ಸಭಾಂಗಣವಿಲ್ಲ. ತರಬೇತಿ ಹಾಗೂ ವೃತ್ತಿಪರ ಕ್ರೀಡಾಕೂಟಕ್ಕೆ ಜಿಲ್ಲಾ ಸಶಸ್ತ್ರ ಮೀಸಲು ಪಡೆ ಅಥವಾ ದೇವರಾಜ ಅರಸು ಬಡಾವಣೆಯ ಮೈದಾನವನ್ನೇ ನೆಚ್ಚಿಕೊಳ್ಳಬೇಕಿದೆ.
745 ಮಂದಿ ಕಾರ್ಯ ನಿರ್ವಹಣೆ
ದಾವಣಗೆರೆ ಜಿಲ್ಲೆಯ 10 ಘಟಕಗಳಿದ್ದು ಮಂಜೂರಾದ 750 ಸಂಖ್ಯಾಬಲದಲ್ಲಿ ಸದ್ಯಕ್ಕೆ 745 ಮಂದಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇದರಲ್ಲಿ 90 ಮಹಿಳೆಯರು ಇರುವುದು ವಿಶೇಷ. ಎಸ್ಸೆಸ್ಸೆಲ್ಸಿ ಕನಿಷ್ಠ ವಿದ್ಯಾರ್ಹತೆ ಇದ್ದರೂ ಬಿಎ, ಎಂಎ, ಬಿಇಡಿ ಪದವೀಧರರು ಈ ಕೆಲಸ ಮಾಡುತ್ತಿದ್ದಾರೆ. ಇಂಜಿನಿಯರ್ ಪದವೀಧರೆ ಕೂಡ ಕೆಲವು ತಿಂಗಳು ಹೋಂಗಾರ್ಡ್ ಆಗಿಹೋದ ನಿದರ್ಶನವಿದೆ!
108 ಗೃಹರಕ್ಷಕರ ಕೆಲಸಕ್ಕೆ 223 ಜನರು ಅರ್ಜಿ ಸಲ್ಲಿಸಿದ್ದನ್ನು ಗಮನಿಸಿದರೆ ಉದ್ಯೋಗದ ಬೇಡಿಕೆಯನ್ನು ಸೂಚಿಸಲಿದೆ. ಪ್ರಥಮ ಚಿಕಿತ್ಸೆ, ಅಗ್ನಿಶಮನ, ಲಾಠಿ, ಮಾರ್ಚಿಂಗ್ ಇನ್ನಿತರೆ ತರಬೇತಿ ಪಡೆದು ಕರ್ತವ್ಯಕ್ಕೆ ಸಜ್ಜಾಗುವ ಈ ಪಡೆಗೆ ಪೊಲೀಸರ ಮಾದರಿಯಲ್ಲೇ ಆರೋಗ್ಯ ಭಾಗ್ಯ ವಿಮೆ, ಮಕ್ಕಳ ಶಿಕ್ಷಣಕ್ಕೆ ನೆರವು ಜಾರಿ ಬಗ್ಗೆಯೂ ಬೇಡಿಕೆ ಇದೆ.
ಜನರ ಗಾರ್ಡ್‌ಗಳಿವರು!
ರೈಲ್ವೆ ಇಲಾಖೆಯಲ್ಲಿ ಕರ್ತವ್ಯ ನಿರ್ವಹಣೆ ವೇಳೆ ಕೆ.ಎಸ್. ಶಶಿಧರ, ಉಮಾನಾಯ್ಕ ಅವರು ಪ್ರಯಾಣಿಕರ ಜೀವ ರಕ್ಷಿಸಿದ್ದರೆ, ಪ್ರವಾಸೋದ್ಯಮ ಇಲಾಖೆಯಡಿ ಎಂ. ಹನುಮಂತರಾಜು, ಎಚ್. ಸಾವಿತ್ರಮ್ಮ ಅವರು ಆತ್ಮಹತ್ಯೆಗೆ ಯತ್ನಿಸಿದ್ದ ಒಂದೇ ಕುಟುಂಬದ ಐವರ ಜೀವ ಕಾಪಾಡಿದ್ದಾರೆ. ಡಿ.ಎಸ್. ಪುನೀತ್ ಕೂಡ ಆತ್ಮಹತ್ಯೆಗೆ ಯತ್ನಿಸಿದವರನ್ನು ರಕ್ಷಿಸಿದ್ದಾರೆ. ಅಪಘಾತ, ಆತ್ಮಹತ್ಯೆ ಘಟನಾ ಸ್ಥಳಕ್ಕೆ ತೆರಳಿ ಶವಗಳನ್ನು ತೆಗೆಯುವ ಗಂಡುಗೆ ಇರುವ ಚನ್ನಗಿರಿಯ ಜಾಕಿರ್ ಅಲಿ ಮೊದಲಾದವರು ಹೋಂ ಗಾರ್ಡ್ ಮಾತ್ರವಲ್ಲ, ಅವರೆಲ್ಲ ಜನರ ಗಾರ್ಡ್‌ಗಳು!ದೇಷ್ಠ

ಗೃಹರಕ್ಷಕರಿಗೆ ಕರ್ತವ್ಯಕ್ಕೆ ತೆರಳಲು ಬಸ್‌ಪಾಸ್, ನಿವೃತ್ತಿ ವೇಳೆ 20 ಲಕ್ಷ ರೂ. ಇಡುಗಂಟು ನೀಡುವುದೂ ಸೇರಿ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಸರ್ಕಾರವನ್ನು ಒತ್ತಾಯಿಸಲಾಗಿದೆ. ವಿಧಾನಸಭೆ ಅಧಿವೇಶನದಲ್ಲೂ ಸಿಎಂ ಗಮನಕ್ಕೆ ತರಲಾಗುವುದು.

ಗೃಹರಕ್ಷಕರನ್ನು ನಿರಂತರ ಕೆಲಸದಲ್ಲಿ ತೊಡಗಿಸಿಕೊಳ್ಳಲು ಜಿಲ್ಲಾಡಳಿತ ಕ್ರಮ ವಹಿಸಬೇಕಿದೆ. ಭತ್ಯೆ ವಿಚಾರದಲ್ಲಿನ ತಾರತಮ್ಯ ನೀಗಬೇಕಿದೆ. ತರಬೇತಿ ನೀಡಲು ಜಿಲ್ಲಾ ಕೇಂದ್ರದಲ್ಲಿ ಕನಿಷ್ಠ 2 ಎಕರೆಯಾದರೂ ಜಾಗ ಬೇಕಿದೆ.

Homeguards
problems,
ಗೃಹರಕ್ಷಕರು,
ಸಮಸ್ಯೆಗಳು,
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net