ಗೂಂಡಾಗಿರಿ ವಿರುದ್ಧ ಮಹಿಳಾ ಆಯೋಗಕ್ಕೆ ದೂರು

ಗಲಾಟೆ ನಡೆಸಿದ ಆರೋಪಿಗಳನ್ನು ಬಂಧಿಸಲು ಮುಂದಾದಾಗ ಪೊಲೀಸರ ಮೇಲೆಯೇ ಹಲ್ಲೆ ನಡೆದು ಮೂರು ದಿನ ಕಳೆದಿವೆ. ಆದರೂ ಮಹಿಳಾ ಆಯೋಗ ಇದರ ಬಗ್ಗೆ ಮಾತನಾಡಿಲ್ಲ. ಆಯೋಗ ಕೇವಲ ಸರ್ಕಾರದ ಪರವಾಗಿ ಕೆಲಸ ಮಾಡುತ್ತಿದೆಯೇ ಅಥವಾ ಮಹಿಳೆಯರ ಪರವಾಗಿದೆಯೇ ಎಂದು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಪ್ರಶ್ನಿಸಿದರು.

ದಾವಣಗೆರೆ ಇಂದು ಗೂಂಡಾಗಿರಿ, ಗಾಂಗಾ ಪೆಡ್ಲರ್‌ಗಳು, ಒಸಿ ನಡೆಸುವವರು, ಅಕ್ಕಿ ಕಳ್ಳ ಸಾಗಣೆದಾರರು, ಮರಳು ಮಾಫಿಯಾಕೋರರ ನಗರವಾಗುತ್ತಿದೆ. ಆದರೆ, ‘ನಮ್ಮ ಜತೆ ಫೋಟೋ ತೆಗೆಸಿಕೊಂಡವರು ಅಕ್ರಮ ಎಸಗಿದರೆ ಅದಕ್ಕೆಲ್ಲ ನಾನು ಕಾರಣನೆ’ ಎಂದು ಸಚಿವ ಎಸ್.ಎಸ್.ಮಲ್ಲಿಕಾರ್ಜುನ್ ಉಡಾಫೆ ಉತ್ತರ ನೀಡುವುದು ಸರಿಯಲ್ಲ ಎಂದರು.

ಗೂಂಡಾಗಳ ವಿರುದ್ಧ ನಿಂತು ದಿಟ್ಟ ಉತ್ತರ ನೀಡಿದ ಪೊಲೀಸ್ ಅಧಿಕಾರಿ ಗಾಯತ್ರಿ ಅವರ ಪರವಾಗಿ ಎಸ್ಪಿ ಉಮಾ ಪ್ರಶಾಂತ್ ಹಾಗೂ ಜಿಲ್ಲಾಡಳಿತ ನಿಲ್ಲಬೇಕು. ಗಲಭೆಗೆ ಕಾರಣರಾದವರನ್ನು ಗಡಿಪಾರು ಮಾಡಬೇಕು. ಈ ಸಂಬಂಧ ಜಿಲ್ಲಾಡಳಿತ ಹಾಗೂ ಎಸ್ಪಿ ಅವರಿಗೂ ಮನವಿ ಸಲ್ಲಿಸಲಾಗುವುದು. ದಾವಣಗೆರೆ ದಕ್ಷಿಣ ಕ್ಷೇತ್ರದಲ್ಲಿ ನಿರ್ಭೀತ ಉಪಚುನಾವಣೆ ನಡೆಯಬೇಕಿದ್ದಲ್ಲಿ ಎಲ್ಲ ರೌಡಿಶೀಟರ್‌ಗಳನ್ನು ಜಿಲ್ಲೆಯಿಂದ ಗಡಿಪಾರು ಮಾಡಬೇಕು ಎಂದು ಆಗ್ರಹಿಸಿದರು.

ಸಾಮಾನ್ಯ ಆರೋಪಿಗೆ ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ ಸಿಗುತ್ತದೆ. ಆದರೆ ಡ್ರಗ್ಸ್ ದಂಧೆಯ ಆರೋಪಿಗೆ ಎಸ್‌ಎಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಸಿಗುತ್ತದೆ ಎಂದು ವ್ಯಂಗ್ಯವಾಡಿದ ಜಯಮ್ಮ, ಸಚಿವರು ನಮ್ಮ ಬೆನ್ನಿಗಿದ್ದಾರೆ ಎಂಬ ಕಾರಣಕ್ಕೆ ರೌಡಿಗಳಿಗೆ ಪೊಲೀಸರ ಬಗ್ಗೆಯೂ ಭಯ ಇಲ್ಲವಾಗಿದೆ ಎಂದು ದೂರಿದರು.

ಸಂಸದೆ ಡಾ. ಪ್ರಭಾ ಅವರಿಂದ ರಕ್ಷಾಧಾರ ಕಟ್ಟಿಸಿಕೊಂಡಿದ್ದ ಆರೋಪಿ ಅಕ್ಕಿ ಅಕ್ರಮ ಸಾಗಣೆಯಲ್ಲಿ ಸಿಕ್ಕು ಬಿದ್ದಿದ್ದಾನೆ. ಪೊಲೀಸ್ ಅಧಿಕಾರಿಣಿ ಹಾಗೂ ಕಾರ್ಲ್ ಮಾರ್ಕ್ಸ್ ನಗರದಲ್ಲಿ ಹಲ್ಲೆಗೀಡಾದ ಮಹಿಳೆಯರ ಬಗ್ಗೆಯೂ ಸಂಸದೆ ಪ್ರತಿಕ್ರಿಯಿಸಲಿಲ್ಲ. ಸಾಮಾಜಿಕ ನ್ಯಾಯದ ಅವರ ಭರವಸೆ ಎಲ್ಲಿ ಹೋಯಿತು? ಎಂದು ಪ್ರಶ್ನಿಸಿದರು.

ಸುದ್ದಿಗೋಷ್ಠಿಯಲ್ಲಿ ಮೋರ್ಚಾ ಪದಾಧಿಕಾರಿಗಳಾದ ಭಾಗ್ಯಾ ಪಿಸಾಳೆ, ಚೇತನಾ ಶಿವಕುಮಾರ್, ರೇಣುಕಾ ಕೃಷ್ಣ, ನೀತಾ ಮಂಜುನಾಥ್ ಇದ್ದರು.