ಹಳೇ ಕುಂದುವಾಡ ಬ್ರಿಡ್ಜ್ ಕಾಮಗಾರಿಗೆ ಗಡುವು

ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿದ ಗ್ರಾಮಸ್ಥರು, ಸಮೀಪದ ಕನಕ ಬಡಾವಣೆ ನಿವಾಸಿಗಳು ಹಾಗೂ ಸರ್ಕಾರಿ ಪ್ರಾಥಮಿಕ ಶಾಲೆಯ ಎಸ್‌ಡಿಎಂಸಿ ಸಮಿತಿ ಅಧ್ಯಕ್ಷರು ಡಿಸಿ ಜಿ.ಎಂ.ಗಂಗಾಧರಸ್ವಾಮಿ ಅವರ ಮೂಲಕ ಹೆದ್ದಾರಿ ಪ್ರಾಧಿಕಾರಕ್ಕೆ ಮನವಿ ಸಲ್ಲಿಸಿದರು.

ಎರಡೂವರೆ ತಿಂಗಳ ಹಿಂದೆ ಹಳೆಯ ಎರಡು ಬ್ರಿಡ್ಜ್‌ಗಳನ್ನು ಒಡೆದು, ಹೊಸ ಸೇತುವೆ ನಿರ್ಮಾಣಕ್ಕೆ ಕಬ್ಬಿಣ ಅಳವಡಿಸಿದ್ದು ಬಿಟ್ಟರೆ ಕೆಲಸ ನಡೆದಿಲ್ಲ. ಅನುದಾನ ಬಿಡುಗಡೆಯಾಗಿಲ್ಲ, ಬಿಲ್ ಬಾಕಿ ಇದೆ, ಕೆಲಸಗಾರರು ಸಿಗುತ್ತಿಲ್ಲ, ಪ್ಲಾೃನ್ ಬದಲಾಗಿದೆ ಎಂಬ ನೆಪಗಳನ್ನು ಹೇಳಿ ಕೆಲಸ ಸ್ಥಗಿತಗೊಳಿಸಲಾಗಿದೆ ಎಂದು ಗ್ರಾಮಸ್ಥರು ದೂರಿದರು.

ಗುತ್ತಿಗೆದಾರರು ಹೇಳಿದಂತೆ ಬೇಸಿಗೆ ರಜೆ ಅವಧಿ ಒಳಗಾಗಿ ಬ್ರಿಡ್ಜ್ ಕಾಮಗಾರಿ ಮುಗಿಸಿಲ್ಲ. ಹಳೆಯ ಎರಡು ಬ್ರಿಡ್ಜ್ ಒಡೆದು ಹಾಕಿ ಎಲ್ಲೆಂದರಲ್ಲಿ ಗುಂಡಿ ಅಗೆದು ಬಿಡಲಾಗಿದೆ. ಕಬ್ಬಿಣ ಅಳವಡಿಸಿ ಕೆಲಸ ನಿಲ್ಲಿಸಲಾಗಿದೆ. ಕಾಮಗಾರಿ ಹಿನ್ನಲೆಯಲ್ಲಿ ಸರ್ವೀಸ್ ರಸ್ತೆಗೆ ಹೆದ್ದಾರಿ ಮಾರ್ಗ ಬದಲಾವಣೆ ಮಾಡಲಾಗಿದೆ.

ಇದರಿಂದ ರೈತರು, ಸಾರ್ವಜನಿಕರಿಗೆ ತೊಂದರೆಯಾಗಿವೆ. ನಿತ್ಯ ಅನೇಕ ಅಪಘಾತಗಳು ಸಂಭವಿಸುತ್ತಿವೆ. ಹೆಚ್ಚಿನ ಅವಘಡ ಆಗುವ ಮುನ್ನ ಈ ಕೂಡಲೇ ಸೇತುವೆ ಕಾಮಗಾರಿ ಆರಂಭಿಸಬೇಕು. ಸೇತುವೆ ಎತ್ತರವನ್ನು ಐದೂವರೆ ಮೀಟರ್‌ಗೆ ಹೆಚ್ಚಿಸಲು ಸಂಬಂಧಿಸಿದ ಇಲಾಖೆಗಳಿಗೆ ನಿರ್ದೇಶನ ನೀಡಬೇಕು ಎಂದು ಮನವಿ ಮಾಡಿದರು.

ಬನ್ನಿಕೋಡು, ಬೇವಿನಹಳ್ಳಿ ಮಾರ್ಗವಾಗಿ ಶಿವಮೊಗ್ಗ ತಲುಪಲು ನೇರ ಸೇತುವೆ ಮಾರ್ಗ ಕಲ್ಪಿಸಲು ಮನವಿ ಮಾಡಲಾಗಿತ್ತು. ಆದರೆ ಈ ಮಾರ್ಗದಲ್ಲಿ ಚಾನೆಲ್ ಅಡ್ಡಲಾಗುವ ಹಿನ್ನೆಲೆಯಲ್ಲಿ ಸಮೀಪದಲ್ಲೇ ಸೇತುವೆ ನಿರ್ಮಾಣಕ್ಕೆ ನಿರ್ಧರಿಸಲಾಗಿತ್ತು. ಆದರೆ ನಿಗದಿತ ಅವಧಿಯಲ್ಲಿ ಪೂರ್ಣಗೊಳ್ಳದಿರುವುದರಿಂದ ಸಮಸ್ಯೆಯಾಗಿದೆ ಎಂದರು.

ಸರ್ಕಾರಿ ಪ್ರಾಥಮಿಕ, ಪ್ರೌಢಶಾಲೆ ಹಾಗೂ ಕಾಲೇಜು ವಿಭಾಗದ ಮುಖ್ಯ ಶಿಕ್ಷಕರು ಪ್ರತ್ಯೇಕ ಮನವಿ ಸಲ್ಲಿಸಿದರು. ಸೇತುವೆ ನಿರ್ಮಾಣ ಅರ್ಧಕ್ಕೆ ಸ್ಥಗಿತಗೊಂಡಿದ್ದರಿಂದ ಶಾಲೆಯಲ್ಲಿ ಈ ಬಾರಿ ಮಕ್ಕಳ ದಾಖಲಾತಿ ಕುಸಿದಿದೆ. ಬ್ರಿಡ್ಜ್ ಇಲ್ಲದ್ದರಿಂದ ಮಕ್ಕಳು ಸುತ್ತುವರೆದು ಶಾಲೆಗೆ ಬರಬೇಕಾಗಿದೆ.

ಹೀಗಾಗಿ ಪಾಲಕರು ಹತ್ತಿರದ ಖಾಸಗಿ ಶಾಲೆಗಳಿಗೆ ಮಕ್ಕಳನ್ನು ಸೇರಿಸಿದ್ದಾರೆ, ರಸ್ತೆ ದಾಟಲು ಶಾಲಾ ಮಕ್ಕಳಿಗೆ ತೀವ್ರ ಸಮಸ್ಯೆಯಾಗಿದೆ. ಹಳೆಯ ಸೇತುವೆ ಒಡೆದು ಹಾಕಿದ್ದರಿಂದ ಶಾಲಾ ಮಕ್ಕಳು ಸಂಚಾರಕ್ಕೆ ಹರಸಾಹಸ ಪಡುವಂತಾಗಿದೆ. ಯಾಮಾರಿದರೆ ಜೀವಕ್ಕೆ ಕುತ್ತು ಬರಲಿದೆ. ಹೀಗಾಗಿ ತ್ವರಿತಗತಿಯಲ್ಲಿ ಸೇತುವೆ ಕಾಮಗಾರಿ ಮುಗಿಸಿ ಸಂಚಾರಕ್ಕೆ ಮುಕ್ತ ಮಾಡಬೇಕು ಎಂದು ಕೋರಿದರು.

ಈ ಸಂದರ್ಭದಲ್ಲಿ ಮಾಜಿ ಮೇಯರ್ ಎಚ್.ಎನ್. ಗುರುನಾಥ್, ಎಪಿಎಂಸಿ ಮಾಜಿ ಅಧ್ಯಕ್ಷ ಎಚ್.ಜಿ. ಗಣೇಶಪ್ಪ, ಜಿಮ್ಮಿ ಹನುಮಂತಪ್ಪ, ಮುಖಂಡರಾದ ಬಸವರಾಜ್ ಅಕ್ಕಿ, ಸಂಪತ್ ಕುಮಾರ್, ಗೋಪಾಲಪ್ಪ, ಹನುಮಂತಪ್ಪ, ಸಣ್ಣಿಂಗಪ್ಪ, ಮುಖ್ಯ ಶಿಕ್ಷಕ ರವಿಕುಮಾರ್, ಸಿ. ಮಾರುತೇಶ್, ಮಧು ನಾಗರಾಜ್, ಯಶವಂತ್, ರಾಜು ಕರೂರು ಇತರರಿದ್ದರು.