ಕೃಷಿ ಹೊಂಡದಲ್ಲಿ ಮತ್ಸೃ ಭಾಗ್ಯ

ಕೃಷಿ ಹೊಂಡ ನಿರ್ಮಿಸಿಕೊಳ್ಳಲು ಕೃಷಿ ಇಲಾಖೆ ರೈತರಿಗೆ ಪ್ರೋತ್ಸಾಹ ನೀಡುತ್ತಿದೆ. ಸಾಮಾನ್ಯ ವರ್ಗದವರಿಗೆ ಶೇ. 80, ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡದವರಿಗೆ ಶೇ. 90ರಷ್ಟು ಸಬ್ಸಿಡಿ ನೀಡಲಾಗುತ್ತಿದೆ. ಫಲಾನುಭವಿಗಳು ಹೊಂಡಕ್ಕೆ ಬದು ನಿರ್ಮಿಸಿಕೊಳ್ಳಬೇಕು. ಡೀಸೆಲ್ ಪಂಪ್‌ಸೆಟ್ ಹೊಂದಬೇಕು. ತಾಡಪಾಲು, ಸ್ಪ್ರಿಂಕ್ಲರ್ ಅಳವಡಿಸಿಕೊಂಡು ತಂತಿ ಬೇಲಿಯನ್ನು ಹಾಕಿಕೊಳ್ಳಬೇಕು. ಕೃಷಿ ಹೊಂಡಗಳು ಕನಿಷ್ಠ 10 ಮೀಟರ್ ಅಗಲ, 10 ಮೀಟರ್ ಉದ್ದ, 3 ಮೀಟರ್ ಆಳ, ಚೌಕಾಕಾರ ಇರಬೇಕು ಎಂಬ ನಿಯಮವಿದೆ.

ತಾಲೂಕಿನಲ್ಲಿ 2023-24ರಲ್ಲಿ 80 ಕೃಷಿ ಹೊಂಡಗಳನ್ನು ಕೃಷಿ ಭಾಗ್ಯ ಯೋಜನೆಯಡಿ ನಿರ್ಮಿಸಲಾಗಿತ್ತು. 2024-25ರಲ್ಲಿ ಆ ಸಂಖ್ಯೆ 124ಕ್ಕೆ ಏರಿಕೆಯಾಯಿತು. 2025-26ರಲ್ಲಿ 158 ಕೃಷಿ ಹೊಂಡಗಳು ನಿರ್ಮಾಣವಾದವು. ಇದರಿಂದ ರೈತರು ಜಲ ಮೂಲವನ್ನು ಖಾತ್ರಿಪಡಿಸಿಕೊಂಡು ವ್ಯವಸಾಯಕ್ಕೆ ಬಳಸಿಕೊಳ್ಳುತ್ತಿದ್ದಾರೆ.

ಕೃಷಿ ಉದ್ದೇಶಕ್ಕೆ ಸೀಮಿತವಾಗಿದ್ದ ಹೊಂಡಗಳು ಈಗ ಹೊಸದೊಂದು ಆಯಾಮವನ್ನು ಪಡೆದುಕೊಂಡಿವೆ. ಹೊಂಡದಲ್ಲಿ ಲಭ್ಯವಿರುವ ನೀರಿನಲ್ಲಿ ಮೀನು ಸಾಕಾಣಿಕೆ ಮಾಡಲು ಇಲಾಖೆ ರೈತರಿಗೆ ಪ್ರೇರೇಪಿಸುತ್ತಿದೆ. ಇದಕ್ಕಾಗಿ ಕೃಷಿ ಇಲಾಖೆಯು ಮೀನುಗಾರಿಕೆ ಇಲಾಖೆಯನ್ನು ಸಂಪರ್ಕಿಸಿ ಉಚಿತವಾಗಿ ಮೀನುಗಳನ್ನು ಒದಗಿಸಲು ವ್ಯವಸ್ಥೆ ಮಾಡುತ್ತಿದೆ.

ತಾಲೂಕಿನಲ್ಲಿ ಈಗಾಗಲೆ ಕೃಷಿ ಭಾಗ್ಯ ಯೋಜನೆಯ 200ಕ್ಕೂ ಹೆಚ್ಚು ಫಲಾನುಭವಿ ರೈತರಿಗೆ ರೋಹು, ಕಾಟ್ಲಾ ಜಾತಿಯ ಮೀನು ಮರಿಗಳನ್ನು ಉಚಿತವಾಗಿ ನೀಡಲಾಗಿದೆ. ತಾಡಪಾಲು ಹಾಸಿನ (ಪಾಲಿಥೀನ್ ಲೈನಿಂಗ್) ಕೃಷಿ ಹೊಂಡಗಳು ನಿಧಾನವಾಗಿ ಮೀನು ಉತ್ಪಾದನಾ ಕೊಳಗಳಾಗಿ ಬದಲಾಗುತ್ತಿವೆ. ಕೃಷಿಯ ಜತೆಗೇ ಈ ಮಾರ್ಗವನ್ನು ರೈತರು ಅನುಸರಿಸುತ್ತಿದ್ದಾರೆ.

ಇಲಾಖೆ ಅಧಿಕಾರಿಗಳ ಮಾರ್ಗದರ್ಶನಲ್ಲಿ ಕಡ್ಲೇಬಾಳು ಗ್ರಾಮದಲ್ಲಿ ಕೆಲವು ರೈತರು ಈ ಯೋಜನೆಯಲ್ಲಿ ಯಶಸ್ವಿಯಾಗಿದ್ದಾರೆ. ಮೀನು ಮರಿಗಳಿಗೆ ಆಹಾರ ಒದಗಿಸುವುದು ಸೇರಿ ಉತ್ತಮವಾಗಿ ನಿರ್ವಹಣೆ ಮಾಡುತ್ತಿದ್ದಾರೆ.

20 ದಿನಗಳಿಗೊಮ್ಮೆ ಹೊಂಡದ ನೀರನ್ನು ಹೊರ ಹಾಕಿ ಆ ನೀರನ್ನು ಕೃಷಿಗೆ ಬಳಸಿ ಹೊಸ ನೀರನ್ನು ತುಂಬುತ್ತಿದ್ದಾರೆ. ಇದರಿಂದ ಮೀನುಗಳಿಗೆ ಒಳ್ಳೆಯ ಆಮ್ಲಜನಕ ಲಭ್ಯವಾಗುತ್ತಿದೆ. ಅಷ್ಟೇ ಅಲ್ಲ, ಹೊಂಡದಿಂದ ಹೊರ ತೆಗೆದ ನೀರನ್ನು ಕೃಷಿಗೆ ಬಳಸುತ್ತಿರುವುದರಿಂದ ಬೆಳೆಗೆ ಉತ್ತಮ ಪೋಷಕಾಂಶ ದೊರೆತು ಇಳುವರಿಯಲ್ಲಿ ಸುಧಾರಣೆಯಾಗಿದೆಯಂತೆ.

ಇಲ್ಲಿನ ಯಶಸ್ಸನ್ನು ಗಮನಿಸಿ ಆನಗೋಡು, ಮಾಯಕೊಂಡ ಭಾಗದ ಕೆಲವು ರೈತರೂ ಕೃಷಿ ಭಾಗ್ಯ ಯೋಜನೆಯ ಹೊಂಡಗಳಲ್ಲಿ ಮೀನು ಸಾಕಣೆಗೆ ಒಲವು ತೋರಿದ್ದಾರೆ.