ಜಿಲ್ಲಾಸ್ಪತ್ರೆಯಲ್ಲಿ ಉಷ್ಣಾಘಾತ ವಿಭಾಗ

ಸೂರ್ಯನ ಶಾಖದ ಪ್ರಖರತೆಯಿಂದ ಉಂಟಾಗುವ ಆರೋಗ್ಯ ಸಮಸ್ಯೆಗಳಿಗೆ ಚಿಕಿತ್ಸೆ ನೀಡಲೆಂದೇ ಪ್ರತ್ಯೇಕ ವಾರ್ಡ್ ಮಾಡಲಾಗಿದ್ದು ಅದರಲ್ಲಿ 10 ಹಾಸಿಗೆಗಳನ್ನು ಮೀಸಲಿಡಲಾಗಿದೆ.

ಒಂದು ವಾರದಿಂದ ಈ ವಾರ್ಡ್ ಆರಂಭವಾಗಿದ್ದು ಮೇ ಅಂತ್ಯದ ವರೆಗೂ ಇರಲಿದೆ. ದಾವಣಗೆರೆಯಲ್ಲಿ ಪ್ರಸ್ತುತ ಉಷ್ಣಾಂಶ 38 ಡಿಗ್ರಿ ದಾಟಿದೆ. ಮೇ ತಿಂಗಳಲ್ಲಿ ಇನ್ನೂ ಜಾಸ್ತಿಯಾಗುವ ಸಾಧ್ಯತೆ ಇರುವುದರಿಂದ ಎಲ್ಲವನ್ನೂ ಸನ್ನದ್ಧವಾಗಿ ಇಡಲಾಗಿದೆ.

ಸುಸ್ತು, ಆಯಾಸ, ನಿತ್ರಾಣವಾಗುವುದು, ದೇಹದಲ್ಲಿ ನಿರ್ಜಲೀಕರಣ, ಊಟ ಸೇರದಿರುವುದು, ವಾಂತಿಯಾಗುವುದು ಇವು, ಬೇಸಿಗೆಯಲ್ಲಿ ಸಾಮಾನ್ಯವಾಗಿ ಕಂಡುಬರುವ ಆರೋಗ್ಯ ತೊಂದರೆಗಳು. ಹೆಚ್ಚು ಹೊತ್ತು ಬಿಸಿಲಿನಲ್ಲಿ ಕೆಲಸ ಮಾಡುವವರು ಕೆಲವೊಮ್ಮೆ ಕುಸಿದು ಬೀಳುವ ಸಂದರ್ಭವಿರುತ್ತದೆ.

ಇದುವರೆಗೂ ಈ ವಿಭಾಗಕ್ಕೆ ಅಂಥ ಯಾವುದೇ ಪ್ರಕರಣಗಳೂ ಬಂದಿಲ್ಲ. ಆದರೂ ಮುನ್ನೆಚ್ಚರಿಕೆ ಕ್ರಮವಾಗಿ ಮೇ ಅಂತ್ಯದ ವರೆಗೂ ಆಸ್ಪತ್ರೆಯಲ್ಲಿ ಈ ವ್ಯವಸ್ಥೆಯನ್ನು ಮುಂದುವರಿಸಲಾಗುವುದು ಎಂದು ಮೂಲಗಳು ತಿಳಿಸಿವೆ.

ಆಸ್ಪತ್ರೆಯ ಉಷ್ಣಾಘಾತ ವಿಭಾಗದಲ್ಲಿ 10 ಹಾಸಿಗೆಗಳ ಜತೆಗೆ ಅಗತ್ಯ ಔಷಧ, ಪರಿಕರಗಳನ್ನು ಸಿದ್ಧವಾಗಿ ಇಟ್ಟುಕೊಳ್ಳಲಾಗಿದೆ. ಒಆರ್‌ಎಸ್ ಪ್ಯಾಕೆಟ್‌ಗಳು, ಐವಿ ಫ್ಲೂಯಿಡ್, ಐಸ್ ಪ್ಯಾಕ್, ಆ್ಯಂಟಿಬಯಾಟಿಕ್ ಔಷಧಗಳು, ಜ್ವರದ ಮಾತ್ರೆಗಳು, ವಾಂತಿ, ವಾಕರಿಕೆ ತಡೆಯುವ ಔಷಧಗಳನ್ನು ಇಡಲಾಗಿದೆ. ಗಂಭೀರ ಸ್ಥಿತಿಯ ರೋಗಿಗಳ ಚಿಕಿತ್ಸೆಗಾಗಿ ಐಸಿಯುನಲ್ಲಿ 2 ಹಾಸಿಗೆಗಳನ್ನು ಮೀಸಲಿಡಲಾಗಿದೆ.

ಬಿಸಿಲಿನಿಂದ ಆಗುವ ತೊಂದರೆ ತಪ್ಪಿಸಲು ಸಾರ್ವಜನಿಕರು ಕೆಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.

ಮಧ್ಯಾಹ್ನ 12 ಗಂಟೆಯಿಂದ ಸಂಜೆ 4ರ ವರೆಗೆ ಬಿಸಿಲಿನ ಪ್ರಖರತೆ ಹೆಚ್ಚಾಗಿರುವ ಕಾರಣ ಆ ಅವಧಿಯಲ್ಲಿ ಹೊರಗೆ ಓಡಾಡುವುದನ್ನು ಕಡಿಮೆ ಮಾಡಬೇಕು. ನಿರ್ಜಲೀಕರಣ ತಡೆಯಲು ಹೆಚ್ಚು ನೀರು ಕುಡಿಯಬೇಕು.

ಕಬ್ಬಿನಹಾಲು, ಎಳನೀರು, ಮಜ್ಜಿಗೆ, ರಾಗಿ ಅಂಬ್ಲಿಯಂಥ ದ್ರವ ಪದಾರ್ಥಗಳನ್ನು, ತಾಜಾ ಹಣ್ಣು, ತರಕಾರಿಗಳನ್ನು ಸೇವಿಸಬೇಕು. ಬಿಸಿಲಿನಲ್ಲಿ ಹೋಗುವಾಗ ಕೊಡೆ ಉಪಯೋಗಿಸಬೇಕು. ತೆಳುವಾದ ಕಾಟನ್ ಬಟ್ಟೆಗಳನ್ನು ಧರಿಸುವುದು ಒಳ್ಳೆಯದು.