ಮದ್ಯಪಾನ ಬಗ್ಗೆ ಸರ್ಕಾರಗಳಲ್ಲೇ ದ್ವಂದ್ವ ನೀತಿ

ಶ್ರೀಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ. ಟ್ರಸ್ಟ್‌ನ ಯೋಜನಾ ಕಚೇರಿ ಆಶ್ರಯದಲ್ಲಿ ವಿವಿಧ ಸಂಘ ಸಂಸ್ಥೆಗಳ ಸಹಯೋಗದಲ್ಲಿ ಇಲ್ಲಿನ ದಾವಣಗೆರೆ ಹರಿಹರ ಅರ್ಬನ್ ಬ್ಯಾಂಕ್ ಸಮುದಾಯ ಭವನದಲ್ಲಿ ಹಮ್ಮಿಕೊಂಡಿದ್ದ 2087ನೇ ಮದ್ಯವರ್ಜನ ಶಿಬಿರ ಉದ್ಘಾಟಿಸಿ ಮಾತನಾಡಿದರು.

ಮಧ್ಯವರ್ಜನ ಶಿಬಿರಗಳು ಮದ್ಯದಂಗಡಿಗಳ ವಿರೋಧವಲ್ಲ ಎಂದು ಧರ್ಮಸ್ಥಳ ಸಂಸ್ಥೆಯವರು ಸ್ಪಷ್ಟಪಡಿಸಿದ್ದಾರೆ. ಆದರೆ ಸರ್ಕಾರಗಳೇ ಬಾರ್-ರೆಸ್ಟೋರೆಂಟ್‌ಗಳಲ್ಲಿ ಮದ್ಯ ಮಾರಾಟದ ಗುರಿ ನಿಗದಿಪಡಿಸಿವೆ. ಸರ್ಕಾರಕ್ಕೆ ಇದರಿಂದಲೇ ಹೆಚ್ಚಿನ ಆದಾಯ ಬರಲಿದೆ ಎಂದರು.

ಕೆಲವು ರಾಜ್ಯಗಳಲ್ಲಿ ಮದ್ಯ ಮಾರಾಟ ನಿಷೇದಿಸಲಾಗಿದೆ. ಆದರೂ ಅಲ್ಲಿನ ಆರೋಗ್ಯ ಪರಿಸ್ಥಿತಿ ಸುಧಾರಿಸಿಲ್ಲ. ಅಂತಹ ರಾಜ್ಯಗಳಲ್ಲಿಯೂ ಎರಡನೇ ಹಾಗೂ ಮೂರನೇ ದರ್ಜೆಯ, ಗುಣಮಟ್ಟವಲ್ಲದ ಮದ್ಯ ಮಾರಾಟ ಆಗುತ್ತಿವೆ ಎಂದ ಅವರು, ಜನರು ಕುಡಿಯುವುದನ್ನು ಕೈಬಿಡಬೇಕು ಎಂದು ಹೇಳಿದರು.

ಧರ್ಮಸ್ಥಳ ಸಂಸ್ಥೆ ವಿರುದ್ಧ ಏನೇ ಷಡ್ಯಂತ್ರ ನಡೆದರೂ ಹೆದರುವ ಅಗತ್ಯವಿಲ್ಲ, ದೇವರಿದ್ದಾನೆ ಎಂದ ಅವರು, ಡಾ. ವೀರೇಂದ್ರ ಹೆಗ್ಗಡೆ ಅವರ ನೇತೃತ್ವದಲ್ಲಿ ಸಂಸ್ಥೆಯು ಮಹಿಳಾ ಸಬಲೀಕರಣ, ಆರ್ಥಿಕ ಉನ್ನತೀಕರಣದ ಯೋಜನೆಗಳ ಜತೆಯಲ್ಲೇ ಮಧ್ಯವರ್ಜನ ಶಿಬಿರಗಳನ್ನು ನಡೆಸುತ್ತಿರುವುದು ಉತ್ತಮ ಕೆಲಸವಾಗಿದೆ. ಆರ್ಕೆಸ್ಟ್ರಾ, ಚಿತ್ರನಟರ ಕಾರ್ಯಕ್ರಮಗಳಿಗಿಂತಲೂ ಇಂತಹ ಶಿಬಿರ ಆಯೋಜನೆ ಸುಲಭವಲ್ಲ ಎಂದರು.

ಎಲ್ಲರ ಜೀವನದಲ್ಲೂ ವಿಶೇಷ ತಿರುವುಗಳಿರುತ್ತವೆ. ಮದ್ಯಪಾನ ವ್ಯಸನಿಗಳು ಅವಕಾಶ ಬಳಸಿ ಬದಲಾಗಬೇಕು. ತಪ್ಪುಗಳನ್ನು ತಿದ್ದಿಕೊಂಡು ಒಳ್ಳೆಯ ನಾಗರಿಕರಾಗಿ ಬದುಕಬೇಕು. ಕೆಳ, ಮಧ್ಯಮ ವರ್ಗದ ಕುಟುಂಬಗಳೇ ಕುಡಿತದ ವ್ಯಸನಕ್ಕೆ ಈಡಾಗುತ್ತಿವೆ. ಮದ್ಯಪಾನ ವ್ಯಸನಿಗಳಿಗೆ ಕೆಲಸದ ಸಮಸ್ಯೆ ಜತೆಗೆ ಸಮಾಜ ಕೂಡ ಅವರನ್ನು ದೂರ ಇರಿಸಲಿದೆ. ಹೀಗಾಗಿ ವ್ಯಸನಿಗಳು ಮದ್ಯದ ದುರಭ್ಯಾಸದಿಂದ ಹೊರಬರಬೇಕು ಎಂದು ಹೇಳಿದರು.

ಪ್ರಾಸ್ತಾವಿಕ ಮಾತನಾಡಿದ ಜನಜಾಗೃತಿ ವೇದಿಕೆ ಯೋಜನಾಧಿಕಾರಿ ನಾಗರಾಜ್, ಮದ್ಯವ್ಯಸನಿಗಳನ್ನು ಚಟದಿಂದ ವಿಮುಕ್ತಗೊಳಿಸುವುದೇ ಧರ್ಮಸ್ಥಳ ಸಂಸ್ಥೆಯ ಶಿಬಿರಗಳ ಉದ್ದೇಶವೇ ಹೊರತಾಗಿ ಮಧ್ಯದಂಗಡಿಗಳ ವಿರೋಧವಲ್ಲ. ವ್ಯಸನಿಯ ಅಂತರಂಗ ತಿಳಿದಾಗ ಮಾತ್ರ ಆತನನ್ನು ಅದರಿಂದ ಹೊರತರಬಹುದು. ಹೀಗಾಗಿ 8 ದಿನದ ಶಿಬಿರಗಳಲ್ಲಿ ಯೋಗ, ಧ್ಯಾನ, ಭಜನೆ ಮೂಲಕ ಅವರ ಮನಸ್ಸು ಪರಿವರ್ತನೆ ಮಾಡಲಾಗುತ್ತಿದೆ ಎಂದರು.

ದೇಶಕ್ಕೆ ಮದ್ಯಪಾನ ಮತ್ತು ಮಾದಕ ವಸ್ತು ವ್ಯಸನವೇ ಮಾರಕವಾಗಿವೆ. ದೇಶಕ್ಕೆ ಭಯೋತ್ಪಾದಕರು, ನಕ್ಸಲರಿಗಿಂತಲೂ ಮದ್ಯಪಾನ ವ್ಯಸನಿಗಳ ಭಯವೇ ಹೆಚ್ಚಿದೆ ಎಂದ ಅವರು, 1997ರಿಂದ ಇದುವರೆಗೆ 2086 ಮದ್ಯವರ್ಜನ ಶಿಬಿರಗಳು ನಡೆದಿದ್ದು, 1.25 ಲಕ್ಷ ಜನರನ್ನು ನವಜೀವನದತ್ತ ಕರೆದೊಯ್ಯಲಾಗಿದೆ ಎಂದು ತಿಳಿಸಿದರು.

ಉದ್ಯಮಿ ಶ್ರೀನಿವಾಸ ದಾಸಕರಿಯಪ್ಪ ಮಾತನಾಡಿ ಮದ್ಯಪಾನ ವ್ಯಸನಿಯ ಮನಸ್ಸು ಪರಿವರ್ತನೆ ಮಾಡುವುದು ಸುಲಭವಲ್ಲ. ಅವರನ್ನು ಸರಿದಾರಿಗೆ ತರುವ ಧರ್ಮಸ್ಥಳದ ಕಾರ್ಯಕ್ಕೆ ತಾವೂ ಸಹಕಾರ ನೀಡುವುದಾಗಿ ಹೇಳಿದರು.

ಎಪಿಎಂಸಿ ಮಾಜಿ ಅಧ್ಯಕ್ಷ ಎಸ್. ಚಂದ್ರಶೇಖರ್ ಮಾತನಾಡಿ ಧರ್ಮಸ್ಥಳ ಸಂಸ್ಥೆಯು ಸದಾ ಸಮಾಜಮುಖಿ ಕಾರ್ಯಕ್ರಮಗಳನ್ನು ನಡೆಸುತ್ತ ಬಂದಿದೆ. ಈ ಶಿಬಿರಗಳಿಂದ ಹೊರಬರುವ ಯುವಕರು ಉತ್ತಮ ಬದುಕು ಕಟ್ಟಿಕೊಳ್ಳಬೇಕು ಎಂದರು.

ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ಜಿಲ್ಲಾ ನಿರ್ದೇಶಕ ಎಂ. ಲಕ್ಷ್ಮಣ್ ಮಾತನಾಡಿ ಪ್ರತಿ ವರ್ಷ ಆಯಾ ಜಿಲ್ಲೆಗಳಲ್ಲಿ ಮೂರು ಮದ್ಯವರ್ಜನ ಶಿಬಿರಗಳನ್ನು ನಡೆಸಲಾಗುತ್ತಿದೆ. ಶಾಲಾ-ಕಾಲೇಜುವಿದ್ಯಾರ್ಥಿಗಳು, ಮಹಿಳೆಯರಲ್ಲೂ ಜಾಗೃತಿ ಮೂಡಿಸಲಾಗುತ್ತಿದೆ ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಮದ್ಯವರ್ಜನ ಶಿಬಿರದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಶಿವನಹಳ್ಳಿ ರಮೇಶ್, ಪಾಲಿಕೆ ಮಾಜಿ ಸದಸ್ಯ ಲಿಂಗರಾಜ್, ವರ್ತಕ ಎಸ್.ಟಿ. ಕುಸುಮಶ್ರೇಷ್ಠಿ, ಅಣಬೇರು ಮಂಜಣ್ಣ, ರೈತ ಸಂಘದ ತಾಲೂಕು ಅಧ್ಯಕ್ಷ ಮಂಡಲೂರು ವಿಶ್ವನಾಥ್, ರಿಶ್ಮಾ ಹಂಸರಾಜ್, ಎ.ಜೆ. ರವಿಕುಮಾರ್, ಎಚ್.ಎನ್. ಗುರುನಾಥ್, ಚೇತೂಬಾಯಿ, ಗೀತಾ ಸುರೇಶ್, ಕ್ಷೇತ್ರ ಯೋಜನಾಧಿಕಾರಿ ಶಿವಪ್ರಸಾದ್ ಇದ್ದರು.